想要置身於洋溢濃厚日式風情嘅空間內，一邊大啖嘆價錢親民又好食嘅壽司，一邊體驗日本祭典氛圍&挑戰玩射擊、拋圈圈等攤位遊戲？咁就一定唔可以錯過「藏壽司」全球旗艦店1號店「藏壽司 淺草ROX店」！即刻跟住FUN! JAPAN編輯部嘅腳步，潛入「藏壽司 淺草ROX店」一探究竟，睇睇到底有咩必食必玩，不可錯過嘅精彩地方啦！
關於「藏壽司 淺草ROX店」
「藏壽司」全球旗艦店1號店「藏壽司 淺草ROX店」，已於2020年1月下旬於東京淺草開幕。店舖佔地255坪、共有272個座位，裝修由名設計師佐藤可士和監修，以「SightEating」（旅遊＋用餐）為主題理念，務求將旅遊與飲食合而為一。
療癒和風空間超吸睛！令人影到停唔到手
「藏壽司 淺草ROX店」嘅店內氛圍有別於其他迴轉壽司店。店內裝修結合日本祭典文化與壽司起源路邊攤嘅概念，檯櫈樑柱皆選用白木製作而成，而牆上更以歌川廣重浮世繪作品《東都名所 高輪二十六夜 待遊興之圖》、日本特色面具、提燈等裝飾，行入店內嘅剎那間，就有一種瞬間回到江戶時代嘅錯覺。
店內所有座墊都有舖設榻榻米（Tatami），連坐喺度都感受到濃厚嘅大和風情。
更特別嘅係，餐具、調味料等都收納喺餐檯裡面喔！大大提升客人用餐時，餐檯嘅可使用空間。
顛覆大眾對迴轉壽司店嘅想像！射擊、拋圈圈等攤位遊戲等您挑戰
「藏壽司 淺草ROX店」嘅特色係，店內設有一區名為「緣日SPACE」嘅屋台型攤位遊戲區，食客可以喺現場大玩射擊及拋圈圈等遊戲，超級過癮！每5隻空碟就可以挑戰一次抽扭蛋小遊戲，中奬者可獲得內含小禮物嘅扭蛋一粒，扭蛋裡面會隨機放入「緣日SPACE」遊戲區嘅兌換券，獲得兌換券嘅幸運兒，就可以拎去遊戲區兌換遊戲券，大玩特玩攤位遊戲！
唔識日文都唔怕雞同鴨講！「藏壽司」點餐好輕鬆
相信有唔少人都會擔心如果唔識日文，會唔會出現同店員雞同鴨講、「this、this、this」，甚至要比手畫腳等情況出現。「藏壽司 淺草ROX店」已為大家準備好提供4國語言嘅觸控螢幕平板，等大家坐定定就可以輕鬆點餐，相當方便！咁就唔怕因為唔識日文而影響到點餐流程，可以盡情地點您想食嘅菜式啦。
除咗可以使用觸控螢幕平板點餐，仲可以用智慧型手機點餐喔！掃描觸控螢幕平板上嘅QR Code後，手機就會搖身一變成為點餐工具，客人可以直接從手機落單點餐，瀏覽菜單資訊。「藏壽司 淺草ROX店」裡面亦有可以外語溝通嘅工作人員，如果有需要嘅話亦歡迎搵佢哋尋求協助喔。
必試！限定人氣菜單＆店員推薦菜單
跟住落嚟就要揭曉「藏壽司 淺草ROX店」嘅限定人氣菜單＆店員推薦菜單，大家記得要Mark低，等下個日本之旅親身去品嚐！
「藏壽司淺草ROX店」限定菜單
當中，推薦大家必點「藏壽司」全球旗艦店嘅限定菜單，係一般「藏壽司」店鋪食唔到㗎。下面就簡單為大家介紹有邊幾款限定美食啦～
黃金酥脆卷（264日圓）
包住青瓜及蛋黃醬鮮蝦嘅壽司卷上，淋上香味醬汁及甜醬汁，撒上啱啱炸好嘅麵包粉，望落新鮮誘人。
紅龍卷（264日圓）
包住青瓜及蛋黃醬鮮蝦嘅壽司卷上，放上吞拿魚刺身，再撒上天婦羅炸渣、甜醬汁、香味醬汁，相當有口感。
熟蝦老虎卷（264日圓）
放上成隻新鮮炸好嘅炸蝦天婦羅，入口鬆脆又美味。
另外，小編喺採訪時仲問咗PR負責人辻先生「藏壽司」前三名嘅人氣菜式，亦順帶問埋辻先生本人最愛嘅前三名菜式，歡迎各位有選擇困難症嘅人參考喔！
「藏壽司」前三名人氣菜式
- 究極熟成 吞拿魚
- 三文魚Toro
- 小鰤魚
「藏壽司」工作年資長達25年嘅辻先生最愛排行榜
- 小鰤魚
- 究極熟成 醃漬吞拿魚
- 生三文魚
同場加映：辻先生其他推薦菜單：
- 特製茶碗蒸
- 芝麻香擔擔麵
- 粟米炸什錦
- 意式Tiramisu
去到「藏壽司 淺草ROX店」，除咗可以置身於充滿和風色彩嘅空間裡大啖嘆壽司，仲可以體驗日本祭典般熱鬧氛圍，日後若有機會推薦大家親身前往「藏壽司 淺草ROX店」體驗一番，等您嘅日本之旅更加FUN！
店舖資訊
- 店舖名：藏壽司淺草ROX店
- 地址：東京都台東區淺草1-25-15 淺草ROX 4樓
- 交通：筑波快線 淺草站 徒歩2分鐘、地下鐵銀座線 田原町站 徒歩6分鐘
- 營業時間：11:00～23:00
- https://www.kurasushi.co.jp/zhb/
Comments