擁有各種新鮮兼高品質食材嘅北海道，當地美食嘅滋味程度絕對係無庸置疑。每當提到日本最「好食」嘅都道府縣嘅時候，北海道絕對係前三名位置。湯咖喱、成吉思汗烤肉、海鮮、奶製品等等都係大家眾所皆知嘅北海道美食，但其實面積廣闊嘅北海道，各區風土⺠情亦有所不同，因此各區嘅當地美食亦各具特色。今次就等我哋齊齊去探索一下，北海道各地嘅B級美食啦！
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
北海道美食優勢
北海道係位於日本最北端，亦係面積最大嘅行政區，本島土地嘅總面積約為7萬8千平方公里（不包括離島）。由於北海道面積相當廣闊，所以根據唔同區域，自然環境及氣候亦完全唔同。因此北海道有著得天獨厚嘅先天環境條件，孕育出種類繁多嘅農產品，唔單止係產量多兼好食，品質亦極具保證！
北海道B級美食
湯咖喱、成吉思汗烤肉、海鮮、奶製品等等都係北海道嘅代表性美食。由於北海道面積廣闊，喺地理上一般會被分為道北、道東、道央、道南4個地區，各地區嘅B級料理亦各具特色，本篇文章會為大家介紹道央、道南嘅B級美食。
道央（主要地區：札幌、小樽、登別、二世谷）
札幌「餃子咖喱飯」
日本唔單止有拉麵配餃子，喺札幌仲有將餃子直接放喺咖喱飯上面嘅「餃子咖喱飯」（ぎょうざカレー）。
「餃子咖喱飯」誕生至今有成40年以上歷史，喺昭和52年（1977年）由札幌餃子專門店「MIYOSHINO」（みよしの）所推出，有別於一般咖喱擁有一口大小嘅配料，「MIYOSHINO」將洋蔥、紅蘿蔔、雞肉等切得碎後熬煮，烹煮出嘅咖喱就好似餃子醬汁一樣，可以將餃子沾咖喱醬汁品嚐，咁過癮嘅食法下次有機會記得親身去品嚐一下啦！
小樽「勾芡炒麵」
照片提供：一般社團法人小樽觀光協會
小樽擁有著名運河美景，深受當地居民喜愛嘅B級美食就係「小樽勾芡炒麵」（小樽あんかけ焼きそば）。呢款美食於昭和30年代（1955〜1964年）開始普及，特色係於偏硬嘅麵條上，淋上一大把餡料豐富嘅勾芡，係小樽隨處可見嘅當地美食。小樽當地甚至成立「小樽勾芡炒麵親衛隊」，向群眾致力推廣其美味喔。
苫小牧「北寄貝」
苫小牧市係全日本北寄貝產量第一嘅地方，亦係當地人嘅飯檯上不可缺少嘅美食喔。「北寄貝咖喱」（ホッキ貝カレー）與「北寄貝炊飯」（ホッキ貝の炊き込みごはん）更加係家家戶戶嘅招牌美食。近年，苫小牧市不斷構思有關北寄貝嘅新菜式，例如喺2015年所推出嘅「苫小牧北寄貝炒麵」（苫小牧ホッキ貝やきそば）一砲而紅，相當受歡迎，一躍成為當地新名物。
道南（主要地區：函館、松前）
函館「幸運小丑漢堡包」
函館當地連鎖漢堡包店「幸運小丑漢堡包」（Lucky Pierrot），截至2020年6月，喺函館以及周邊地區總共擁有17間分店。雖然只有喺函館開設分店，卻奪得「日本地方漢堡包」第一名，亦多次被美食家揀選為最好食嘅漢堡包，吸引日本各地遊客爭相拜訪。人氣排名第1位嘅「油淋炸雞漢堡包」（チャイニーズチキンバーガー）與極具份量嘅「荷包蛋漢堡包」（ラッキーエッグバーガー）相當值得一試。圖片為人氣排名第3位嘅「炸豬扒漢堡包」（トンカツバーガー）。
室蘭「室蘭咖喱拉麵」
照片提供：室蘭市
咖喱烏冬就聽得多，唔知您又有無聽過「咖喱拉麵」（カレーラーメン）呢？呢款美食於室蘭市擁有30年以上歷史，有別於其他大多數擁有一定規則嘅地方B級美食，「室蘭咖喱拉麵」只要係「咖喱風味嘅拉麵」就符合其標準，亦因此造就出多種擁有獨特風味與烹調手法嘅「室蘭咖喱拉麵」。當地將呢款充滿多樣性嘅拉麵，譽為繼札幌味噌、函館鹽味、旭川醬油後，北海道第4款代表性口味嘅拉麵。
室蘭「室蘭串燒雞肉」
照片提供：室蘭市
講起室蘭嘅B級料理，誕生於昭和初期（1937年左右）嘅「室蘭串燒雞肉」（室蘭やきとり）先至係大前輩。雖然個名裡面有「雞肉」（とり）2個字，但其實所使用嘅食材係「豬肉」，仲有一個特色係搭配洋蔥去燒烤，而非一般常被使用嘅長蔥。因為北海道身為洋蔥嘅原產地，其價格亦非常平，而且與豬肉搭配尤其出色，自此成為室蘭知名嘅B級料理。
同場加映：北海道全區域
北海道炸雞
北海道隨處可見嘅「北海道炸雞」（ザンギ），係北海道經典嘅家庭菜式。烹煮手法係先將雞肉醃漬後再油炸，惟重點並非油炸方式，而係「醃料調味」方式喔。每間店家、家庭嘅調味配方都會有所不同，可話係最具代表性嘅北海道家庭味喔。
炸薯仔
照片提供：公益社團法人北海道觀光振興機構
身為日本薯仔大國嘅北海道，日常零食當然會有薯仔嘅蹤跡。「炸薯仔」（あげいも）係一款隨處可見嘅小食，將薯仔去皮煮熟後，裹上粉漿油炸後，瞬間變成一粒粒金黃飽滿嘅炸薯仔波波。炸薯仔嘅發源地係「中山峠」，路途遙遠且偏僻，因此誕生出呢款可以快速填飽肚仔嘅小食，而家更成為大家到此必買嘅美食，其著名程度甚至傳遍成個北海道喔。
Comments