一講到去日本嘅四國、中國地區旅行嘅時候，可能最先諗到嘅地點會係「廣島縣」，尤其係廣島市內地區與宮島經常出現喺旅遊書，相信大家就算無去過都一定有聽過。
但其實除咗廣島市內地區與宮島，面向瀨戶內海嘅「福山」、「尾道」、「三原」、「竹原」，被稱為「海之廣島」嘅4大城市近年來亦備受注目，充滿多個不為人知嘅精彩特色。今次FUN! JAPAN編輯部親身去到「海之廣島」4大城市朝聖，同大家分享喺實地採訪時所發現嘅好玩又好買景點！
海之廣島①福山市必睇特色及推薦景點
鞆之浦：吉卜力工作室著名動畫《崖上的波兒》嘅原點
有睇過吉卜力工作室動畫電影《崖上的波兒》嘅話，就一定知道「波兒」係一個充滿好奇心又朝氣勃勃嘅人物角色；而「波兒」呢個可愛角色嘅誕生以及電影中所發展出嘅故事，就正正係宮崎駿導演旅訪「鞆之浦」時留下嘅創作。當您喺「鞆之浦」邊行邊走，曾經於影片中出現過嘅片段會不知不覺地浮現，瞬間令人虛實分不清，出現唔少似曾相識嘅畫面！
睇過《崖上的波兒》但唔係好記得當中片段又好想呼喚起有關波兒嘅記憶？您可以先去旅遊諮詢中心拎返張「波兒地圖」，跟著波兒嘅腳步出發一場不一樣嘅「波兒之旅」。除咗《崖上的波兒》，仲有好多日劇同電影嘅劇組都係喺「鞆之浦」取景喔。
鞆之浦不得不提名物「鯛魚」
「鞆之浦」會於初夏時節舉行傳統漁法「鯛網」，時至今日仍然相當著名，更被指定為無形民俗文化財，因此「鞆之浦」名物幾乎樣樣都離唔開鯛魚！例如有鯛魚飯、鯛魚茶泡飯、鯛魚拉麵等等，充分感受到「總有鯛魚喺左近」嘅樂趣。當中，不得不提創業超過70年嘅老舖「阿藻珍味」所推出嘅「鯛魚茶泡飯」，有別於一般茶泡飯裡嘅薄切魚生，阿藻珍味嘅鯛魚魚生係大大塊，分量非常慷慨！無論係正餐食，抑或宵夜時段享用，甚至暢飲後嘆返碗亦別有一番風味。
海之廣島②尾道市必睇特色及推薦景點
風格相異彷彿兩個世界嘅「耕三寺博物館」
瀨戶內海上散佈著多個大小不一嘅島嶼，其中廣島縣尾道地區小島特別出名；除咗為人熟知嘅「大久野島」、「向島」、「因島」之外，檸檬生產量排行日本第一嘅「生口島」更加係近年嘅人氣熱話。擁有純白色大理石庭園嘅豪華建築「耕三寺博物館」更係極度夢幻，絕對係不可錯過嘅景點。
繼續向內部行的話，您會嚟到一個名為「未來心之丘」嘅空中庭園，眼前景色會從彩色變成一片耀眼嘅純白色，彷彿好似瞬間踏入另一個世界。「未來心之丘」空中庭園係由廣島出身嘅雕刻家‧杭谷一東使用高達3,000噸意大利大理石、用上約16年時間打造而成。置身喺擁有藍天白雲嘅瀨戶內海之下，卻有種明明喺日本卻好似置身於地中海岸一樣，感受到濃郁嘅地中海風情。
最能代表尾道嘅著名景點「千光寺公園」
「千光寺公園」佔地廣闊，坐落於尾道三山嘅千光寺山內，園內擁有多個值得一訪再訪嘅景點，除咗本堂之外，巨石群、鐘樓、文學小徑、美術館等等，都係於「千光寺公園」散步途中不可錯過嘅必睇位。「千光寺公園」位於山頭上，近至尾道市街、遠至瀨戶內海島嶼群景色都可以一覽無遺，隨著季節變遷下仲會呈現不同景緻呢。
海之廣島③三原市必睇特色及推薦景點
「筆影山」可遇不可求嘅夢幻瞬間
三原市近年來最引起話題嘅景點之一，就係可以欣賞到夢幻絕景「筆影山」，因為無一定嘅出現時間，可以話係可遇不可求，充滿神秘感。「筆影山」呢個特殊神秘景觀通常會發生喺氣溫較低卻晴朗嘅秋冬早晨，唔少旅遊人士為咗可以一睹風采，都會一大早上山希望可以與「筆影山」絕景相遇。
「筆影山」據聞係出自於江戶時期詩人之手所命名，因為山頭照映於海面上嘅浮影形狀與「筆」相似，因而得名。從山頂展望台上，遊客可以將散布於瀨戶內海上嘅群島一覽無遺；而春天嘅「筆影山」因為有2,000棵以上嘅染井吉野櫻陪襯，亦係知名賞櫻景點。到咗秋天、冬天，「筆影山」於天時地利之下會搖身變成海霧瀰漫嘅場所，吸引唔少遊客上山朝聖，只為一睹晨間一現，有如置身霧裡嘅夢幻景緻。
鳥居連立嘅新景點「大島神社」
當您乘搭山陽新幹線接近JR三原站嘅時候，從車窗即可以望見橫貫於街頭小巷間嘅一大排屬於大島神社嘅鳥居，既神秘又壯觀。參道上原本只有3個鳥居，直至2020年底先一口氣增建至62個！
從石級最高位置由上往下眺望，您可以望見瀨戶內海上嘅群島，三原城跡等等嘅遼闊景色，再加上「大排長龍」嘅鳥居令大島神社煥然一新，無論無由上至下俯瞰遼闊景色，抑或係由下往上仰望壯觀嘅鳥居群，都格外有一番風味！
曾入選米芝蓮名店嘅拉麵店「鹽味拉麵 前田」
「鹽味拉麵 前田」門面望落無咩特別，但係只要一接近中午就會出現大排長龍嘅景況，排緊隊嘅大家就係為咗嘆返碗米芝蓮等級嘅鹽味拉麵。木質系設計風格嘅「鹽味拉麵 前田」店面簡潔有格調，所呈現出來嘅質感氣氛非常迷人。
日本拉麵嘅湯底大致上分為濃郁系列以及清淡系列，廣島地區嘅拉麵店基本上係以醬油湯底為主，但「鹽味拉麵 前田」則係使用柴魚片、魚乾、乾燥香菇、昆布湯底，口味相當清爽，令望落普通嘅湯底當中多咗一份迷人淡雅嘅香氣，令人不禁飲完一啖又想再飲多啖。加上自家製麵條咬落彈牙又爽口，搭配切成絲嘅柚子皮令人食慾大增，不知不覺間就食到見碗底呀！
海之廣島④竹原市必睇特色及推薦景點
何謂兔仔王？搭15分鐘船去到「大久野島」就知道
渡輪係出發去大久野島唯一嘅交通方式，以海路出發亦為目的地添增多一份不思議與期待。大久野島隸屬於瀨戶內海國立公園嘅其中一部分，從忠海港搭大約15分鐘渡輪即可抵達。一上岸之後，馬上就可以見到兔仔們以極速嘅短腿飛奔嘅姿態，超級可愛！兔仔們仲會不停郁動前面兩雙腳掌仔，萌樣好似係咁催「快啲畀嘢我食吖喂！」呢。兔仔們急不及待嘅餵食動作，加上萌爆嘅眼神，簡直係令人瞬間溶化。
追尋著歷史痕跡 於「竹原老街」尋找曾經昔日舊故事
竹原市進入江戶後期，逐漸發展成以造酒與製鹽嘅城鎮。大部分日式傳統建築都被完善保留至今，竹原市亦因此被日本政府指定為重要傳統建築群保護地區。雖然竹原老街如今已成為當地旅遊景點之一，但商業設施與商店數量並唔算太多，整條本町通連一條電燈柱都無，舊日風情極濃，所以經常會有時代劇與電影會喺度取景拍攝。
竹原市同時亦係有「日本威士忌之父」之稱嘅創業者：竹鶴政孝嘅故鄉。「竹鶴酒造」位於竹原老街當中，而NHK晨間劇《阿政與愛莉》嘅參考原型亦正正係呢位對日本酒業貢獻甚多嘅人物，擁有古色古香舊日建築嘅竹原老街亦多次出現喺劇中。竹原歷史民俗歷史館中亦有展示竹鶴政孝嘅釀酒研究手稿，位於附近嘅廣場裡面仲會見到竹鶴政孝與妻子莉塔嘅銅像。
造訪「海之廣島」時必去購物景點
① 【廣島縣「尾道市」】深感單車聖地魅力「ONOMICHI U2」
「ONOMICHI U2」原本係一個海運倉庫，後來於2014年改建成以服務單車客為主嘅大型設施。設施裡面嘅「HOTEL CYCLE」係日本第一間可以直接連人帶單車入住嘅旅館，佔地有成2,000平方米，除咗有餐廳、Café、生活雜貨店，仲發現香港都有專門店嘅台灣單車品牌「捷安特」亦有喺度開設分店喔！而且「ONOMICHI U2」裡面仲有提供租車，販賣單車及其他週邊商品等等單車相關物品無處不在，身為單車迷嘅您，又或者想要出發一場單車之旅嘅話又點可以錯過「ONOMICHI U2」！
施設情報
- 施設名稱：ONOMICHI U2
- 地址：廣島縣尾道市西御所町5-11
- 交通方式：從山陽本線JR尾道站步行5分鐘，或從山陽新幹線JR新尾道站搭車15分鐘
- 信用卡：可
② 【廣島縣三原市】三原市道路休息站「神明之里」
三原市裡面有唔少販賣當地名產嘅店家，但論及種類及齊全程度都比唔上「神明之里」。「神明之里」裡面有各式各樣令人心動嘅商品，亦有唔少可以代表三原嘅特產，當中最受歡迎就係八爪魚加工品以及象徵三原嘅代表性吉祥物「不倒翁(達摩)」商品。
「神明之里」唔單止係販賣手信嘅地區，更加係一個提供三原市情報、持續並積極推廣當地旅遊特色嘅地方。進駐「神明之里」嘅農漁業生產人士會參加不定期舉辦嘅活動，希望透過販賣商品，從而直接與消費者互動，進一步促進活化地區。天氣晴朗嘅時候，建議去2樓展望台，眼前一大片遼闊景緻，連「多島美」亦會清晰地映入眼簾，令人心曠神怡。展望台上面仲有設置不倒翁(達摩)造型嘅繪馬掛架，可先喺1樓買不倒翁(達摩)繪馬，寫完再拎去2樓掛上繪馬掛架，繪馬會定期送到附近嘅糸崎神社祈願。
施設情報
- 施設名稱：道路休息站「神明之里」
- 地址：廣島縣三原市糸崎4丁目21−1
- 交通方式：從山陽高速公路落本鄉交匯處、久井交匯處，車程約30分鐘
- 營業時間：9:00～18:00（餐廳最後點餐時間為17:30）
- 定休日：毎月第3週週二
- 信用卡：可
③ 【廣島縣竹原市】令一眾兔仔迷行到入去就唔想出返嚟嘅周邊商店
以黑色為主嘅商店外觀，於忠海港邊顯得更注目！店內除咗牆上畫有可愛兔仔身影，仲會見到粉紅色嘅郵筒相當吸睛，等大家可以喺度打發一下等船期間嘅時間，令旅途更加充實。要注意！兔仔相關嘅周邊商品多多令人眼花撩亂，而且得意到樣樣都好想帶返屋企，荷包好有可能大出血喔。另外，店裡面亦有販賣咖啡，可以順便嘆返杯咖啡再出發去下一個景點！
施設情報
- 施設名稱：忠海港渡輪站
- 地址：廣島縣竹原市忠海中町1-2-1
- 交通方式：JR忠海站步行7分鐘
- 營業時間：7：00～19：45
- 定休日：全年無休
- 信用卡：可
Comments