日本有一種慶祝場合必備嘅飯稱為「赤飯」，即以紅豆製作嘅紅色米飯（同香港嘅紅米唔一樣吖！）。以前嘅日本人普遍都相信紅色係擁有驅魔及呼喚幸運嘅力量，因此習慣喺值得慶祝嘅日子準備「赤飯」，惟文化習俗流傳至今，以漸漸演變成以「赤飯」代表幸福、好運氣等好意頭來享用。
今次，小編就會為大家介紹有關「赤飯」嘅歷史，以及邊啲喜慶場合中會出現「赤飯」等小知識。而喺文章最後部分，仲會同大家分享電飯煲「赤飯」嘅製作影片，記得要睇到尾啦 ♪
關於赤飯
赤飯歷史及由來
「赤飯」係指加入糯米、紅豆，以及紅豆煮汁所煮成嘅飯。煮好後，米飯會染上紅豆嘅紅色，所以被稱為「赤飯」。
雖然現今嘅「赤飯」材料係糯米及紅豆，但其實以前用嘅並非糯米，而係紅米。紅米係於繩文時代從中國大陸傳到日本嘅秈米（Indica品種），煮好後正好變成「赤飯」般嘅顏色。據說，平安中期散文集《枕草子》中就已經出現「赤飯」嘅雛形「小豆粥」；到咗室町時代，「赤飯」就成為喜慶場合中享用嘅食品；去到江戶時代後期，「赤飯」更普及至一般老百姓嘅生活習慣中，每逢喜慶日子時飯檯上就會出現「赤飯」。
慶祝嘅時候點解要食赤飯？
以前嘅日本人一般相信紅色有驅除邪惡、消災解厄嘅力量。再加上米飯曾經係高級食品，所以就演變出煮紅米以供奉神明嘅習俗，亦有喺不如意時祈求幸運眷顧而食「赤飯」嘅習慣。如今，一般喺慶祝場合下，求吉祥、好意頭時就會食「赤飯」。
赤飯多數會喺以下嘅慶祝場合中享用
- 「帯祝い」（束帶順產祝賀）：懷孕進入第5個月，祈求胎兒平安成長而圍上腹帶嘅儀式。
- 慶祝嬰兒出生、慶祝生日。
- 「初節句」：嬰兒出生後第一次迎接嘅「節句」。
*「節句」意思係「季節變換之際」 - 「お食い初め」（初次餵食）：祈求嬰兒今後不為食而煩惱，於嬰兒出生後第100日所舉行嘅儀式。
- 七五三：每年11月15日，會為3歲和5歲嘅男孩， 3歲和7歲嘅女孩慶祝。
- 祝賀入學、畢業、就業、成人
- 「上棟式の祝い」（上樑儀式祝賀）：上樑係指建造建築物時，於屋頂最高位置安裝「棟木」木材時嘅舉動。舉行上樑儀式祝賀係為咗向神明報告，建築物已完成上樑為止嘅工程，並表示感謝嘅同時，祈求保佑建築工程結束前嘅安全及建築物永固嘅儀式。
- 花甲祝賀（60歳）
- 古稀祝賀（70歳）
- 喜慶祝賀（77歳）
- 米壽祝賀（88歳）
- 白壽祝賀（99歳）等等
【食譜影片】赤飯食譜＆做法
以下，小編將會介紹以電飯煲去簡單製作「赤飯」嘅方法。
赤飯所需材料（4人份）
- 糯米…2.5量杯
- 紅豆或赤小豆…50g
(A)
- 酒…1湯匙
- 鹽…1茶匙
★食之前可以撒上少許黑芝麻或鹽，亦可使用喺日本超市或100yen店所購入嘅「黒ごま塩」（黑芝麻鹽）。
赤飯製作方法（4人份）
1. 準備紅豆（或赤小豆）
- 首先將紅豆50g洗乾淨、瀝幹水分。放入鍋中加入400ml水，以中火加熱。
- 水滾後調較至最細火，慢煮20分鐘。（即使水煮過程中沸水溢出，亦無需追加水量）。
- 20分鐘後試食紅豆，確認是否已煮熟。（如果煮得未夠熟嘅話，就以幾分鐘為單位，追加水煮時間，再一邊確認狀態）。
- 煮熟後熄火，連鍋放涼備用。冷卻到人體肌膚左右嘅溫度時，開火稍微烹煮，紅豆就會變得軟熟。
2. 糯米準備
- 趁著煮紅豆時，輕輕洗一下糯米，然後浸水。（浸水時間以30分鐘為標準）。
- 糯米浸水完成與以上➀步驟嘅紅豆煮汁冷卻後，將糯米放於竹簍裡瀝幹水分，再轉移到電飯煲裡，加入全部煮汁。
※因為紅豆已經過水量調整後，所以此步驟只需倒入煮汁！ - 放入全部煮汁後，先加入1湯匙酒（A調味料），加入2.5量杯嘅水。（如果電飯煲設有烹煮糯米功能嘅話，請以其指示刻度嘅水量為基準）。
- 調整好水量後，加入鹽1茶匙（A調味料），輕輕攪拌均勻。
- 最後，將紅豆放喺上面至舖滿整個範圍後，再放入電飯煲。
3. 以電飯煲烹煮赤飯
- 放入電飯煲後，即可撳掣開始煮飯。（如果電飯煲設有烹煮糯米功能嘅話，請選擇相關按鈕）。
- 赤飯煮好後，將整體從底部攪拌一下就完成。食之前可以撒上少許黑芝麻或鹽享用！
同場加映：比電飯煲更容易整嘅赤飯！
除咗以糯米及紅豆等材料自家製「赤飯」之外，仲可以喺超市或100yen店等地方，輕鬆買到「即食赤飯」或「赤飯」飯素。唔單止喺慶祝場合，仲可以作為晚餐、飯糰、或者便當等品嘗喔。
Comments