相信唔少人對於日本東京嘅印象，係一個物價相當高嘅城市吧！事實上無講錯－根據總務省統計（2020年）資料顯示，東京物價水平的確係47個都道府縣裡面最高。（順帶一提，第二位係神奈川縣，第三位係京都府）
生活喺東京好似樣樣都貴…唯獨業務超市卻係例外！今次小編就會帶大家親身直擊以「大件夾抵食」廣受大眾歡迎嘅超級市場－業務超市，為大家進行詳細報導。
何謂業務超市？
FUN! JAPAN編輯部今次嚟到採訪嘅店舖係位於東京台東區嘅「業務超市 上野廣小路店」，店舖距離上野公園同湯島天滿宮徒步範圍內，從淺草寺搭電車再步行約10分鐘即達。去東京旅遊嘅外國遊客要嚟到非常方便，地理位置相當優良。
行入店舖…立即會發現商品陳列方式有別於一般超市。多款商品擺放到滿一滿，幾乎佔據著成個超市嘅空間感！仔細一睇，樣樣食品更加係超低價，令人相當興奮。
喺介紹商品之前，首先講解一下「業務超市」名稱由來。
喺日本，專門提向餐廳等餐飲店提供嘅大容量食品被稱為「業務用（ぎょうむよう）」。業務超市裡面，有唔少「業務用」尺寸嘅大容量包裝商品，唔單止係經營飲食店等嘅業界人士可以購買，亦歡迎一般客人入內選購，所以有唔少人會去業務超市，入手一般超市買唔到嘅大容量食品。
業務超市嘅人氣商品係？
跟著落嚟嘅時間，小編就要為大家介紹業務超市嘅多款商品。
首先，一講到業務超市，就離唔開以下呢樣人氣商品－紙盒包裝甜品！紙盒包裝甜品屬於業務超市原創商品，喺業務超市先至可以買得到。口味包括布甸、咖啡啫喱、意式奶凍、杏仁豆腐、水羊羹等多個唔同種類，任君選擇。
紙盒包裝嘅布甸容量竟然有成1kg！相當於7～8人嘅份量。拎起手會感覺到重量十足…。
價格為未含消費稅258日圓。 （※商品價格會因時期和店鋪而異。） 一般嚟講，以一人份為例，日本布甸價格至少要100日圓，所以7~8人份量竟然賣呢個價錢，真係平到您唔信。
從紙盒包裝倒出布甸後，就如上圖般分量十足。
紙盒喺日本通常被用作裝牛奶嘅容器，業務超市則有效使用自家工場牛奶設備，以牛奶紙盒包裝盛裝甜品，從而有效節省成本降低銷售價格。
仲未完！多款大容量＆實惠食品源源不絕
講完甜品之後，小編會介紹一下、晚餐時段可以大派用場嘅食品。
左圖「上州高原雞 若雞雞鎚IQF（上州高原どり 若どり手羽もと IQF）」係日本產急凍雞肉1kg，售價只需518日圓。客人可以用嚟整炸雞、燉菜等多種美食，保證就算日日食都唔會覺得厭。
右圖係日本急凍讚岐烏冬。1人份（200g）X5，價格只需157日圓！因為係已經事先煮過一次再經過急凍處理，所以食前用微波爐加熱4分鐘，或者用熱水煮90秒就可以享用。
※商品價格因時期及店鋪而異。
啱晒用嚟當飯後甜品嘅「御手洗糰子風迷你日式年糕（みたらしもちっこ）」（308日圓）亦係業務超市原創商品之一。日式年糕細細件，一口大小裡面加入咗大量御手洗糰子醬（使用砂糖與醬油製成嘅調味汁），外層煙靭、內裡幼滑香濃，令人食到停唔到口！
除咗可以直接食，亦可以配搭雪糕享用。份量多達1kg，啱晒盡情地試勻各種方法去慢慢嘆喔。
※商品價格因時期及店鋪而異。
想懶得就懶，唔想落廚、尋找更簡單更慳水慳力嘅食品？誠意推薦您呢樽「牛肉臊（牛そぼろ）」。
肉臊、飯素、生雞蛋…日本人最鍾意喺白飯上面加上各式配料。簡單好味又經濟實惠，特別適合用嚟做早餐喔。
牛肉臊屬於味噌口味，兼帶有微辣味道，無論係放喺白飯上面餸飯食，抑或係用嚟做飯糰配料都相當美味，使用方法非常多元化。
遇上從外國入口嘅罕見食品？
業務超市受歡迎嘅理由除咗大容量嘅原創商品之外，可以搵得到從外國入口嘅食品亦係特色之一。
採訪期間遇上從台灣入口嘅「葱抓餅（薄焼き餅 青ねぎ入り）」。使用麵粉製作嘅麵團裡面加入青葱與芝麻嘅葱抓餅，只需用平底鍋煎一煎，就可以輕鬆享受外脆內軟嘅葱抓餅，感受台灣真正美食好滋味。
唔少人為咗尋找其他超市無販賣、罕見嘅外國美食，都會特登去業務超市尋寶喔。
清真食品（Halal）亦非常充實
業務超市亦有販賣清真食品（Halal）。店內到處都放著印有清真標籤嘅食品，讓穆斯林可以安心喺業務超市享受購物樂趣。
總值2,000日圓嘅食品，足夠生活一星期？
業務超市販賣著大容量食品與罕見嘅外國食品，喺購物嘅時候，感覺就好似尋寶一樣。
去業務超市採訪呢一日，小編買咗以下6樣商品。
- 「 吉士布甸（カスタードプリン）」1kg
- 「上州高原雞 若雞雞鎚IQF （上州高原どり 若どり手羽もとIQF）」1kg
- 「急凍讃岐烏冬（冷凍讃岐うどん）」 1kg
- 「御手洗糰子風迷你日式年糕（みたらしもちっこ）」 1kg
- 「牛肉臊（牛そぼろ）」 160g
- 「葱抓餅（薄焼き餅 青ねぎ入り）」5塊裝
埋單一共係幾多錢呢…？
6樣商品＋2個購物袋，含消費稅總共1,973日圓！
如果係一個人住嘅話，以上食品絕對夠食一星期！業務超市價格夠晒經濟實惠，對於生活喺物價水平較高嘅東京居民嚟講，可以稱得上係救世主喔。
業務超市喺全國有964間店舖（截到2022年3月底為止），東京都內有70間以上。下次去日本旅遊嘅時候，順便去埋附近嘅業務超市行個圈吧！
※商品價格因時期和店鋪而異。
採訪店鋪：業務超市上野廣小路店
- 地址：東京都台東區上野2-3-4
- 營業時間：09：00～22：00
- 交通：
東京Metro地鐵銀座線 上野廣小路站徒步3分鐘
東京Metro地鐵千代田線 湯島站徒步3分鐘
都營大江戶線上野御徒町站徒步3分鐘
JR山手線・京濱東北線御徒町站徒步4分鐘 - 官網：https://www.gyomusuper.jp/index.php
Comments