秋田犬呢個名，大家細細個就聽過呢個名啦！秋田犬係原產自日本嘅大型犬，性格溫和、對主人忠誠不二，人車人愛車見車載，亦因為「忠犬八公」嘅故事聞名世界，喺歐美各地都可以見到秋田犬嘅蹤影。今次，就等FUN! JAPAN編輯部為您介紹秋田犬，以及分享可以與秋田犬見面嘅地方！
關於天然紀念物「秋田犬」
現存日本產嘅日本犬品種共有13種，當中6種被指定為天然紀念物，包括柴犬、甲斐犬（山梨）、紀州犬（三重、和歌山）、四國犬（四國地區）、北海道犬（北海道）以及秋田犬（秋田），當中秋田犬係唯一嘅大型犬。
秋田犬嘅祖先係被稱為「秋田マタギ犬」嘅獵犬，體型比較細小，樣貌亦完全唔同。江戶時期，秋田流行鬥犬，位於北邊嘅大館、能代地區致力於培育善於爭鬥嘅強壯犬隻並稱之為「大館犬」，被視為現今秋田犬嘅源頭。
秋田犬喺明治末期一度面臨消失危機。受當時西方犬隻品種開始流行、東西犬隻互相交配繁殖等原因，純種秋田犬逐漸消失。直到大正年代之後，純種秋田犬先至再度備受重視。昭和初期，大館市成立「秋田犬保存會」至今，致力於秋田犬嘅延續活動。
秋田犬？柴犬？傻傻分不清楚
秋田犬與柴犬因為品種顏色類似，都有茶色（赤色）、白毛、豎耳、捲尾，因此有唔少人會將兩者混為一談，甚至以為係同一品種。雖然秋田犬與柴犬經常被誤認，但其實柴犬比秋田犬更為常見，當唔少人遇上秋田犬時，都會誤以為係大型柴犬喔。
但係將秋田犬與柴犬擺埋一齊嘅話（上圖），就即刻睇得出兩者體型差異，秋田犬無論係身高或體重足足都為柴犬嘅一倍以上！
再仔細觀察，就伯會發現兩者外貌亦有所不同。雖然一樣係豎耳，但秋田犬耳仔呈三角形、眼睛偏下垂、五官比較集中靠近中央；柴犬耳仔比較細長，眼睛偏向上翹，五官分佈得比較平均。整體望落，秋田犬面部表情穩重溫馴，柴犬則比較古靈精怪。
另外，秋田犬細細個嘅時候，耳仔係往下垂，隨著長大先漸漸成為豎耳，呢個亦係分別秋田犬與柴犬幼犬嘅最簡單方法。
秋田犬顏色與種類
秋田犬毛色有四種，分別係赤色、虎紋、白色以及胡麻色。茶色係最常見，亦係最容易被誤認為柴犬嘅顏色；虎斑色以黑白交雜為基礎，當中又可以細分為赤虎斑、黑虎斑與霜降虎斑；白色係唯一嘅單色系，但數量好少，由於天生色素少嘅關係，鼻會呈現粉紅色；而胡麻色嘅秋田犬如今幾乎不見蹤影，係傳說中最稀有嘅顏色。
秋田犬雖然普遍係短毛，但亦會有長毛秋田犬嘅出現，例如曾經擔任青森縣鰺澤站觀光站長嘅WASAO（2020年去世），因罕見白色長毛與主人之間嘅感人故事一舉成名，甚至被改編為同名電影《WASAO》。
根據秋田犬保存會規定，嚴格嚟講長毛秋田犬唔算係標準秋田犬，但隨著WASAO知名度增加，越嚟越多人注意到長毛秋田犬嘅獨有魅力。惟長毛秋田犬數量非常少，可以話係遇不可求。
通常大家討論嘅秋田犬都係「日系秋田犬」，其實喺歐美仲有「美系秋田犬」。於第二次世界大戰結束時，有唔少秋田犬被帶去美國，成為美系秋田犬嘅祖先。現時美系秋田犬與日系秋田犬外表差異極大，已自成獨立品種。
世界知名秋田犬「忠犬八公」
秋田犬點解成為世界知名嘅狗狗？原因就係「忠犬八公」。當年八公每日會去澀谷站迎接主人上野博士放工，即使上野博士因為突然腦出血不幸身亡後，八公依舊每日都會去澀谷站等待主人出現，直到最後死去，一等就等咗10年，於1923年3月重回上野博士嘅懷抱。
八公等候主人嘅故事被撰寫成文章並寄稿至報社後，「忠犬八公」一躍成名，名聲傳遍各地。賺人熱淚嘅真實故事被翻拍成電影，甚至仲有美國版，成為歐美人熱愛秋田犬嘅原因。八公過去等待主人嘅澀谷站設有一座八公銅像，亦成為澀谷當地經典地標。
到秋田犬發源地親身與秋田犬見面！
秋田犬發源地係秋田縣大館市，亦係忠犬八公嘅誕生地。雖然係秋田犬聖地，但並非路上隨處都有秋田犬，需要去特定地點先至見得到秋田犬喔。
秋田犬之里
照片提供：秋田縣觀光聯盟
位於JR大館站前方嘅「秋田犬之里」，係大館市為介紹秋田犬所設立嘅設施，館外亦設有八公銅像。館內除咗有秋田犬介紹，仲有大型「秋田犬展示室」，可以透過一大片落地玻璃望見秋田犬嘅一舉一動，員工仲會引導狗狗去到玻璃旁邊，等到訪人士可以比較容易影相（記得唔好開閃光燈！）。幸運的話，仲有機會偶遇上狗狗出門散步嘅興奮樣喔。
景點資訊
- 名稱：秋田犬之里
- 地點：秋田縣大館市御成町１丁目13番１號
- 交通方式：JR大館站徒步即達
- 營業時間：09:00〜17:00（秋田犬展示室 09:30〜16:45）
- 定休日：12/31、1/1，秋田犬展示室每週一休息（遇假日會順延至隔日）
秋田犬會館
「秋田犬會館」係秋田犬保存會嘅總部，館前同樣設有一座八公銅像，又因為銅像望著出生地嘅方位而被命名為「望鄉的八公像」。一樓嘅保存會辦公室平日會有兩隻秋田犬常駐迎接到訪人士，間中亦會有秋田幼犬出現。三樓為「秋田犬博物館」，可以喺度了解得到秋田犬嘅相關資訊。
景點資訊
- 名稱：秋田犬會館
- 地點：秋田縣大館市三之丸13-1
- 交通方式：JR大館站步行約15分鐘
- 營業時間：09:00〜16:00
- 定休日：12月28日～1月3日，8月13日下午休館
- 門票：成人200日圓，小童100日圓
FURUSAWA溫泉
尋找秋田犬之旅最推薦地點「FURUSAWA溫泉」係一個散發著溫馨人情味嘅溫泉旅館，麻雀雖小但五臟俱全，重點係有兩隻勁得意嘅秋田犬「溫」與「華」，每日喺度坐鎮等待客人大駕光臨。秋田犬「溫」與「華」係兩母女，媽媽「溫」長相秀氣，女兒「華」擁有一副經典秋田犬萌呆樣。強烈建議喺度住返晚，享受美食溫泉，與秋田犬共聚一日喔。
景點資訊
- 名稱：FURUSAWA溫泉
- 地點：秋田縣大館市字新綱27
- 交通方式：JR大館站搭的士約7分鐘
- 定休日：每週二
Comments