歡迎收睇「〇〇活」專欄系列－一個同大家分享日本匪夷所思嘅文化與習慣嘅連載專欄。今次要講嘅係，同日本小學生書包「ランドセル（ra-n-do-se-ru）」（源自荷蘭文ransel）相關嘅詞語「ラン活（ra-n-ka-tsu）」。喺日本，對於父母和祖父母嚟講買書包畀小朋友係一件意義重大、就好似嫁妝一樣慎重且極具特別含義嘅舉動。點解書包咁重要？睇完呢篇文章您就會明白！
何謂日本小學生書包「ランドセル」？
首先，從「ランドセル」書包嘅基礎知識開始介紹。
用足6年都唔爛！相當堅固嘅「ランドセル」書包
即使唔係日本人，相信唔少人都有見過圖中呢種日本小學生書包「ランドセル」。呢種書包基本上一用就係用足6年，成個小學生涯都係揹住佢去返學，因此對其堅固程度要求非常高，大部分「ランドセル」書包都係牛皮製作、質感好，揹起身相當舒服。由於日日返學都要放一堆教科書及筆記用具响裡面，因此較為輕身兼唔會造成小朋友身體負擔嘅形狀設計尤其重要。
日本小學生書包「ランドセル」歷史
「ランドセル」書包起源於明治18年（1885年），被學習院（*1）開始使用「返學用背囊」而展開其發展歷史。上圖係學習院中等科（約相當於現時初中階段）學生，喺明治時代時所使用嘅返學書包。其外觀望落同而家嘅「ランドセル」書包無咩分別，都係呈四方形狀。
「ランドセル」嘅語源係荷蘭文「ransel（ランセル）」，意思係背囊。因為日本從江戶時代開始與荷蘭進行貿易，所以有唔少以荷蘭文為語源嘅日文。
*1: 由學校法人學習院營運嘅私立學校，涵蓋年齡層包含幼稚園至大學。亦作為日本皇族就讀嘅學校而聞名。
日本小學生書包「ランドセル」價格
根據「ランドセル工業會」調查顯示，「ランドセル」書包嘅平均價格有逐年上升趨勢。2000年平均價格為3萬5000日圓，去到2021年，平均價格已升至5萬5000日圓。
可能您會覺得明明只係小學生返學用嘅書包，埋單要成5萬日圓以上嘅價格真係好難以置信。但係喺價格增長嘅背後，其實隱藏著製造商不斷致力改良，追求更輕量化與提高堅固度，務求讓書包嘅性能變得更高等原因。與以前相比，喺書包設計方面亦有所要求等背景務，亦成為近幾年價格上升嘅原由。
日本獨有文化習慣－「ラン活」
「ラン活」係「ランドセル活動」嘅縮寫，中文可以理解成「書包活動」，係為咗揀書包而去百貨公司、上網搜尋、拎商品目錄參考等行為。
「ラン活」係由小朋友小學入學前1年就要開始，您可能會覺得「吓！？要咁早揀定嘅咩，喺開學禮之前買咪得囉」。少年，你太年輕了！因為設計受歡迎嘅書包會賣得好快，為咗喺賣完之前買到最好最心儀嘅書包，從1年前開始就有必要進行「ラン活」。
日本嘅祖父母，一般會將「ランドセル」書包作為孫仔、孫女嘅入學賀禮。每逢日本黃金周（5月）及盂蘭盆節（8月）等長假期，好多小朋友都會去祖父母屋企玩，而祖父母就會趁呢個時候帶孫仔、孫女去百貨公司買「ランドセル」書包。
多樣化嘅日本小學生書包「ランドセル」
大約20年前，日本小學生書包「ランドセル」嘅顏色只有黑色及紅色兩種。男仔一般用黑色、女仔一般用紅色，但係最近顏色及設計就變得相當多樣化。
圖片提供：Tsuchiya Kaban Co., LTD
1965年創業嘅東京「ランドセル」製造商土屋鞄製造所銷售嘅「ランドセル」書包，竟然有成約50種顏色！咁色彩繽紛，淨係望都令人賞心悅目。
近年來，隨著無性別化嘅潮流趨勢，與性別無關嘅「ランドセル」書包亦隨之增加。
此外，與品牌合作嘅「ランドセル」書包亦不斷增加。上圖係與日本人氣品牌「mina perhonen（ミナ ペルホネン）」合作推出嘅「ランドセル」書包。 雖然價格落喺8萬日圓以上，但係因為土屋鞄會提供6年免費維修服務，所以喺小學6年生涯裡面，如果書包有損壞嘅話，都享有免費維修嘅服務喔。
因為「ランドセル」書包嘅設計變得多樣化，選擇項目亦有所增加，所以喺選擇購買時嘅所需時間，亦變得比以前更加長。文章睇到呢度，大家應該都理解到，點解要從入學前1年，就要開始進行「ラン活」嘅理由吧？
點解「ランドセル」書包咁特別？
或者，有人會覺得好奇怪，點解日本人對小學生用嘅書包咁講究。
日本人認為自己嘅小朋友，或孫仔、孫女即將入學成為小學生一事尤其重要。小朋友喺不知不覺間，從嬰兒長大成為小學生…總括而言，小朋友入學成為小學生呢個轉變，代表著小朋友成長，開始新生活新階段嘅象徵。因此象徵著小學入學嘅「ランドセル」書包，亦係意義非凡嘅存在。
因為「ランドセル」書包係陪伴著小朋友6年嘅小學生涯，所以好多人認為「ランドセル」書包=充滿6年嘅回憶。因此，就算小學畢業後，有人會利用「ランドセル」書包嘅皮革材料，去製作迷你版「ランドセル」書包，作為美好回憶紀念品，加以保管收藏。
不如您都揹返個「ランドセル」書包？
因為小朋友要用足6年，所以「ランドセル」書包必須輕量堅固。換句話說，每一個都係非常高性能嘅背囊。只專屬小朋友使用嘅話，未免實在太可惜！有見及此，近年亦有推出大人版嘅ランドセル喔。
今次呢個日本匪夷所思嘅文化與習慣專欄，「ラン活」篇，唔知大家又有咩意見？又會唔會想入手返個？不妨留言話畀小編知！
Comments