由於Covid-19嘅影響，2020年東京奧運會係史上首個以無觀眾嘅舉辦方式進行嘅奧運會。相信唔少人都會在意呢個極具歷史性，曾舉辦2020年東京奧運嘅主場一國立競技場，究竟而家係咩模樣吧？選手更衣室、國立競技場跑道等等一般非公開嘅區域，喺1年後竟然可以透過參加「國立競技場STADIUM TOUR」親身去感受、重溫東京奧運嘅美好回憶！
精彩體驗內容包括於田徑跑道上奔跑，企喺頒獎台上感受運動員心情等等－2020年東京奧運會嘅非一般精彩之旅盡在「國立競技場STADIUM TOUR」！今次，FUN！JAPAN編輯部親身去參與其中，為大家報導箇中精彩體驗。當日本重新開關嘅時候，不妨去體驗一場奧運會・殘奧會（又稱帕運會）之旅，或會成為您一生難忘嘅回憶喔。
關於國立競技場
國立競技場係於1958年所設立嘅體育場地，1964年東京奧運會舉辦時此處亦被使用作為主要場地。內裡嘅國立霞丘陸上競技場於2016年被拆除，並於舊址上改建成2020年東京奧運會・殘奧會主場嘅新國立競技場。新國立競技場嘅設計，係由全球知名日本建築師隈研吾所設計。
圍繞著國立競技場館周邊嘅木屋簷尤其令人印象深刻，其於各層如細長狹縫狀嘅設計部分，採用傳統日本建築中被稱為「軒庇」嘅屋簷設計，當中使用嘅木材更加係採購自日本國內47個都道府縣，並依各自方位排列。唔單止能夠遮擋陽光風雨，設計本身亦成為一大特點。
國立競技場擁有地上5層、地下2層，約6.8萬個座位嘅觀眾席，以陽光從樹葉縫隙中灑落嘅情景為設計概念。觀眾座席一共使用咗5種顏色（白色、黃綠、灰色、深綠、濃茶），靠近場地嘅部分多為深色，靠近屋頂嘅部分則為淺色並以隨機分配。配色設計巧思下，即使無坐滿觀眾亦可以產生坐滿人嘅錯覺。
關於國立競技場STADIUM TOUR
喺舉辦2020年東京奧運會當時，能夠進入國立競技場嘅只有選手、大會相關人員、通過聯校觀戰活動教育活動觀看比賽嘅小朋友等少數人。2020年東京奧運會落幕後，為咗可以公開畀更多人知悉及瞭解國立競技場，官方決定從2022年開始舉辦「國立競技場STADIUM TOUR」開放公眾入場參觀！
公眾可以選擇2種唔同方案，分別係「一般TOUR」及「VIP TOUR」。「一般TOUR」會帶您邊巡遊邊講解，如更衣室或競技場跑道等等一般非公開嘅區域；而「VIP TOUR」除咗可以去巡遊VIP區域之外，仲可以獲得專屬禮品喔。即刻去睇睇「國立競技場STADIUM TOUR」有咩精彩位啦！
關於國立競技場STADIUM TOUR（一般TOUR）
「一般TOUR」會參觀6個區域，當您走過進場入口，偌大嘅體育場地就會出現喺您眼前！可以坐喺一般觀眾席上，感受一下猶如睇緊比賽嘅緊張氣氛喔。
跑道＆陸上競技場
可以置身於跑道＆陸上競技場區域，喺奧運選手比賽過嘅賽道上奔馳！
仲可以喺畫面上簽名，體驗埋某樣電視直播經常都會甩到嘅畫面！
就係指體育賽事轉播中，偶爾會見到 「運動員喺相機鏡頭上直接簽名」嘅舉動。亦可以將簽名過程拍成影片Save低，係非常難得嘅體驗啊～完成後嘅影片如下，大家可以參考返。
跑道上仍然保留著奧運會・殘奧會嘅標誌。記得一定要喺度影相留念喔！
FLASH INTERVIEW ZONE
去完跑道＆陸上競技場區域後，就去參觀當時採訪選手及教練時所使用嘅「FLASH INTERVIEW ZONE」採訪區。
可以企喺2020年東京奧運會中實際被使用過嘅頒獎台上，體會獲得獎牌嘅選手們心情。
只有選手們以及相關人員先可以進入嘅更衣室，可以喺度感受到比賽背後不為人知嘅一面，亦可以近距離欣賞2020年東京奧運會嘅聖火火炬，一定要影相留念喔！
SIGN WALL
「FLASH INTERVIEW ZONE」區域比較入少少嘅位置，有一大片由2020年東京奧運會嘅田徑選手，所留低嘅簽名牆。全世界嘅運動員簽名大約有300個，不妨喺度搵搵您熟悉嘅選手簽名喔！
關於國立競技場STADIUM TOUR（VIP TOUR）
VIP區域嘅參觀旅程，從入口開始就已經與一般嘅「STADIUM TOUR」有所不同。天花板係以摺紙為理念所設計，VIP區域嘅裝修係以迎接來自海外嘅重要人物，而打造而成嘅日式現代風格。
VIP休息室設置喺主場地嘅另一邊，亦供大家參觀。
而且，可以參觀重要來賓、競技團體高層所使用嘅「貴賓室」、贊助商室等等平時接觸唔到嘅區域，亦可以實際坐低感受一下喔。
另外，VIP區域嘅座椅設計，與一般嘅座位相比，更加寬敞舒適。一般嘅座位係塑膠製，VIP區域嘅貴賓席嘅椅背設有厚墊，就算要坐上一段長時間亦無問題。
「VIP TOUR」嘅參加者仲可以獲得原創環保袋作紀念，絕對係千載難逢嘅國賓級體驗喔。
一般TOUR＆VIP TOUR嘅相同景點：觀景台
觀景台係一處可以眺望約6.8萬個座位全景嘅影相打卡位，可以話係成個旅程嘅高潮位都不為過。實際行入4樓嘅觀景台（又稱展望台），近距離望見由多排木材所打造嘅大屋頂，更能感受到國立競技場氣派非凡嘅廣闊空間感。
國立競技場外亦充滿打卡景點！
「國立競技場STADIUM TOUR」雖然只會喺競技場內進行，但係國立競技場外亦有多個打卡景點。首先，就以寫上「國立競技場」嘅紀念碑和國立競技場為背景，影返幾張靚相留念再繼續行程。
1964年東京奧運會時，舊國立競技場所使用嘅聖火台，如今被移設至國立競技場外作展示喔。
東京2020奧運會・殘奧會上所使用嘅聖火台亦常設於此，可以趁機近距離觀賞。
國立競技場STADIUM TOUR
- 實施地方：國立競技場
- 地址：東京都新宿區霞丘町10-1
- 實施時間：夏季11：00～18：00 / 冬季 11：00～16：30
※實施日程請於官網確認 - 費用（含稅）：
一般TOUR方案：成人1,400日圓 / 高中生以下800日圓
VIP區域&觀景台TOUR方案：成人3,000日圓 / 高中生以下1,500日圓
- 預約方式：從官方網站預約
https://ticket.kokuritu-tours.jp/ - 交通方式：
從JR總武線「千駄谷站」・「信濃町站」徒步5分鐘
從都營大江戶線「國立競技場站」A2出口徒步1分鐘
從東京Metro「外苑前站」3號出口徒步9分鐘
Comments