講到日本四國愛媛縣，相信可能會有部分讀者第一時間會諗起「蜜柑」吧？愛媛縣山明水秀，加上日照充足、全年氣候溫暖和煦，可謂集太陽、海風、氣溫等天然條件於一身，因此當地孕育出嘅柑橘又香又甜，零舍好味道。
愛媛縣所種植嘅柑橘種類有將近50多種，無論係產量、抑或係種類數目都係日本第一，日本更流傳著「愛媛縣家家戶戶一擰開水龍頭就會流出蜜柑汁」嘅都市傳說（笑）～今次，FUN! JAPAN編輯部就要同大家介紹「柑橘王國・愛媛」！
愛媛縣蜜柑點解咁出名？
愛媛縣至今已有超過 100 多年柑橘生產歷史，每年柑橘類產量超過 200,000 噸、品種多達40 多種，無論係產量抑或係品種數目都係日本第一。如果有機會去愛媛縣嘅話，您會發現蜜柑蹤影係無處不在，例如路邊無人看管嘅「誠實攤位」、餐廳美食與甜品、甚至連的士司機都有可能會送幾個「蜜柑」畀您。下個日本之旅，不妨去風景美麗怡人嘅四國愛媛縣，一邊睇景一邊嘆蜜柑喇！
愛媛縣柑橘品種及盛產期
一年四季都適合種植柑橘嘅愛媛縣，柑橘類主要品種有11個。有部分品種係純種自然生長，亦有部分係農夫們將唔同品種嘅柑橘交配後所孕育出嘅優質品種。 雖然柑橘主要季節係 10 月到 1 月，但透過溫室栽培技術，現時一年四季都可以品嚐到香甜好味道嘅柑橘。
- 伊予柑：果實較大嘅品種，微酸且多汁。
- 產季為1月到3月。
- 瀨戶香：經過多次品種改良，皮薄香甜又多汁。
- 產季為2月到4月上旬。
- 清見：由蜜柑交配下所培育出嘅品種，亦係唔少品種嘅親本，擁有強烈嘅香氣與優秀嘅味道。
- 產季為3月到5月。
- 河内晩柑：色較淡，味道甜，又被稱為日本葡萄柚。
- 產季為4月到6月中旬。
- 椪柑：味道甜美，味道濃郁，散發著美味香味。
- 產季為1月中旬至翌年3月初。
- 愛媛果試第28號（紅麥當娜）：皮薄，肉質柔軟多汁，係當地原創品種。
- 產季為11月下旬至翌年1月上旬。
- 金州柑 / 南津海：成熟期比一般長，亦特別甜。
- 產季為4月中旬至5月。
- 溫州蜜柑：蜜柑中具代表性嘅品種，擁有經典香氣，果實小巧。
- 產季為5月下旬到翌年3月。
- 凸頂柑：又名不知火柑，擁有黃金酸甜比例，食落會感受到一股清爽風味。
- 產季為12月下旬到翌年5月中旬。
- 晴姬：兼具橙香與蜜柑嘅甜味。
- 產季為12月中旬至翌年2月初。
- 甘平：愛媛Queen Splash：以皮薄而聞名，果肉多汁，係愛媛嘅原創品種。
- 產季為1月到3月。
愛媛縣邊度可以摘蜜柑?
愛媛縣內多個農場都有提供摘蜜柑體驗嘅服務，遊客可以一嘗親手摘蜜柑嘅樂趣。 根據唔同季節，可以品嚐到嘅品種亦唔一樣，最多甚至有齊晒11種主要品種可供選擇。而且農場仲會提供「又摘又拎走」嘅服務，等遊客唔止摘，仲可以將一定數量嘅蜜柑帶返屋企，送禮自用兩皆宜。
岩城島岡野農園
岡野農園可以話係柑橘類水果嘅天堂，由岩城島上嘅第二代果農、性格開朗又友善嘅岡野英明與岡野加惠夫妻所經營。雖然岩城島係以盛產綠色檸檬聞名，但農園裡面亦有提供各式各樣嘅蜜柑，而且產季相當長。更特別嘅係，喺您摘蜜柑嘅同時，會有雞出現喺腳邊啄您嘅腳喔！
農園採取環保耕作方式，全完無添加防腐劑，亦唔會打蠟，並獲愛媛生態農民系統認證。岡野農園種植各種早熟與晚熟嘅蜜柑，包含12月可品嚐到嘅「奧手蜜柑」（晚熟蜜柑），全年都可以享受摘蜜柑嘅樂趣！
設施情報
- 名稱：岡野農園
- 地址：愛媛縣越智郡上島町岩城4832
- 交通方式 ：
- 從生口島乘搭三光汽船到洲江港，到達岩城島嘅小漕港
- 從生名島出發嘅話可以自駕，經由岩城橋到岩城島
- 產季開放時期：10月到翌年3月
- 營業時間：08:00-16:30
- 費用：1,500日圓／1人(包含蜜柑費用)
友浦園藝
友浦園藝坐落於今治市，您可以置身於療癒嘅海島氣氛之中，享受邊摘蜜柑、邊眺望海景嘅樂趣。友浦園藝嘅蜜柑生長於日照充足嘅山坡上，唔單止味道香甜，更散發著陣陣香氣。12月可以摘「晴姬」、1月可以摘「凸頂柑」，2月則可以摘「甘夏」。全部種類都無使用任何農藥種植，鍾情於有機水果嘅話喺度保證可以安心享受到摘水果嘅樂趣。
設施情報
- 名稱：友浦園藝
- 地址：愛媛縣今治市宮窪町友浦282
- 交通方式：農場距離大島 E76 西瀨戶高速公路一小段車程或一小段單車車程
- 產季開放時間：全年皆產季，須於3天前預約
- 費用：溫州蜜柑1,200日圓，其他種類1,500日圓
南四國農場
位在宇和島嘅南四國農場，地形平坦而且斜坡比較少，最適合想喺平地農場體驗摘水果嘅人。果樹生長於平坦地面上，同行動不便嘅旅伴或者小朋友出遊嘅話，都可以安心體驗摘水果嘅樂趣喔。由於部分品種嘅收成時間比較短，可以事先透過E-mail確認相關情報，而且仲可以又摘又拎走，最多可以打包成3kg返去慢慢嘆呢。推薦您嚟南四國農場聞住蜜柑清爽香氣邊摘邊眺望宇和海靚景，感受一場前所未有嘅清新體驗。
設施情報
- 名稱：南四國農場
- 地址：愛媛縣宇和島市吉田町沖村甲612番地-1
- 交通方式：從JR予讚線的立間站步行約15分鐘
- 產季開放時期：10月中旬至11月底
- 營業時間：09:00-16:00
- 費用：成人基本費用660日圓，若要打包3kg蜜柑費用為1,100日圓；小童費用為440日圓與770日圓。
愛媛縣交通方式
愛媛位於四國島，通過多座橋樑與日本最大島嶼本州相連，遊客可以透過自駕與電車輕鬆抵達。 愛媛縣除咗四國大陸部分，亦包括多個島波海道嘅島嶼，例如島波海道嘅單車之旅就相當著名，亦非常適合自駕遊。群島內並無任何電車通行，但可以經由公路、客運大橋或當地渡輪服務互相通行。
從大阪出發只需 50 分鐘，即可從大阪伊丹機場飛往愛媛縣縣政府所在地松山市。如果想探索愛媛縣，可以從松山市乘搭四國大陸上嘅電車，或者踩單車、自駕或渡輪穿梭相連嘅群島。電車路線所需時間少於4小時，費用為 10,600 日圓，包括到岡山新幹線以及到松山特急潮風號列車。 岡山市與松山市之間亦有夜間高速巴士運行，大約夜晚11點出發、翌日早上6點到達，費用大約5,000-7,000日圓之間。
從廣島出發嘅話，電車時間所需大約3個半小時，自由席費用只需約10,000多日圓，包括從廣島到岡山嘅新幹線以及到松山特急潮風號列車。廣島與愛媛今治之間亦有行經島波海道嘅高速巴士，所需時間約為3小時，費用依日期與季節有所不同，大約2,600到3,800日圓左右。從今治出發嘅話，可以乘搭電車或巴士到松山，費用約1,000日元，大約需要一個小時。比起巴士，電車價錢會比較低而且速度更加快喔。
Comments