講到鳥取縣，大家可能第一時間會聯想到砂丘，但其實鳥取仲有一個備受矚目嘅旅遊景點，就係享譽國際嘅人氣漫畫『名偵探柯南』聖地・北榮町。點解呢度會咁出名？因為喺度隨處都可以見到柯南以及其作品登場人物嘅身影囉！今次就等FUN! JAPAN編輯部為大家詳細介紹呢個柯南迷必去聖地啦！
柯南與鳥取縣北榮町嘅淵源
位於本州西部中國地方嘅鳥取縣中部地區內，有個名為「北榮町」嘅小鎮。作為『名偵探柯南』作者・青山剛昌嘅故鄉，鎮內隨處可見與柯南相關嘅裝置藝術、紀念雕像，現已成為無人不知嘅名偵探柯南迷聖地！
隨處可見柯南身影嘅景點・鳥取北榮町「柯南大道」
喺滿佈彩色人物雕像、青銅像及雕刻石板嘅「柯南大道」上，可以見到多位出現喺『名偵探柯南』中嘅經典人物。從JR由良車站到青山剛昌故鄉館嘅1.4km，徒步約20分鐘嘅路程，就已經令遊客可以與柯南等眾多角色度過一段歡樂時光。
可以遇見幾多座彩色人物雕像呢？
喺柯南大道起點，就會見到柯南嘅彩色人物雕像喺度迎接大家。前往圖書館嘅路上，少年偵探團嘅成員會陸續出現喺大家面前。另外，仲有一座望緊手錶嘅工藤新一青銅像，佇立於圖書館大門前。唔通新一同小蘭有約？但點解唔見小蘭嘅身影呢？
繼續向前行，就可以見到北榮町公所前，大大啖食緊西瓜嘅柯南。遍布於北榮町嘅彩色人物雕像，淨係柯南大道上就已經有14 座。究竟您又總共可以搵到幾多座呢？
青銅像、雕刻石板、坑渠蓋通通都係柯南！
柯南大道上有唔少可以影靚相嘅打卡景點，其中之一就係刻有『名偵探柯南』漫畫第1～28集封面嘅石板，而且石板係利用影雕技術將單行本封面刻於花崗石上製作而成呢。
另外，柯南大橋嘅欄杆上除咗有栩栩如生嘅柯南青銅像，仲有4款柯南與鐵刃嘅青銅浮雕，呢度亦係超受歡迎嘅打卡景點。柯南大道上仲可以見到真人1：1比例嘅「沉睡小五郎」青銅像。
大家腳下亦有超吸睛嘅影相位喔。無錯！連坑渠蓋上面都有柯南嘅身影！無論係青銅像、雕刻石板、抑或係坑渠蓋，全部都係柯南。只要遇到就會令人不禁想走過去大影特影。所以當大家去到北榮町時，行程唔好排得太密，唔係就唔夠時間大影特影啦！
青山剛昌故鄉館
從車站出發，徒步20分鐘即可抵達「青山剛昌故鄉館」。館內除咗有擺放複製原畫，仲有真實重現作者嘅創作空間、解謎推理小遊戲等設施…。當您行入「柯南世界圖書館」呢個展示咗25個國家、區域所出版嘅漫畫單行本空間時，保證可以可以感受得到柯南喺全球嘅超高人氣。
小編亦推薦大家企喺阿笠博士發明嘅「渦輪噴射滑板」上，欣賞大螢幕播放嘅北榮町景色。青山剛昌故鄉館絕對係一座所有展品都流露「柯南愛」嘅博物館喔。
景點資訊
- 景點名稱：青山剛昌故鄉館
- 地址：鳥取縣東伯郡北榮町由良宿1414
- 營業時間：09:30～17:30
- 休館日：全年無休
- 支付方式：可使用信用卡
- 預約方式：無須預約
- 交通方式：從柯南車站（JR由良站）徒步約20分鐘，或搭的士約5分鐘。
柯南之家 米花商店街
「柯南之家 米花商店街」上共有四間店舖，例如係喺名偵探柯南裡面經常出現嘅「波羅咖啡店」內，您可以品嘗得到「名偵探懷舊拿波里意粉」或「波羅咖啡火腿三文治」等以作品為主題嘅菜式。
當大家去到2022年3月12日重新整修開幕嘅「Conan’s Kitchen」，一定唔可以錯過設置於店內一角嘅影相位，記得要去同新一與柯南影返張合照喔。
想食甜品嘅話，推薦大家可以去呢間使用當地食材製作美食嘅意式雪糕專門店「CONAN GELATO」。想買獨一無二嘅手信做紀念嘅話，就唔可以錯過呢間網羅成70種以上『名偵探柯南』原創商品嘅「柯南百貨店」喔。
另外，仲會見到出現喺原著裡面，工藤屋企嘅大門口喔！唔知走去撳門鐘嘅話，會唔會有咩驚喜事情發生呢？好奇嘅話，歡迎大家親自去撳一撳工藤屋企嘅門鐘啦！
景點資訊
- 營業時間：視店鋪而定
- 交通方式：從柯南車站（JR由良站）徒步約10分鐘
Comments