小岩井農場橫跨岩手縣岩手郡雫石町與瀧澤市，係日本最大嘅民營農場。只要係「去日本多過食飯」嘅讀者，相信都會有見過「小岩井」呢3個字經常出現喺日本超市，例如小岩井牛奶、小岩井牛油、小岩井芝士等奶製品名稱，其實以上提到嘅「小岩井」就係嚟自岩手縣小岩井農場！
小岩井農場唔單止奶製品出名，去到仲可以親親動物們、參觀文化遺產、品嚐農場美食等等，包保大人細路都可以玩到樂而忘返。今次就要為大家介紹，岩手縣人氣旅遊景點小岩井農場牧場園嘅精彩特色！
小岩井農場歷史
小岩井農場嘅歷史係由1891年（明治24年）開始。小岩井農場位於岩手山山腳，當初僅僅擁有一大片樹木稀疏荒地，其後由被稱為日本鐵路之父嘅井上勝先生成為當地場主後，開始進行農場開拓直至今日，至今已經有超過130年以上嘅歷史。農場內唔單止保存著從明治到昭和初期所建造嘅21棟歷史建築物，仲展出咗唔少當年嘅相關資料呢。
小岩井農場3大必玩推介
小岩井農場牧場園有齊餐廳、賣店等各式各樣設施，仲可以同親親動物們，參加體驗活動等等，玩法多姿多彩。 即刻去睇睇農場不可錯過嘅3大必玩推介！
超療癒！盡享親親動物好時光
講到農場，又點少得同萌爆嘅動物們嚟個近距離親密互動體驗呢？可以餵得意迷你馬食紅蘿蔔嘅「迷你馬餵食時間」(ポニーのもぐもぐタイム)、由導遊帶領大家參觀&講解綿羊們每日必做日常嘅「綿羊之點心時間」(ひつじのおやつタイム)，又或騎馬等體驗活動都相當受歡迎！
遊客亦可以喺綠油油嘅放牧場上見到綿羊們悠悠閒嘅萌樣。參觀完綿羊們悠閒度日姿態後，記得再要睇埋牧羊人與牧羊犬嘅工作風景，將農場特有風景一網打盡！
了解更多相關歷史！齊去參觀農場重要文化財產
小岩井農場內有21棟建築物被指定為國家重要文化財 ，例如鄰近牧場園嘅上丸牛舍就歡迎自由參觀，亦有提供導覽行程（依當日先後順序受理）。
特別推薦大家參加由專業導遊詳細講解嘅導覽行程了解農場歷史。一提到重要文化財，大家自自然然都會有種要好好呵護、避免做出任何損壞動作，而且係被嚴格保護嘅形象，但小岩井農場內被指定為國家重要文化財 嘅牛舍至今仍在使用當中，當中最古老嘅牛舍建於明治41年，經過100多年後嘅今時今日，牛舍仍然仲養緊牛牛呢。
岩井農場內嘅牛舍，可以話係充滿生命力嘅文化遺產！除咗會見到普通大牛牛，牛舍裡面仲會有專養牛仔嘅牛舍，可能會遇到得意到令人唔捨得走嘅牛仔喔！？
櫻花白雪美景盡在岩井農場！盡情享受日本四季限定活動
小岩井農場又點只係一個以牧場園聞名嘅旅遊景點？佢仲係一個著名賞櫻與睇燈飾嘅好地方！
櫻花於4月下旬到5月上旬之間盛開。位於上丸牛舍嘅約90棵染井吉野盛開之際，您可以欣賞得到重要文化財多間牛舍與櫻花所映襯出嘅優美景色。同場更有一個被稱為「小岩井農場的一棵櫻花」嘅必睇景色—何謂「小岩井農場的一棵櫻花」？就係有一棵江戶彼岸櫻花樹威風凜凜，獨自屹立於牧場草原上，背景配上尚殘留著白雪嘅岩手山，景色獨特又甚為優美。
除咗櫻花美景，冬天仲會舉行東北最大規模嘅彩燈show喔！
2021年舉行嘅彩燈show「銀河農場之夜2021 KOIWI Winter Lights」當中，退役日本SL火車化身成為夢幻點燈版SL，配以同場大樹以及光之隧道等燈飾，可謂璀璨無比。 因為係每年都會舉辦嘅盛事，如果有機會喺冬天去東北旅行嘅話，就一定要去睇睇點燈後嘅農場係幾咁夢幻！
點燈活動舉行期間，餐廳與賣店亦會特別營業，可以趁機嘆個成吉思汗羊肉等等嘅農場特有美食與購物樂趣。
小岩井農場心水手信推薦
去旅行又點少得瘋狂買手信先？
小岩井農場有唔少農場獨有嘅加工品特產，啱晒用嚟做手信。當中最具代表性嘅必要數到純良發酵牛油蛋糕，用上大量農場生產嘅小麥與傳統發酵嘅牛油，再使用農場內樹木「日本厚朴」所製作而成嘅木模，慢慢焗烤而成為擁有牛油香氣、甜味恰到好處與口感輕盈細滑嘅純良發酵牛油蛋糕。喺享用時再加返杯咖啡或紅茶，完全係幸福好滋味！
其製作過程不辭勞苦絕不馬虎，一心只為做出好味道，係小岩井農場引以為傲嘅佳品。
使用小岩井農場嘅新鮮鮮奶所製作嘅哈羅米芝士亦非常受歡迎。推薦好似烤年糕咁燒至帶有少少燶面再享用，或者放入湯裡面熱食。 官方仲有出售其他牛奶味十足嘅新鮮芝士以及熟成芝士，由於全部都係人手製作，所以數量有限，係農場限定發售商品！
景點資訊
- 地址：岩手縣岩手郡雫石町丸谷地36-1
- 交通方式：JR東北・秋田新幹線盛岡站轉搭路線巴士，喺小岩井農場牧場園巴士站落車後即可抵達
- 營業時間、入場費用：根據不同時期，內容亦會有所不同，詳情請於官網確認。
- 官網：https://www.koiwai.co.jp/makiba/
Comments