島根縣位於日本中國地區（山陰、山陽地區），緊鄰日本海，亦係結緣聖地出雲大社所在地。島根縣面對日本海，擁有海洋、河川、山脈等等豐富大自然資源，縣內時至今日仍然存在唔少只有喺當地先至可以品嘗得到嘅經典美食。今次，FUN! JAPAN編集部就要同大家介紹島根必食嘅5大當地特色美食！
出雲善哉：島根縣出雲市著名經典美食！
「出雲ぜんざい」漢字又寫作「出雲善哉」（善哉日文發音：ZENZAI），係出雲地區代表著吉祥、好意頭嘅美食。「出雲ぜんざい」係源自於每年舊曆10月出雲地區都會舉行嘅「神在祭」，祭並期間當地人民會使用「神在餅（JINZAIMOCHI）」作為貢品，其後讓參拜者享用，成為「出雲ぜんざい」嘅由來。（順帶一提，出雲方言中「じんざい（JINZAI）」為「ずんざい（ZUNZAI）」，進而演變成「ぜんざい（ZENZAI）」發音）。
基本上「出雲ぜんざい」係將「白玉」（無包餡嘅糯米湯圓），放入用紅豆烹煮而成嘅紅豆湯後所享用嘅日式美食，有少少似香港嘅紅豆沙加湯圓。不過，而家嘅「出雲ぜんざい」已演變出多種食法，除咗會將烤好嘅日式年糕代替「白玉」放入紅豆湯、變成「縁結びぜんざい」（結緣善哉）之外，仲會加入雪糕，或放入和菓子「最中」裡面成為其內餡等等。有機會去出雲嘅話，又點可以錯過呢款結緣美食呢。
編輯部推薦大家可以去唔同店舖品嘗多款「出雲ぜんざい」嘅不同食法。當中，小編精選出以下嘅名店菜單畀大家參考一下喔。首先係「日本ぜんざい学会 壱号店」嘅 「縁結びぜんざい」；另外「くつろぎ和かふぇ 甘右衛門」嘅「出雲ぜんざい」亦相當受歡迎，將大國主大神模樣嘅最中放入紅豆湯而成嘅「出雲ぜんざい」，唔單止好味道，賣相仲相當可愛喔。
出雲蕎麥麵：日本三大蕎麥面之一！
島根縣「出雲蕎麥麵」與長野縣「戶隱蕎麥麵」、岩手縣「碗子蕎麥麵」並列為日本三大蕎麥麵。當中，出雲蕎麥麵最大嘅特色係並無去除蕎麥殼，直接將蕎麥殼碾磨入蕎麥麵粉中製作麵條，因此所製作出嘅麵條顏色較深、韌性亦較強，並帶有天然嘅蕎麥清香與風味，令人一試難忘。
講到出雲蕎麥麵，最為常見嘅就係「釜揚蕎麥麵」及「割子蕎麥麵」兩種食法。「割子蕎麥麵」係一種冷麵，「釜揚蕎麥麵」則係一種熱湯麵。如果想品嘗蕎麥自然風味嘅話，推薦「釜揚蕎麥麵」；如果想品嘗韌度較強嘅麵條，就揀「割子蕎麥麵」吧。
出雲蕎麥麵嘅食法與一般蕎麥麵亦有所不同。一般蕎麥麵係將每一口蕎麥麵挾入醬汁碗裡，沾著醬汁去享用，而出雲蕎麥麵係可以隨著個人喜好調整濃淡，將醬汁淋到蕎麥麵上享用。
另外，「割子蕎麥麵」嘅食法亦相當獨特。「割子蕎麥麵」係將蕎麥麵盛裝於3層嘅圓形容器中，於第1層淋上醬汁開始享用。食完第1層之後，將剩低嘅醬汁倒到下1層，如此類推順序享用。 下個出雲之旅，不妨去親身體驗出雲蕎麥麵呢個咁特別嘅食法！推薦您去出雲大社附近嘅「そば処 かねや」，以及出雲市內嘅「献上そば羽根屋本店」。
島根和牛：於島根享受當地最高級和牛！
島根嘅「いずも和牛」（出雲和牛）、「松永牛」、以及「隱岐牛」被合稱為「しまね和牛」（島根和牛）。出雲地區嘅山區自古以來製鐵行業盛行，由於需要以牛隻作為鐵材嘅運輸手段，所以飼養咗唔少牛牛。近年畜牧業家逐漸减少， 島根和牛因此成為數量稀有嘅美食，試問一場去到島根嘅您，又點可以唔試一試島根和牛嘅好滋味呢？
相信講起和牛，您成日都會聽到神戶牛、松阪牛等等嘅和牛，相比起來島根和牛嘅知名度可能唔算太高，但其實島根和牛曾經兩次獲得日本全國規模嘅和牛品評會中，最高榮譽嘅「內閣總理大臣」獎喔。島根和牛嘅特色，除咗肉質顏色鮮豔、擁有細緻霜降雪花，更具有濃郁風味，入口軟熟而不油膩。
島根和牛無論係用嚟整牛扒、抑或係燒肉、壽喜燒、涮涮鍋、英式燒牛肉（roast beef）等等嘅美食都相當合適。島根和牛口感柔軟均勻，入口即溶，加上牛肉嘅香味於口腔中擴散好一段時間，令人回味無窮！想親身品嘗島根和牛嘅話，推薦燒肉店「味一」、BBQ HOUSE「シャトー弥山」、以及創業30年嘅老字號牛扒屋「手作り厨房 みみてい」。
島根蜆料理：漁穫量及產量都係日本第一！
島根縣嘅蜆漁獲量與生產量都係日本全國第一，因此亦作為名產地而聞名。從河裡流入擁有豐富礦物質嘅淡水，與來自日本海嘅海水混合成半鹹水成就出營養豐富環境下，難怪所孕育出嘅蜆大粒又香醇，相當好味道。
雖然全年都可以捕獲得到蜆，但係講到當季時期，則係因產卵而肉厚嘅7月前後，以及1至3月嘅冬季漁獲時期。推薦嘅蜆美食有酒蒸，以及喺島根縣民嘅飯檯上，成日都出現嘅蜆肉味噌湯和蜆肉飯等等嘅經典菜式。推薦店舖如下，從出雲站徒步範圍內即可抵達嘅商業街內，名為「こ根っこや」嘅居酒屋，以及提供蜆肉蓋飯以及蜆肉湯嘅日式餐廳「山里波」。
蒸壽司：尚未為人所知嘅松江名產？
1887年創業、位於松江市嘅壽司老舖「浪花壽司」從以前開始就會於寒冷冬天期間，販賣一款被蒸得熱騰騰嘅限定菜式—「蒸壽司」。隨著蒸壽司備受好評，其他店家都紛紛於冬天推出蒸壽司，成為松江一帶廣受喜愛嘅美食。而家唔單止係冬天，一年四季都可以品嘗得到。
蒸壽司有別於一般壽司，係將竹筍與香菇混合於醋飯裡，然後放入蒸籠，再喺上面放上蝦、海鰻、牛肉、栗子、魚板等配料冚蓋蒸至入味嘅美食。使用木製嘅蒸籠蒸煮，讓米飯和食材產生鬆軟柔嫩嘅口感。
蒸壽司係當地被愛戴超過百年以上嘅傳統美食，如果有機會去松江嘅話，絕不能錯過「浪花壽司」嘅「元祖蒸壽司」喔。
Comments