喺日本注重健康嘅人有非常之多，以合理嘅價錢就可以輕鬆買到嘅健康食品更加係深受日本人歡迎。當中，黑蒜頭就係其中之一！
最近FUN! JAPAN「煮編」去行日本連鎖超市嘅時候，發現喺蔬菜區總會見到陳列著唔少黑蒜頭。究竟黑蒜頭有咩神奇魔力，成為日本人餐檯上嘅流行食材？仲會同大家分享一道用黑蒜頭所製作嘅菜式，大家一定要將文章睇到最後喔。另外，如果有任何疑問或想要同FUN! JAPAN「煮編」分享嘅話，非常歡迎大家留言喔！
日本黑蒜頭二三事
「黑蒜頭」嘅製作方式，就係將白蒜頭放置喺高溫、極為潮濕嘅環境之下3～4個星期，使其熟成。日本人相信日本黑蒜頭嘅發源地係三重縣，就算係日本數一數二嘅蒜頭產地青森縣，喺2005年之前販賣嘅都係嚟自三重縣發酵熟成嘅黑蒜頭喔。而青森縣不愧為全國數一數二嘅優質蒜頭產地，自2006年起喺各個相關單位協力合作之下，進行一連串嘅研究開發，青森縣特有嘅黑蒜頭終於誕生。
黑蒜頭成為健康飲食嘅新潮流，其中一個理由就係前弘前大學醫學系教授「佐佐木甚一」博士所發表嘅研究成果。據研究成果證實，黑蒜頭富含「S-烯丙基半胱胺酸（S-allyl-cysteine，SAC）」等抗癌成份，能有效抑制癌細胞。
黑蒜頭之功效
黑蒜頭本身含有豐富營養成分，被認為能夠幫助促進健康，滋潤美容。
黑蒜頭含有一種名為「精胺酸」嘅胺基酸，其含量為普通蒜頭大約3倍之多。精胺酸能夠分解為身體帶來疲勞感嘅氨，能夠有效消除疲勞並促進胰島素分泌。同時，黑蒜富含胺基酸及多酚，多酚抗氧化效果卓越，其作用在於消除導致老化嘅因素活性氧。
最近幾年更發現黑蒜頭有效舒緩花粉症等過敏症狀，抗過敏效果強烈。每年深受花粉症之苦嘅人，喺食咗黑蒜頭一段時間之後，相關症狀亦有所改善。
除此之外，喺黑蒜頭熟成嘅過程當中所產生嘅成分「S-烯丙基半胱胺酸（S-allyl-cysteine，SAC）」，亦有高抗氧化力，防止導致老化嘅活性氧與腸內「壞膽固醇」（低密度脂蛋白膽固醇，LDL-C）結合。身體內嘅活性氧增加，會導致產生細紋等肌膚老化現象、動脈硬化、糖尿病等等，而「S-烯丙基半胱胺酸（S-allyl-cysteine，SAC）」則有效抑制活性氧增加。更重要嘅係，「S-烯丙基半胱胺酸（S-allyl-cysteine，SAC）」能夠抗癌，至今仍然有唔少機構持續進行著相關抗癌研究。
黑蒜頭既擁有健康功效又好處多多，難怪經常出現喺日本超市等店舖嘅商品陳列架上！想親手將蒜頭熟成自家製黑蒜頭？或者唔算係一件難事，但係要有心理準備，喺熟成期間會瀰漫著蒜頭嘅獨特「香」味，因此唔太建議大家喺屋企室內嘅空間製作。如果真係好想親手熟成黑蒜頭嘅話，建議喺露台等等比較開放嘅戶外空間進行熟成會比較好喔。
黑蒜頭菜式食譜：黑蒜意粉
黑蒜意粉材料（3人份）
- 意粉 300g
- 黑蒜頭 3瓣
- 油漬鯷魚罐頭 份量按個人喜好
- 椰菜 4〜5塊
- 鷹爪辣椒 1條
- 橄欖油 適量
- 鹽 適量
- 胡椒 適量
黑蒜意粉做法
- 將黑蒜頭切碎，鷹爪辣椒切成圈狀。椰菜隨意切成大塊狀。
- 喺滾水裡面落少量鹽，然後煮意粉。
- 將黑蒜頭及鷹爪辣椒倒入平底鍋，開火稍微炒一下爆香，加入鯷魚及椰菜之後，再炒一下。
- 喺步驟3倒入一湯勺嘅煮意粉水，再放入煮好嘅意粉拌炒，整體攪拌均勻入味之後，再落鹽、胡椒調味，裝碟即完成。
Comments