東京都內有多間味道好兼品質高嘅燒肉店。除咗有致力保持食物一流水準，隨著時代不斷進化嘅老字號，同時間亦有務求以合理價錢提供A5高級牛肉畀顧客享用嘅餐廳，又或CP值極高嘅任食放題餐廳等等任君選擇。
東京燒肉店琳琅滿目選擇多多，少不免會有令人唔知點揀至好嘅情況出現。有見及此，今次FUN JAPAN編輯部要為大家介紹東京都內人氣熱話，4大必食燒肉店！
一個人原來都可以盡興：「燒肉LIKE」
「燒肉LIKE」內每一張檯都設有無煙燒烤爐，就算係女性一人獨自前往，都可以輕鬆享受一個人嘅燒肉好時光。 日本嘅「燒肉LIKE」店內最受歡迎嘅係用上低溫熟成牛肉嘅「匠牛五花＆橫隔膜肉套餐200g」（匠カルビ＆ハラミセット200g）套餐。「匠牛五花」係每隻牛身上只得幾kg嘅稀少部位，入口後會感覺到一股美味喺口中瞬間擴散，令人欲罷不能。
講到「燒肉LIKE」餐單裡面CP值最高嘅套餐，就不得不提「牛・豬五花套餐100g」（牛・豚カルビセット100g），價錢只係580日圓，超級抵食！ 推薦您可以加點「和牛五花50g」，增添多一份豪華感！ 去到「燒肉LIKE」，只需要預1,000日圓～2,000日圓左右，就可以按個人喜好揀選鍾意嘅部位，享受一個唔單止CP值高，自由度仲好高嘅嘅燒肉大餐。
餐廳資訊
- 店舗名稱：燒肉LIKE 恵比壽本店（焼肉ライク 恵比寿本店）
- 地址：東京都澀谷區惠比壽西1丁目7-4 FPG links EBISU大廈1樓
- 營業時間：10:00‐23:00
- 交通方式：從JR惠比壽站徒步約1分鐘
- 官網：https://www.yakiniku-like.com/
新宿高級燒肉放題「六歌仙」
「六歌仙」選用最高品質嘅黑毛和牛，餐牌上款款食材都保證上乘。想要盡情食盡各種高級食材嘅話，推薦90分鐘燒肉放題「雪之宴」（8,250日圓），有成17款肉類包括鹽味牛舌、牛五花及其他配菜任君選擇。食客可以從「燒肉」、「燒肉＆涮涮鍋（Shabu-shabu）」、「燒肉＆壽喜燒」當中揀選心水組合，唔知邊款最啱你心水呢？
另外，配搭特選燒肉嘅任食豪華套餐（12,600日圓起～）亦相當受歡迎。任食清單內容仲有水煮螃蟹、龍蝦、特選燒肉等等，想食豪啲嘅話推薦您揀豪華套餐喔。
如果屬於小資一族、想平平地食個燒肉餐嘅話，推薦您可以選擇高質燒肉午市套餐， 價格由1,300日圓起～。 總括嚟講，六歌仙係一間可以盡情享用上等牛嘅燒肉店！
餐廳資訊
- 店舗名稱： 六歌仙
- 地址：東京新宿區西新宿1-3-1 太陽花大厦 6F/7F
- 營業時間：11:00‐23:00
- 交通方式：JR新宿站徒歩約2分鐘
- 官網：https://rokkasen.co.jp/
擰開水龍頭居然會流出檸檬沙瓦！？「燒肉HORUMON TAKEDA」燒肉店
「燒肉HORUMON TAKEDA」直接從生產者購買優質肉類及內臟，等大家可以用超抵價就享用到高品質料理。 店內8成肉類單品價格只係380日圓（含稅418日圓），夠晒抵食之外，每張餐檯上面仲會設置一個非一般嘅水龍頭，可以即擰即流出日本常見嘅人氣酒精飲品「檸檬沙瓦」，並且提供550日圓60分鐘無限暢飲「水龍頭檸檬沙瓦」（蛇口レモンサワー®）任飲選項。同場會有7種唔同味道嘅糖漿畀您揀，等您邊飲邊加唔同糖漿，享受「檸檬沙瓦」各種不同好滋味。
「燒肉HORUMON TAKEDA」亦有提供經過嚴格挑選出當下最優質嘅肉，例如雪花和牛、「本氣TAKEDA 上等牛五花」（本気のたけ田 上カルビ）等等亦相當受歡迎。平均預算大約係2,000日圓～3,000日圓，就可以食到捧腹而回喔。
餐廳資訊
- 店舗名稱：燒肉牛腸TAKEDA（焼肉ホルモンたけ田）
- 地址：東京都澀谷區宇田川町24-8 Leisure Plaza 大厦1F
- 營業時間：平日及公眾假期前一日 15:00-23:00；週末及公眾假期 12:00-23:30
- 交通方式：從JR澀谷駅八公出口步行約1分鐘
- 官網：https://29takeda.com/
和牛放題之殿堂 肉屋橫丁
以復古懷舊感霓虹色街道為設計概念嘅「和牛放題之殿堂 肉屋橫丁」相當吸睛，而且點餐方式非常獨特，居然係從櫥窗前自己「點肉食」，相當嶄新！「和牛放題之殿堂 肉屋橫丁」選購全國著名產地嘅和牛，並採用「一頭買（原隻買入）」，相當豪氣。編輯部尤其推介100分鐘任食「和牛滿滿套餐」（和牛まみれコース），單係想像喺「茫茫肉海」中覓食嘅心情，就已經令人雀躍不已！
除此之外，以品嚐韓式石鍋拌飯般嘅方式享用嘅白飯×漢堡扒狀牛肉組合「Gold rice red meat」（ゴールドライスレッドミート）以及清爽冷麵都非常好味道！ 預算5,000日圓～8,000日圓之間已經絕對可以滿足您對和牛嘅慾望。
餐廳資訊
- 店舗名稱：和牛放題之殿堂 肉屋橫丁 宇田川町店（和牛放題の殿堂 肉屋横丁 宇田川町店）
- 地址：東京都澀谷區宇田川町32‐7 HULIC &New UDAGAWA 8F
- 營業時間：平日 12:00-15:00、16:30-23:30；週末及公眾假期 12:00-23:30
- 交通方式：從JR澀谷站A2出口徒歩約4分鐘
- 官網：https://heijoen.co.jp/store/nikuyayokocho-udagawacho/
Comments