【食譜影片】在家享受優雅浪漫日式甜品下午茶時光！「櫻花抹茶雙層羊羹」簡單懶人料理

近排天氣日漸炎熱，係咪喺時候想要嘆返個清涼、爽口嘅甜品呢？為咗迎接日本嘅夏天，每間日式和菓子店、甜品店等等都紛紛推出啫喱、羊羹等日式甜品，擺放喺冰冰涼涼嘅陳列櫃裡，吸引外頭因酷熱而想要透心涼一下嘅客人入嚟購買。

今次 FUN! JAPAN編輯部嘅「煮編」，就要為大家獻上一款充滿日本特有風情嘅甜品－用抹茶與鹽醃櫻花製作出嘅「櫻花抹茶雙層羊羹」！就等優雅浪漫嘅日式甜品，陪伴大家渡過美好嘅下午茶時光吧～

櫻花抹茶雙層羊羹材料

抹茶羊羹

• 白豆沙餡 200g
• 抹茶粉 3g
• 水 200ml

（A）

• 砂糖 2湯匙
• 寒天粉 3g

櫻花啫喱

• 水 200ml
• 寒天 15g
• 上白糖 2湯匙

• 鹽醃櫻花 6朵
• 水 （沖洗鹽用）適量
• 凍水（冷卻用）  適量

櫻花抹茶雙層羊羹製作方法

1. 首先製作下層嘅抹茶羊羹。喺碗中放入白豆沙餡、抹茶粉，用矽膠刮刀攪拌均勻。
2. 將材料（A）與水一同倒入鍋中，開中火一邊攪拌、一邊加熱至沸騰。沸騰之後轉細火，煮2分鐘左右。
3. 加入步驟（1）嘅材料，攪拌材料直至混合均勻之後，轉中火再一邊攪拌、一邊加熱煮5分鐘。煮好之後倒入模具內，靜待冷卻降溫，之後再放入雪櫃雪30分鐘。 
4. 然後製作上層嘅櫻花啫喱。喺烘焙焗盤內放入鹽醃櫻花，再加水為其去除鹽分，浸泡約10分鐘。
5. 將寒天、砂糖倒入鍋中攪拌均勻，然後加水混合，開中火加熱至沸騰。沸騰1分鐘之後，連鍋從爐上拎走，準備另一大鍋倒入凍水，連鍋放於凍水上，隔水冷卻降溫。
6. 於步驟（3）雪好嘅抹茶羊羹表面用牙籤劃上喜愛嘅花紋，再放入步驟（4）嘅櫻花、倒入步驟（5）降溫之後嘅材料，放入雪櫃雪60分鐘，直至凝固。
7. 最後將成品切成喜愛嘅大小，擺好盤即可上檯。