日本東北地區最南方嘅「福島縣」，除咗有日本三大茅葺部落之一嘅「大內宿」，仲有白色城身與櫻色屋瓦嘅「會津若松城」。福島縣內一共有3座「日本100名城」—分別為會津若松城、白河小峰城，同埋今日嘅主角「二本松城」。
日本100名城「二本松城」
「二本松城」位於福島市與郡山市之間嘅二本松市。當地地名嘅由來，據聞係因為將鄰近古城「四本松城」中嘅兩棵松樹移植於此而得名。
二本松城別名為「霞城」與「白旗城」（因位於白旗峰上），屬於平山城。唔單只獲選為「日本100名城」，範圍內保留至今嘅二本城跡被改建為公園，作為「霞之城公園」被指定為日本國家史跡，更因約2,500棵嘅櫻花樹成為「日本櫻花名所100選」之一。
古城命運顛沛流離！？
不過二本松城嘅命運，並非如櫻花一樣美麗。
城堡最早嘅歷史可追溯至室町時代（1336〜1573年）。二本松城由二本松畠山氏第4代藩主「畠山滿泰」建造，其確切建造年份有1414年與1441〜1443年兩種講法，城堡建立之後，就一直作為二本松畠山氏嘅居城代代相傳到去第7代；直至1586年遭東北知名武將「伊達政宗」攻陷，二本松城成為仙台伊達氏之物，其後又接連易手，蒲生氏、上杉氏等都曾統領過此城。
如今眼前所見嘅壯觀城跡，出自「丹羽光重」之手（1643年入城），並耗時10年大舉修築二本松城與城下町，令到二本松整體街道更為完整。丹羽氏統治二本松長達200多年，係在位時間最長、亦係最後嘅領主世家。
二本松少年隊之悲劇
868年，戊辰戰爭爆發，二本松藩與會津藩等屬同一陣線，結成「奥羽越列藩同盟」對抗明治維新新政府軍。當中，「二本松少年隊」係為咗「二本松之戰」所集結嘅少年兵團，與會津若松知名嘅「白虎隊」一樣，成員全部都係未滿18歲嘅少年，但二本松少年隊嘅平均年齡更低於白虎隊，最年輕嘅成員只有12歲！
1868年7月29日早上，新政府軍進攻二本松城，城內僅有約1,000兵力，根本無法抵抗對方嘅7,000兵力。僅僅半日，二本松城就戰敗，「二本松之戰」燒毀咗箕輪門等城內大部分建築，14名少年亦喪命於此。戰役後來被2013年NHK大河劇《八重之櫻》翻拍，呈現於電視螢光幕上。
春櫻與秋菊綻放之地
經歷過種種紛亂時勢後，被燒毀嘅箕輪門已獲重建，如今嘅二本松城經已成為四季皆美，以櫻花、菊花聞名嘅美麗城跡。
城跡整體如今被整頓成「霞之城公園」，園內約2,500棵嘅櫻花樹於春季盛開時，因地勢以上下包圍城堡石垣，讓堅硬嘅大石增添一份柔美色彩，亦成為當地人賞櫻好去處，更名列「日本櫻花名所100選」之一。唔使入場費、亦不設門限，隨時歡迎周邊居民前往，於迷人環境中度過美好時光。
每逢秋季10〜11月下旬，二本寸城都會舉辦「二本松菊人形展」。二本松地區對菊花情有獨鍾，喜愛菊花經已長達好幾百年—昭和時代（1926〜1989年）初期，當地居民就以「菊人形」（全身以菊花作裝飾，只露面、手、腳嘅人偶，屬日本獨有工藝）裝飾街道；昭和30年（1955年），開始以祭典形式表達對菊嘅熱愛，亦即係如今「二本松菊人形展」嘅開端。
現時嘅「二本松菊人形展」以數量繁多嘅菊花裝飾人偶、場景，裝飾整座城跡，同時仲會有各品種嘅菊花展，係二本松地區嘅年度盛事之一，亦係日本最大規模嘅菊花祭典。（二本松菊人形展入場需付費）
景點資訊
- 名稱：霞之城公園（二本松城跡）
- 地址：福島縣二本松市郭内３丁目
- 交通方式：從JR二本松站徒步約20分鐘
- 營業時間：24小時
Comments