講到「和食」，可能大家會即刻諗起精緻嘅「懷石料理」，但其實唔止「懷石料理」，日本人連一般主食「一汁三菜」（いちじゅうさんさい）嘅擺盤都相當講究。
和食中常見嘅「一汁三菜」係由一碗湯、一碗飯，再加3個餸菜所組合而成。日本嘅「一汁三菜」同香港人嘅「三餸一湯」聽落好似，但其實並唔一樣，今次就等小編為大家講解一下何謂「一汁三菜」！
何謂「一汁三菜」？
日文中「汁」有湯嘅意思，「一汁三菜」即係一湯三菜。雖然「一汁三菜」同香港人所認知嘅「三餸一湯，白飯任裝」裡面嘅「三餸一湯」同樣有3樣菜式，但含意並唔完全相等。日本嘅「一汁三菜」裡面「三菜」係指一道主菜加兩道配菜，務求組合出營養均衡嘅健康飲食。主菜一般會使用魚、肉類等等為主要嘅食材；配菜則會以疏菜、菇類、海藻等食材去製作。
飯（主食）
對於日本人嚟講，毎日飲食當中不可缺少嘅能量來源嘅「飯」亦扮演著幫助攝取碳水化合物嘅重要角色。「飯」除咗有常見嘅白飯之外，仲有玄米飯、雜穀米飯，炊飯等等營養價值甚高嘅各種選擇。簡單嚟講，「和食」係絕對唔可以無「飯」食！擺盤方面，作為主食嘅「飯」要放喺前方嘅左手邊位置。
湯
日文中嘅「湯」稱為「汁」或者「吸物」，顧名思義「一汁三菜」裡面嘅「一汁」係「一碗湯」嘅意思。飲湯除咗可以補充水分，湯裡面嘅配料仲可以令成餐飯嘅整體飲食營養方面更加分。擺盤方面，「湯」會放喺「飯」嘅右手邊位置。
主菜
和食中嘅「主菜」一般會使用魚、肉類、蛋、大豆等等作為主要食材，製作出為人體提供豐富蛋白質以及所需營養素嘅餸菜。由於燒、煮、蒸等等唔同嘅烹飪方式下，卡路里或鹽分等含量亦會變得唔同，因此務求保持均衡飲食嘅「和食」仲會根據主菜內容去更改配菜中嘅菜式。至於擺盤方面，主菜會放喺「湯」嘅上方位置；另外，如果主菜係烤魚嘅話，魚頭會向左擺放喔。
更多相關文章：
配菜①
和食中嘅「副菜」所擔任嘅角色務求讓身體可以攝取維他命、礦物質或食物纖維等等嘅營養素，主要使用黃綠色蔬菜、淡色蔬菜 、菇類、海藻、薯仔與山芋等等嘅「塊莖與塊根類」蔬菜食材，並一般以水煮、拌菜、甚至燒烤等嘅烹調方式所製作而成。「副菜」會用到嘅碗碟會偏向迷你Size，至於擺盤方面，基本上會放喺左後方位置。
配菜②
上文亦有提及過「和食」中至少要有2道配菜，第1道配菜未能補給得到嘅營養素，就會交用第2道配菜去補給，一般會製作成拌菜或者凉拌菜等等嘅清淡菜式。第2道配菜出場嘅時候會裝喺一個細碗裡面，至於擺盤方面，基本上會放喺中間位置。
Comments