大家好！我係 FUN! JAPAN日籍編輯「清水」。最近同外國同事共事嘅時候，發現到一個現象，就係…
「原來我一直認為理所當然嘅日常習慣、屬於日本獨有嘅文化，喺外國人眼中竟然會覺得匪夷所思？」
今次要講嘅係日本特殊文化之一「就職活動」，日文係「就活」（しゅうかつ）。所謂「就職活動」係指大學生為確保畢業後就「有工開」嘅必經求職活動，亦被日本大學生視為4年大學生涯裡面最重要嘅一環。
呢篇文章將會同大家講解日本大學生如何「搏晒命搵工」，進行「就職活動」嘅實際情況。希望大家睇完之後會留言同清水小編分享返您嘅感想同意見喔～
日本每年春天出現嘅唔只櫻花！仲有一班著住黑色西裝嘅年輕人~
日本每年一到3月至夏天，無論係電車裡面、抑或喺商業地區周邊，都會充斥著如上圖一樣打扮嘅年輕人身影。
佢哋就係正在進行「就職活動」中嘅大學生。「就職活動」可以話係日本非常獨特嘅就業制度，日本大學生務求可以喺應屆畢業後就「有工開」，都會喺在學期間去參加企業人材招募、面試等等一連串嘅求職活動（日文中「就職活動」亦會簡稱為「就活」）。
大部分參加「就職活動」嘅學生都會身穿如上圖中嘅裝扮，黑色西裝、白色襯衣，充滿一致性又毫無個性嘅「求職套裝」。事實上「求職套裝」就係為咗參加「就職活動」嘅學生們所推出嘅就職用套裝。唔止西裝要「黑」，連頭髮都要夠「黑」至得！喺「就職活動」期間，無論頭髮顏色係啡色抑或係其他五顏六色，一般都要染返做黑色喔。
不過其實並非企業方面要求學生穿著以上提到嘅服裝去面試。但係幾乎所有學生都會「保險起見」著住同樣嘅求職套裝，將頭髮染成黑色去進行「就職活動」，箇中理由如下。
- 希望留畀面試官一個「認真」、「乾淨」嘅印象。
- 因為已經係20多年前就開始有嘅習慣，所以「求職=求職套裝加上黑髮」諗法係理所當然。
- 如果只有自己一個打扮得同其他人唔同嘅話，可能會被人事部或負責錄取嘅面試官認為「缺乏協調性」。
外國人見到會嚇一跳！？ 嘅日本就職禮儀
除咗求職套裝，「就職活動」仲有其他各式各樣嘅嚴苛特徵。 首先同大家講解一下「就職活動」嘅流程。
日本公司會喺同一個時期聘請即將畢業嘅大學生，喺日本稱為「新卒一括採用」，意思係一次過聘請大量新畢業生。一般而言，日本應屆大學畢業生並唔係於即將離校或畢業後先至開始物色工作，而係會一邊返學一邊參加面試等就職活動，亦即係所謂「就職活動」中嘅學生，屬於日本社會獨有嘅運作慣例。
因為大部分日本公司會喺3月開始進行招聘活動，所以日本學生喺大學3年級嘅3月份起，就要正式開始「就職活動」。由3月開始啟動「就職活動」模式，會經過面試以及能力檢查等錄用流程，6月～秋天左右就會決定好畢業後要去工作嘅公司，咁就可以喺第二年大學3月份畢業之後，4月份開始無縫接軌地「開工」。換言之，日本嘅「就職活動」係要提早1年以上開始喔。
日本求職活動首個難關：「應徵申請表」（Entry Sheet）
「就職活動」係由提交應徵時要提出嘅申請表或履歷書開始，裡面要寫上自己嘅個人簡介與強項等等資訊，公司負責人會以此作參考去挑選想要進行面試嘅學生，日文稱為「エントリーシート」（Entry Sheet）。
因為唔一定會被理想公司錄取，所以唔少學生會向幾十間～甚至100間以上嘅公司提交申請表。
學生們都非常重視申請表上附帶嘅相片，唔少學生甚至會花費約1萬日元去搵專業攝影師拍攝。 就職活動中嘅女學生所化嘅妝容係希望令到人事部負責人感受到「知性」、「清潔感」，以上妝容稱之為「就活妝」(就活メイク)。
敲門要敲足三次！？過於繁瑣嘅日本面試禮儀
當您申請表成功通過之後，就要進入面試環節。大公司嘅話，由於應徵人數比較多，面試會分為第一次面試，第二次面試，第三次面試，最終面試等等。面試嘅時候，除咗求職套裝以外，仲有其他令人「嚇到吃手手」嘅習慣。例如…
- 學生喺進入面試房之前要敲三下門。房裡面嘅面試官講完「請入嚟」之後，先至可以打開門進入房間。
- 面試期間，雙手要放喺膝頭上。
- 面試結束後、行出面試房之前，要喺門前向面試官鞠躬講「失禮了」先至離開。
- 面試結束後，有部分學生會Send Email或寫信畀該面試公司，以表達「感謝面試」之意。
面試官並無向學生要求遵守以上禮儀。 但係學生為求喺面試官心目中留低好印象，會更加注重各方面嘅禮節。面試官喺面試嘅時候，通常仲會有一條必問問題，就係「學生生涯裡面最努力嘅事情」。學生們正因為以上緣故，會喺就職活動開始前進行打工、做義工、運動等等活動，務求營造出「努力做某事情」嘅效果，可以完美回答出以上問題。
除咗面試之外，能力測試結果亦會影響錄取或不錄取嘅結果。
不被錄取時收到嘅「祈禱郵件」 係？
如果未有被應徵公司錄取，相關公司會Send一封不錄取通知郵件畀學生。由於不錄取通知郵件裡面最後往往會寫著「祝願你今後有更好發展」，所以學生們會稱之為「祈禱郵件」（お祈りメール），唔少學生仲會以「收到祈禱郵件」，「被祈禱了」等等去取代「不被錄取」嘅講法。
日本人傾出所有心血於就職活動嘅原因
就職活動漫長又艱辛。從應徵時要提出嘅申請表、面試、能力考試等等嘅準備相當耗時，被錄取嘅話會開心到喊，不被錄取嘅話則會痛哭流涕…
點解日本人會咁重視就職活動？其實與以下日本嘅職場情况有莫大關係。
- 「大學時期就要决定好就業嘅公司」個諗法經已變成必然嘅存在，對於搵唔到工會感到莫大恐懼。
- 日本「終身雇用」（於同一企業工作到退休為止）文化根深蒂固，認為只要努力搵工進入大企業或著名企業嘅話，一生都可以過上安定嘅生活。
最近，對於以上嘅「就職活動」感到疑問嘅人亦逐漸增加，亦有部分企業一改過去只會於特定時期先至會進行招聘人材活動嘅做法，會因應學生們想要嘅時間帶裡面接受應徵。 另一方面，想喺同一個企業裡面打工一世嘅年輕人亦逐漸减少。
而且，由於尊重多樣化嘅意識越來越高，反對求職套裝與黑髮等等統一性求職模式嘅學生或企業亦漸增加。
日本大學生最想入職嘅企業係？
根據求職資訊媒體「學情」所進行嘅調查指出，2023年3月大學（包括研究院）畢業嘅學生裡面，最受歡迎嘅企業分別係伊藤忠商事（男學生投選第一名）以及集英社（女學生投選第一名）。
伊藤忠商事係日本大型商社之一，以員工平均年收入超過1,000萬日元而聞名；集英社則係日本大型出版社，時尚雜誌《non-no》、漫畫《鬼滅之刃》都係由集英社所出版。
睇完以上有關日本獨有又令人匪疑所思嘅「就職活動」文化之後，各位讀者又有咩感想呢？歡迎大家留言讀後感之餘，亦都可以同清水小編分享香港嘅職場趣事喔！
Comments