話說喺某一日，編集部同事們於晚餐時段「覓食」期間發生一段小插曲…
｜A：FUN! JAPAN新人小編員工（居日年數：１年）｜B：FUN! JAPAN資深日藉員工｜
A：今日突然之間好想食肉吖ー
B：（指著眼前居酒屋嘅招牌）喂！你睇吓，今日嘅每日精選菜式係櫻花（Sakura）肉套餐喎。
A：吓！？賞櫻就聽得多，乜日本人連櫻花（Sakura）都照食㗎？
當然，最後食到嘅梗係唔係平時賞櫻嘅櫻花啦！皆因「櫻花肉」所指嘅「櫻花」，並非花卉界嘅「櫻花」，只係發音同樣係「Sakura」嘅…馬肉？
日文領域相當深奧，「同音異義語」又或者「同字異義語」可以話係「老是常出現」，即使喺日常生活中聽慣聽熟嘅單字，都有機會出現字面發音相同，意思卻係「風馬牛不相及」嘅另一個詞彙，包括以上提到嘅「櫻花」；其實「櫻花」唔單止係「花」，亦有「馬肉」嘅意思。
相信有唔少日文初學者都有遇過類似新人小編A嘅情況，會誤解「同字異義語」嘅意思，對於同一個字卻有2種以上意思嘅日文詞彙令人「搲爆頭」相當費解。所以今次，編輯部就特別針對對日文感興趣嘅FUN! JAPAN讀者們，以及正在與日文努力奮鬥中嘅新人小編A，匯整出日文「同字異義語」詞彙嘅懶人包，同大家介紹多個令人感到意外嘅日文詞彙。
原來唔止「櫻花」，連「紅葉」都係肉！？日本古代「禁肉令」時代二三事
新人小編A經歷完「櫻花」事件後返到Office，即刻打開電腦上網Search「櫻花肉」相關意思，發現季節性嘅花卉代表「櫻花」（Sakura）與「紅葉」(Momiji），除咗一般意指「植物」之外，原來仲會被當成「肉」嘅「隱語」使用。
「隱語」係指只有關係密切嘅同伴間使用嘅秘密用語。雖然日本自古就有肉食嘅習慣，但自從於飛鳥時代675年，當時嘅天武天皇篤信佛教禁止殺生戒律、頒佈禁止食用牛、馬、狗、猴、雞肉嘅「肉食禁止令」後，一直至平安時代（794～1180年）、鎌倉時代（1180～1336年）都係禁止肉食。 再者，屬於封建社會嘅江戶時代（1600～1868年）期間，江戶幕府5代將軍德川綱吉亦曾發佈「生類憐憫令」禁止肉食。基於以上理由，日本嘅「禁止肉食」文化就斷斷續續地持續咗大約1,200年。
江戶時代社會瀰漫強烈佛教思想，「肉食禁止令」環境下，提供肉類嘅店鋪唯有開始使用花卉與植物嘅名稱「拉客」，再「靜靜雞」提供肉類畀客人。 據聞平民為咗避免成為處罰對象，會以「口講植物名，真買肉類品」嘅「隱語」方式進行肉類買賣交易。至於關於肉類相關嘅「隱語」由來解說眾說紛紜，一般主流說法如下：
※以下單詞作為隱語使用時，一般唔會使用漢字，而係使用平假名、片假名表達。
【馬肉】<さくら / Sa-ku-ra>
- 切開馬肉嘅時候，肉嘅顏色呈鮮艷「朱紅色・櫻花色」。
- 馬會喺冬天進食大量雜草與穀類，櫻花盛開時期嘅馬肉特別肥美。
- 幕府直轄牧場曾位於佐倉（佐倉日文發音為Sakura）地區附近（現今千葉縣北部），所以「講到馬就會諗起佐倉」。
【鹿肉】<もみじ / Mo-mi-ji>
- 花牌（日本傳統紙牌遊戲）中有一張10月份嘅花牌繪畫上「鹿與紅葉」（鹿に紅葉）嘅圖案。
【鴨肉】<いちょう / I-cho-u>
- 銀杏葉外觀與鴨髀相似。
睇完以上解說之後，下次去居酒屋時見到「さくら」（Sakura）、「もみじ」（Momiji），就唔駛再驚訝「究竟點解要食櫻花同樹葉？」喇！（笑）
【山豬肉】<ボタン / Bo-tan>
- 切好嘅山豬肉喺古時擺盤時會被擺到好似牡丹花咁嘅形狀，所以被稱為「牡丹」（ぼたん）。
順帶一提，江戶時代後期，獸肉嘅總稱（主要係指山豬肉）亦被稱為「山鯨」。 因為鯨魚當時被認為係魚類，所以鯨魚肉係無被禁止，屬於可以食用嘅食材。
【雞肉】<かしわ / Ka-shi-wa>
- 雞肉顏色與變成茶啡色嘅柏葉顏色相似。
- 雞隻拍翼嘅姿態，與神社合掌拍手、稱為「かしわ手（ka-shi-wa-te）」嘅動作相似，所以被稱為「柏」（かしわ）。
相關小知識①：牛肉與豬肉嘅隱語係？
以上提及到嘅「隱語」，即使喺江戸時代過後亦一直傳承沿用至今，成為現代慣用詞彙。
可能係呢個時候，心水清嗁您您可能會靈機一觸諗起「…咦？ 唔係喎，點解有馬肉、鹿肉、雞肉嘅隱語，偏偏就係無牛肉同豬肉嘅隱語呢？」
謎底即刻同您解開！其實喺江戶時代，牛肉、豬肉幾乎係未被普及食用，所以「隱語」並不存在。當牛肉、豬肉開始普及嘅時候，已經係後期嘅明治時代（1868年～1912年），當時嘅日本人已經可以堂堂正正咁食肉，無必要再用「隱語」去隱晦表達牛肉以及豬肉。
相關小知識②：原來肉類曾經係「藥」！？
由於「生類憐憫令」嘅出現，肉食餐廳老闆不得不作出變更，於是就轉型為藥店－皆因當時嘅藥店係可以販賣有助強壯補身嘅獸肉，如果連藥店賣嘅肉都禁止嘅話，會對人類嘅健康造成影響，所以幕府默認藥店嘅肉類販賣。
新人小編A日文「升呢」之路依然漫長…
除咗以上介紹嘅「隱語」之外，仲有其他意想不到、與肉類相關嘅「隱語」：例如因具有可致死嘅猛毒而被稱為「鐵砲」嘅河豚；因為古代人相信「居住喺月亮」而被命名為「月夜」嘅兔仔等等，係咪「創作力量同幻想會嚇你一跳」先？
唔知大家睇完呢篇文章之後，有無同新人小編A一樣，喺日文嘅道路上升咗少少Level呢？
Comments