日本最近掀起一股加價潮，呢排每次去襯超市都會忍唔住內心吶喊「好貴喔！樣樣都好貴喔！」。無論係零食、杯麵等等食品都紛紛加入加價行列，例如上圖就係最近加價食品嘅部分例子，當中相信有唔少香港讀者都熟悉嘅商品吧！
加價潮牽涉領域甚廣，譬如地產方面，首都圈（東京、千葉、神奈川、埼玉）嘅新建公寓平均售價（2021年度）就創下過去最高（3,660萬日圓）嘅記錄；另外，東京交通中不可或缺嘅電車票價亦被調高，好似JR東日本就預計從2023年3月左右開始，包括山手線在內嘅部分線路票價將提高10日圓。
食品類、電車票價加價等情況，對於遊日外國人嚟講亦有所影響。究竟點樣可以令您停留喺日本嘅時間，慳得更精明更簡單？以下將會分享日本人自身嘅慳錢經歷，如何喺物價高企嘅東京日常生活中慳得輕鬆又自在嘅簡單小貼士～
日本人慳買餸錢大法！最愛自家種「豆苗」~
豆苗（とうみょう）係唔少精明日本人慳買餸錢嘅人氣法寶之一。從豌豆中發芽成長嘅豆苗唔止味道清爽、咬落爽脆，仲適合各種烹煮方式，無論係用嚟炒，抑或用嚟煮湯都相當好味道，係好食又健康嘅食材。
重點係，豆苗喺超市售價只係100日圓左右！除咗夠平，豆苗仲有一個特色，就係…
可以將豆莖切落嚟，進行自家種豆苗！
日本超市所購買嘅豆苗，可以將豆莖切落嚟之後，將根部養喺水裡面。置放於陽光照射處後，就會重新生長出豆苗。種植方式相當簡單，只需要準備好水與容器，就算係毫無栽種植物知識嘅小編都可以種出鮮嫩豆苗喔！等豆苗快高長大之後，就可以剪落嚟烹調食用。據聞日本食品加價潮連帶引起購買豆苗嘅人有所增加，超市亦有賣清光嘅情况出現。
正所謂「慳得一蚊得一蚊」，打算喺日本逗留一段長時間嘅話，記得要試試自家種「豆苗」慳錢法。另外，反覆種植同一豆苗嘅話，會生出黴菌，所以要注意豆苗只可以重覆收成2次喔。
慳錢又健康！只係2～3個站距離嘅話就用雙腳代替電車吧～
喺東京生活嘅小編經常實踐嘅慳錢方法，就係用「11號巴士」－行路去代替電車。
東京電車普遍站與站之間距離都非常近，成日搭唔夠2分鐘就到下一個站。例如，從山手線新宿站搭到去代代木站，如果用步行距離去計算嘅話，只需10分鐘左右嘅路程。從代代木站行去原宿站嘅話，只需20分鐘左右嘅路程。當您聽到20分鐘可能會覺得有啲遠，但係從代代木站行到去原宿站嘅路途，會經過東京都市綠洲之一嘅明治神宮，喺動人景致包圍下，呢20分鐘路程如簡直眨吓眼就過。搭電車嘅話從新宿站到原宿站費用係136日圓，行路嘅話係0日圓，慳錢又健康！唔知您會想用慳落嚟嘅錢買咩呢？
徒步遊走東京人氣街道絕非Mission Impossible。小編喺天朗氣清嘅假日時，習慣按照以下路線行走，新宿→代代木→原宿→表參道→六本木，全長距離約4.5公里。
當您一邊漫步，一邊享受著街道上各種唔同氛圍，就好似出發一段小旅行一樣，唔會覺得厭倦，反而可以喺某地某小巷中遇見相逢恨晚嘅Café或店舖，呢樣亦係以腳代電車嘅魅力之一。
有一點需要注意嘅係，以上做法只限於東京市中心範圍。喺東京郊外與非市中心地方，車站與車站間嘅距離會比較長，並唔推薦用步行方式去取代電車，而且即使喺東京，為安全起見，夜間時段亦唔好用徒步方式，記得要搭電車喔。
慳錢好夥伴！唔駛畀1,000日圓都可以食到名店拉麵~
日本有多間好食嘅拉麵店。豬骨、鹽、味噌、醬油…口味五花百門，根據唔同店舖，拉麵特色亦各有不同。唔少人去日本旅遊嘅時候，都會食多幾種唔同款嘅拉麵作比較。
但人氣拉麵店嘅一碗拉麵平均售價係1,000日圓左右。如果想加多隻雞蛋或叉燒等配料嘅話，埋單就差唔多1,500日圓。想要食到好味拉麵又想食得夠慳嘅話，推薦您一個慳錢好夥伴，就係由著名拉麵店監修，與便利店合作開發嘅商品系列。
日本便利店與全國知名拉麵店合作推出各種唔同商品。例如上圖係7-11與名店合作嘅商品，右邊係與山頭火（さんとうか）合作嘅杯麵，左邊則係與以勁辣拉麵聞名嘅中本（なかもと）合作嘅杯裝飯。價格分別係300日圓及257日圓。
當然，喺拉麵店裡面食拉麵固然好味道，但是如果想食得慳啲之餘，又想一嚐名店好味道嘅話，記得要嘗試一下以上提到嘅合作式商品。 味道與分量都達到令人滿意嘅水準。
記得要自備購物袋
日本自從2020年7月開始，超市、便利店等地方嘅購物袋開始徵收費用。收費目的係防止塑膠垃圾所引起嘅環境污染，同香港膠袋稅大同小異。
喺日本，每個購物袋嘅價格會因店而異，大概係2日圓至5日圓左右。雖然只係區區5日圓，但正所謂「積少成多」，如今有唔少日本人去購物時都會自備購物袋，呢個舉動已經變成理所當然。當您下次嚟日本，有機會去超市或便利店嘅時候，記得要自備購物袋喔。
以上就係小編喺東京生活時用嘅慳錢方法，有無邊樣您係最想試吓？唔知大家又有無咩慳錢攻略呢？記得要留言話畀小編知喔！
Comments