講到茨城縣水戶，除咗日本三名園之一嘅「偕樂園」，應該亦有唔少人會聯想到「水戶黃門」－無錯，日本著名「水戶黃門」就係江戶時代水戶藩第2代藩主「德川光圀」，曾任職官位中納言（又稱作「黃門官」），因而得名「水戶黃門」。水戶城即係水戶藩嘅居所，雖然身為德川御三家嘅其中一員，水戶德川家嘅城卻與另外兩家非常唔同。今次就跟著FUN! JAPAN編輯部腳步，齊齊去認識水戶城吧！
德川御三家之一：「水戶德川家」
「水戶黃門」即水戶藩第2代藩主「德川光圀」
所謂嘅德川御三家，即係指係尾張德川家（愛知縣）、紀州德川家（和歌山縣）與水戶德川家。德川御三家係與德川幕府有親屬關係嘅大名，最初由德川家康指定嘅御三家就係指德川本家、尾張德川、紀州德川，繼承德川幕府嘅將軍人選亦必須從此三家中揀選。
水戶德川家當時嘅官位完全比唔上尾張德川與紀州德川，但由於長期身處江戶（即現時東京）於將軍身邊處理庶務，所以又被世間稱為「副將軍」，直至德川家康過世之後先至被列入御三家中。
另外坊間流傳德川家康曾留低一句遺言，表明未來嘅將軍唔可以係嚟自水戶德川家。但實際上，德川家康並無講過呢句說話，而且大家都知道嘅事實係：末代將軍「德川慶喜」正正就係嚟自水戶德川家。
日本最大規模土造城「水戶城」
當您嚟到水戶探訪水戶城時，可能會覺得奇怪：點解同樣係御三家，水戶城卻超級唔顯眼？
水戶城建於那珂川與千波湖之間臺地（臺地係指凸起嘅面積較大、海拔較低嘅平面地形）嘅平山城，建造年代為平安時代（794～1184年）末期至鎌倉時代（1185～1333年）初期，比起尾張德川名古屋城、紀州德川和歌山城更加歷史久遠。城堡最初建造者係馬場資幹，後來經過佐竹氏等幾次轉手，直至江戶時代被水戶藩初代藩主「德川賴房」移封，從此水戶城就被作為水戶藩居城使用。
德川賴房接手後，進行三之丸與外壕溝（外堀）範圍擴充工程，並於二之丸興建御殿與三階櫓，但整體城池依舊不及擁有天守嘅名古屋城與和歌山城華麗，因為從最一開始，水戶城內就不存在壯觀石垣，而係以大量土造堤防（土塁）與壕溝（堀）去防衛城中心，加上水戶藩主長時間留喺江戶，甚少使用水戶居城，因此城內嘅裝修既簡單又樸實。
大大手門已於2020年復原完成
2006年，水戶城獲選為「日本100名城」。現時遊客仍然可以喺水戶市望見土造堤防（土塁）與壕溝（堀），不過大型建築物多數已於第二次世界大戰期間燒毀，目前現存最古老建築物為建於佐竹氏時代（1590～1602年）嘅「藥醫門」。屬於茨城縣指定文化財之一嘅藥醫門，於1981年移築至水戶第一高中境內，亦即係過去水戶城本丸舊址。後來陸陸續續進行二之丸角櫓與大手門等地嘅復原工序，水戶城過去嘅模樣亦漸漸重現。
景點資訊
- 景點名稱：水戶城址（二之丸展示館所在地）
- 地址：茨城縣水戶市三之丸2-9-22
- 交通方式：從JR水戶站北口徒步約10分鐘
- 營業時間：09:00〜16:00
- 定休日：12月29日～1月3日
充滿書香梅香嘅學術殿堂「弘道館」
除咗藥醫門逃過戰亂，「弘道館」亦幸運地得以保存至今。
1841年，弘道館於水戶城三之丸內建造完成，1857年正式啟用。弘道館由人稱「烈公」嘅第9代水戶藩藩主「德川齊昭」所建，係當時全日本最大規模嘅藩校，需知道當時水戶藩嘅財政其實並不富裕，卻能夠建造出咁大規模嘅藩校，可見其致力提升藩士教育水平嘅決心。
弘道館嘅入學年齡從15～40歲，並無設定畢業制度，學生皆可以喺度終生學習，而且文武並重，從儒學、禮儀、天文、數學、和歌等學問，到劍術、兵學、鐵炮、馬術等武藝亦全盤教授，甚至仲有培養醫生嘅醫學館！末代將軍德川慶喜亦曾於此受過英才教育。
弘道館正廳、至善堂、正門皆為國家指定重要文化財，2015年更作為「近世日本教育遺產群―向學心・禮節本源」（近世日本の教育遺産群―学ぶ心・礼節の本源―）一員獲認證為日本遺產。
除咗書香環繞，每年一到春季，弘道館境內約800棵梅樹亦隨之綻放，梅香飄逸，係茨城縣內著名賞梅勝地。
值得一提嘅係，如今水戶城址範圍為文化與教育匯聚嘅地區，區內林立多間學校，如本丸舊址內嘅水戶第一高中、二之丸舊址內嘅水戶第三高中、茨城大學教育學部附屬小學與幼稚園等，如果開設弘道館嘅烈公「德川齊昭」知道嘅話，一定會深感安慰吧。
景點資訊
- 景點名稱：弘道館
- 地址：茨城縣水戶市三之丸1-6-29
- 交通方式：從JR水戶站北口徒步約8分鐘
- 營業時間：2月20日～9月30日 09:00～17:00
10月1日～2月19日 09:00～16:30 - 定休日：12月29日～31日
- 門票：成人400日圓、小童200日圓、滿70歳以上 200日圓
追加賞花行程：偕樂園
烈公「德川齊昭」除咗打造藩校，亦建造出日本三名園之一嘅「偕樂園」。烈公主張「一張一弛」，認為努力學習之餘亦需要適當休息，如果勤奮學習嘅弘道館係「張」，咁悠遊放鬆嘅偕樂園就係「弛」。
偕樂園佔地廣闊，園內種有3,000棵梅樹，係全日本數一數二嘅梅花景點。每年春季嘅「水戶梅花祭」吸引大批人特意來朝聖，朝早邊賞梅花邊眺望千波湖，夜晚邊賞夜梅兼欣賞煙花，無論日夜都有清新梅香圍繞。2022年，園方更與藝術集團teamLab合作，推出「teamLab 偕樂園 光之祭典」，賦予偕樂園新面貌！
景點資訊
- 景點名稱：偕樂園
- 地址：茨城縣水戶市常磐町1-3-3
- 交通方式：從JR水戶站北口搭巴士約20分鐘於「好文亭表門站」、「偕樂園東門站」、「偕樂園前站」、「偕樂園站」、「千波湖站」落車，徒步約5～10分鐘
- 營業時間：2月中旬～9月30日 06:00～19:00
10月1日～2月中旬 07:00～18:00 - 門票：成人300日圓、小童150日圓（本園以外部分免費、24小時開放）
Comments