日本梅雨季雖然潮濕，但又令人充滿期待，因為呢個時候正正係繡球花綻放嘅季節！雨落得越多，繡球花就越鮮豔動人，今日就等我哋齊齊去認識有關繡球花嘅二三事吧～
紫陽花？繡球花？
大家所熟悉嘅「繡球花」擁有多個叫法，日本稱之為「紫陽花（あじさい）」，另外仲有「集真藍」（意：藍色嘅集合體）、「七變化」（意：顏色變化多端）、「手毬花」（意：外型飽滿如手毬）等名稱。
繡球花點解有多種顏色？
繡球花可以話係「花界變色龍」，因為繡球花花色會隨著土壤酸鹼度而變化，即使係同一朵花所呈現嘅顏色亦會有所不同。若果土壤成份偏酸，花色會呈藍色；土壤偏鹼，花色會偏紅色；土壤接近中性嘅話就會呈紫色。日本街上非盆栽種植嘅繡球花多數係藍色，就係因為擁有多座火山嘅日本土壤本身就比較偏酸喔。
不過隨著培育技術日益成熟，市面上亦出現唔少無受到土壤酸鹼值影響嘅品種，甚至亦有純白色嘅繡球花出現。
日本繡球花與西洋繡球花
之所以稱作「繡球花」，正因為花形飽滿、望落好似繡球一樣，但其實如今為人熟悉嘅繡球花並非誕生於日本，而係嚟自歐洲，係經歐洲人改良日本原產繡球花「額繡球花」而成嘅品種，然後再傳入日本而大受歡迎。
日本原產嘅「額繡球花（ガクアジサイ）」，只有外圍有一圈裝飾花，而呢一圈有如花瓣部分嘅裝飾花其實係花萼，正如其名只係裝飾並無生育功能；被裝飾花包圍於中心嘅「兩性花」細細朵卻具備雄蕊雌蕊，就可以自行授粉完成生殖。
「毒」得美麗
繡球花屬有毒植物，因品種不同，毒性亦會有差異。千祈唔好覺得繡球花望落咁靚就無害，記得繡球花絕對唔可以誤食，亦唔好拎佢去為餐飲美食裝飾，係好危險㗎。
繡球花手水由來
盛行日本全國嘅「花手水」，係指於神社寺院嘅手水舍或裝滿水嘅容器中擺上鮮豔花朵，形成賞心悅目嘅畫面。一般相信，全國最先擺出花手水嘅係位於京都嘅楊谷寺。
其實，「花手水」原本係指於野外難以有水源嘅地方，以花草露水代水清潔雙手嘅意思，楊谷寺則直接用鮮花裝飾手水舍。通常花手水嘅主題係以繡球花為主，因為繡球花特性為降雨量越多就綻放得得燦爛，加上極具份量嘅吸睛外表，簡簡單單就可以變成視覺豐富嘅擺設。
前文提到繡球花有毒，咁放入繡球花嘅花手水又會唔會有毒呢？據稱因為手水舍嘅水會不停流動，因悔毒素會不斷被稀釋，而且各社寺都會另外準備水源，供參拜者使用，所以唔駛擔心喔。
神社寺院點解多數都會種繡球花？
點解咁多神社寺廟都有種繡球花？據聞係因爲神社寺院多數位於山區，先天坐擁繡球花喜愛日照少、陰涼嘅自然環境，加上繡球花本身容易種植，有部分地方甚至會直接將繡球花作為步道邊界，既迷人又省時省力。
另外仲有一個講法，係因為喺過去醫療水平仍處於比較落後嘅年代時，繡球花綻放嘅梅雨季正正係疾病容易流行嘅時期。當時為咗悼念因病逝去嘅死者，就會喺埋葬地栽種繡球花表示哀悼，所以造就成繡球花社寺嘅誕生。
繡球花推薦景點
喺日本多個地方都可以見到繡球花嘅芳蹤，甚至街邊馬路一旁都可以遇上一大叢繡球花聚集，簡直係「睇花易過借火」（笑）。全國亦有唔少以繡球花聞名嘅神社寺院，例如鎌倉明月院、京都三室戶寺等，不過要入到社寺賞花，少不免要畀入場費，以下就介紹幾個無需門票就可以好好賞花嘅景點。
東京：飛鳥山公園
與上野公園同為日本最早公園「飛鳥山公園」，因德川第八代將軍德川吉宗喺度種植櫻花而成為賞櫻熱門景點，但其實仲有條「飛鳥小徑」都係賞花聖地。長約350米嘅小徑內種有約10種、約1,300棵繡球花，加上小徑地勢有高有低，遊客唔單止可以非常近距離欣賞繡球花，仲可以從下仰望繡球花，體驗繡球花多角度不一樣的美！加上小徑就喺JR鐵道旁邊，電車與繡球花同框嘅畫面自然成為必影構圖!
景點資訊
- 名稱：飛鳥山公園
- 地點：東京都北區王子1-1-3
- 交通方式：JR京濱東北線王子站南口步行1分鐘
東京：台場
擁有多個商業設施嘅台場其實亦有滿滿繡球花等著大家朝聖。除咗百合海鷗線青海站南口「水之廣場公園」內有一大片繡球花海，另一邊廂「Symbol Promenade Park 」亦有被繡球花包圍著樓梯兩旁嘅繡球花樓梯步道，別有一番滋味，不妨出發一個賞花兼購物嘅行程之旅吧。
景點資訊
- 名稱：水之廣場公園
- 地點：東京都江東區青海1、2丁目／有明3丁目
- 交通方式：百合海鷗線青海站南口出來即可抵達
景點資訊
- 名稱：Symbol Promenade Park（シンボルプロムナード公園）
- 地點：東京都港區台場1・2丁目、東京都江東區青海1･2丁目、東京都江東區有明2･3丁目
- 交通方式：百合海鷗線台場海濱公園站或東京Big Sight站落車
大阪：山田池公園
大阪枚方市「山田池公園」內嘅山田池歷史可追溯至1,200年前，如今與附近綠地共同規劃成廣大公園。園內分成水生花園、紅葉谷、花木園、展望廣場等16個區域。識睇一定係睇山田池公園內由繡球花配搭林木而成嘅自然靚景！
景點資訊
- 名稱：山田池公園
- 地點：大阪府枚方市山田池公園1-1
- 交通方式：JR學研都市線藤阪站出口歩行10分鐘
Comments