日本人熱愛浸浴可以話係眾所周知。喺家用衛浴普及嘅年代之前，日本民眾要沖涼嘅話就必須要去錢湯，亦即係公共浴場；而即使到咗近代，仍然有唔少人會日日去錢湯報到，皆因可以享受大大個浴池之餘，仲可以浸個熱水浴嘛！今次，就等我哋一齊去睇睇日本傳統「錢湯文化」啦～
日本入浴文化
日本入浴文化可以追溯至飛鳥時代，於公元6世紀透過佛教傳入日本。當時嘅寺院會設有畀僧侶淨身嘅浴場，後來先開始向大眾開放，但當其時入浴嘅主要目的係「宗教信仰」，而非清洗身體上嘅污垢。
日後「湯治」出現，日本人相信溫泉對身體具有療效。江戶時代「湯治文化」興起，農民會喺非農作時期，前往溫泉地進行長時間湯治，亦係日本入浴文化嘅一部分。
何謂「錢湯」？
錢湯即係「公共浴場」，因為需要付費先可以使用而稱為「錢湯」。據聞最早出現嘅錢湯誕生於平安時代嘅京都或奈良，但錢湯直到江戶時代先開始興盛。
江戶時代嘅錢湯已經演變成一門生意，不具任何宗教目的。當時嘅江戶（現時東京）多數係木造建築，為咗防止點火燒熱水嘅時候引起火災等意外，一般民眾係唔可以擁有自家衛浴設施。同時一般民眾亦無錢可以於自家設置衛浴設施，最初只有上流貴族被允許擁有，後來部分有財力嘅富豪商人亦逐漸於家中設置衛浴設施。
但畢竟貴族富商只係少數人，一般庶民要沖涼嘅話就只能夠前往街頭巷尾嘅錢湯，亦因此造就江戶錢湯發展蓬勃起來，成為左鄰右里嘅交流地。時至今日，東京現存嘅錢湯數目仍然係全日本第一，數量最多嘅行政區係大田區。
錢湯都有混浴？
江戶時代嘅錢湯浴池係男女兼用，而京都錢湯嘅混浴又多於江戶。當其時浴池內昏暗，彼此之間係望唔清對方，因此可以專心入浴，但上述環境亦成為某部分性產業嘅溫床，後來江戶政府先至明文規定禁止混浴。
錢湯與富士山
講到錢湯，唔少人都會直接諗起浴室裡面大大幅富士山壁畫，其實錢湯富士山壁畫係起源於大正年代，由位於東京神田一處名為「キカイ湯」嘅錢湯，最先開始富士山壁畫嘅做法，其後大受好評而流行起來。但流行區域僅限關東地區，至於關西地區，則仍然係以磁磚畫與馬賽克磁磚裝飾為主。
大受好評嘅富士山壁畫亦成為廣告商嘅寵兒。喺家居衛浴設施尚未普及嘅年代，錢湯就係聚集人潮嘅地方，於是廣告商與錢湯交涉，以免費壁畫換取廣告刊登權，壁畫下方嘅廣告刊登區亦因此成為商品，從而培養出一班專門繪製錢湯壁畫嘅畫師，由此可見當年嘅錢湯產業係幾咁熱鬧。
黃色面盆「kerorin桶」與牛奶
除咗壁畫，面盆都可以用嚟賣廣告。錢湯文化其中一樣代表性物品－黃色面盆「kerorin桶」，就係富山縣藥商為推廣鎮痛藥kerorin而製作。因為材質堅固耐用，又被稱為「永久桶」，風行全國。
另外一個喺錢湯賺大錢嘅就係牛奶商家。昭和時期，牛奶作為營養補給食品開始普及，但一般家庭無法冷藏保存牛奶，屬推廣產品一大致命傷，於是牛奶業者就聯絡當時社會上少數擁有雪櫃嘅錢湯。從此，去到錢湯就一定會見到牛奶嘅蹤影，並成為錢湯嘅招牌飲品直至今時今日。
「超級錢湯」嘅興起
錢湯作為清洗身體嘅專門設施，提供嘅服務向來簡單，就係熱水浴室。部分錢湯亦會設有桑拿，進場一次費用為480日圓（東京都價格，各縣市費用有所不同，桑拿費用另計）。除傳統錢湯，近期更漸漸出現兼具休閒娛樂設施嘅錢湯，被稱之為「超級錢湯」。
超級錢湯空間非常大，除咗可以沖涼浸浴，仲有提供餐廳、按摩、遊戲區、休息區等服務，等客人可以喺裡面玩足全日。唔少設施都會標榜提供溫泉，如大江戶溫泉物語，入場一次以1,500日圓起跳，餐飲按摩等服務會額外收費。
超級錢湯嘅出現令公共浴場競爭日益激烈，加上家庭衛浴普及造成客人流失，促使傳統錢湯轉型進化。有唔少錢湯老店喺新一代接手之後，重新裝修並加入新想法與服務，成為獨樹一格嘅錢湯，新舊相容讓老顧客開心之餘，亦可以吸引年輕新客人。
錢湯禮儀
畢竟係與大家共用嘅公共浴場，有好幾點禮儀需要注意。
- 進入浴池前必須先將身體洗乾淨。
- 毛巾禁止浸入浴池裡面。
- 地板濕滑，禁止奔跑。
- 禁止洗衫、染髮。
- 結束後須將面盆、櫈歸位。
- 將身體抹乾之後再進入脫衣室。
有紋身可唔可以浸錢湯？
答案係可以，但唔係所有錢湯都允許。可能因為溫泉地禁止紋身客人嘅印象強烈，大家都認為有紋身係唔畀入錢湯。但實際上，日本並無法相關法律規定禁止，只係由於舊時嘅日本，有紋身嘅話多數係黑社會組織成員嘅一份子，至今呢個刻版印象仍然存在。
比起溫泉旅館，有更多錢湯都會允許有紋身人士入場（當然都會有部分地方禁止），惟超級錢湯則係全面禁止。部分地方會提供小型膚色身體貼紙，等客人可以用嚟遮細小範圍嘅紋身圖案，相關情報網路上都可以搜尋得到，去之前記得要確認清楚喔。
Comments