高知縣嘅四萬十川被稱為「日本最後的清流」，皆因水質透明度非常高、清澈見底，風景如詩如畫美不勝收。除咗可以沿著河邊悠然散步，亦可以享受划皮艇等活動，想要好好體驗當地傳統文化嘅話，四萬十川絕對係您高知之旅首選目的地之一！事不宜遲，立即跟著小編出發，去感受日本美麗大自然嘅動人魅力啦。
四萬十川喺邊度？又係一個點樣嘅地方？
四萬十川流經高知縣西部，係四國最長嘅河流。其源頭來自於海拔1,336m嘅不入山（位於四國喀斯特縣立自然公園嘅高峰），從多條支流匯集水量後緩緩地從上游流域南下，流經四萬十市，最後注入太平洋，全長有成196km！因此又以四國最長、兼水質優良嘅清流而聞名。
點解四萬十川會變得咁出名？
四萬十川嘅正式名稱原本係「渡川」，不過當地人就一般通稱為四萬十川。河川名字由來眾說紛紜，其中有一種講法係正如字面意思，因為有成四萬多條支流，所以通稱為四萬十川；亦有另一種講法指名字其實源自於愛奴語「シ・マムタ（SHI・MAMUTA）」（※「非常美麗）嘅意思）。1983年，某日本電視節目使用四萬十川呢個名稱並將其美譽為「日本最後的清流」作出相關介紹後，四萬十川從此聞名全國，並根據當地居民要求於1994年正式將其名稱變更為「四萬十川」。
據稱被美譽為「日本最後的清流」嘅原因，除咗因為水質優良，仲因為主流部分無任何水庫嘅存在。 為咗盡可能唔破壞河川生態，讓河水保持自然順流而下而架建設計罕見嘅「沉下橋」等，亦係被美譽為「日本最後的清流」嘅原因之一。沿著四萬十川而建嘅小村莊及街道，一律無任何使用混凝土等人工建築材料建築，整體環境保留著美麗大自然，難怪吸引唔少大自然愛好者以及熱愛水上運動嘅遊客特地到此一遊。
四萬十川小知識：究竟四萬十川有無水庫？
根據日本河川法，從基礎地基到水庫嘅堤頂高度，要有15m以上先會被定義為水庫。四萬十川主流內有一個通稱「家地川水庫」、以發電為目的建造嘅佐賀取水堰，但由於佐賀取水堰高度只有8m，法律上並不被視為水庫，所以四萬十川被視為「主流內無水庫嘅河流」。
四萬十川特色景點＆必玩必睇位
遊客除咗可以喺四萬十川體驗到划皮艇、行山、踩單車等各式各樣親親大自然活動嘅樂趣，水質上乘嘅四萬十川亦出產唔少獨有特產，例如係青海苔、鰻魚、香魚等食材，而日本國內產嘅青海苔，更大部分都係出產自四萬十川。下次嚟到四萬十川，記得要試一試當地美食啦。
皮艇・獨木舟・直立板SUP
沿河有各種可以體驗皮艇、獨木舟、直立板SUP等等嘅水上活動店舖，您可以根據自身所在地揀選最合適嘅選擇。當中四萬十獨木舟與露營之里 KAWARAKKO就兼備露營與划獨木舟所需嘅所有設備，仲有提供睡袋、檯、帳篷、座墊等露營用品嘅出租服務。不妨嚟體驗露營住宿，盡情感受四萬十夜晚嘅滿天繁星喔。
景點資訊
- 景點名稱：四萬十獨木舟與露營之里 KAWARAKKO
- 地址：高知縣四萬十市出之川24
- 地點：露營地距離四萬十市約13km，位於高瀨沉下橋附近。
- 交通方式：
- 從三間交匯處揸車約1小時15分鐘
- 從津島岩松交匯處揸車約1小時30分鐘
- 從四萬十市役所揸車約20分鐘
- 從四萬十市中村站搭巴士約34分鐘，於「KAWARAKKO前」巴士站落車
- 營業時間：受理預約時間：08:00～18:00、入住Check in：15:00、Check out：13:00、短期使用：10:00～16:00
- 開園時期：每週一及年末年始（7月～9月無休）
乘搭屋形船！出發一趟巡航之旅
喺四萬十川，您可以見到懷舊復古嘅屋形船，令人有種坐時光機回到過去嘅感覺，特別係「四萬十之碧」嘅屋形船相當受歡迎，從船上可以欣賞到四季不同嘅河流景色。船上可以享用得到以當季新鮮捕獲嘅鄉土美食所製作嘅便當（※需要預約，費用不包含於搭船收費當中）。5月～6月限定嘅螢火蟲觀賞船行程亦備受矚目，遊客可以喺傍晚時段，欣賞好幾千隻發著光嘅螢火蟲於水上翩翩起舞（※需要預約）。
全年無休嘅路線為1日8班，運行時間為1小時。記得喺週末、假日等等，人比較多嘅時候，預約好再出發喔。
另外，「舟母浪漫」則與屋形船唔同，係一艘張開白帆嘅小帆船，過去為四萬十川流域人氣嘅交通方法。原本並非只載人，仲會用嚟運送物資，將從關西及關東地區來嘅木炭運到河口，回程時將日常用品等物資運回上游流域，而現時則主要乘載遊客水上遊覽。下次不妨搭著「舟母浪漫」，一邊欣賞水上美景，一邊享受新鮮的空氣，好好放鬆一下啦！「舟母浪漫」航程所需時間為45~50分鐘，旺季期間每日運行8次。
景點資訊
- 景點名稱：屋形船 四萬十之碧 三里乘船場
- 地址: 高知縣四萬十市三里1446
- 地點：從中村站到內陸，於四萬十市區外嘅三里乘船場啟航。
- 交通方式：乘船場從中村站出發（租車或搭的士）約20分鐘車程，另外，亦有巴士運行至乘船場附近嘅「岡之前」巴士站。
- 營業時間：一般行程為09:00開始，運行至16:00；螢火蟲夜間行程為19:00開始提供服務。
- 運行時期：全年無休，螢火蟲行程則為5月20日~6月15日
- 費用：一般行程為成人1小時2,000日圓，螢火蟲行程為成人1小時3,000日圓，小童為半價。
景點資訊
- 景點名稱：四萬十川觀光遊覽船 舟母浪漫・松廣屋
- 地址：高知県四万十市入田16高知縣四萬十市入田16
- 地點：於中村站西北、四萬十川對岸嘅入田乘船場運行
- 交通方式：乘船場距離中村站約6km，揸車約10分鐘
- 營業時間: 運行時間由09:15至16:15，最終服務於17:00結束
- 時期：上述日程為3月20日～11月30日正常運行，除此之外需要事先預約。
- 費用：成人2,500日圓，小童1,200日圓。
橫過沉下橋
沉下橋橋面於河川水漲嘅時候會被淹沒，不易受到水所帶來嘅阻力影響，亦係四萬十川一大象徵。由於沉下橋嘅橋身不設側欄，因此遇上洪水時嘅斷幹折枝都可以照樣通過橋樑流動。沉下橋對於當地居民嚟講，係日常使用嘅聯絡通道，極具重要性，而且橋身與水面距離非常近，亦成為小朋友們嘅遊樂場所。於橋底劃著船槳，於橋上漫步走過，係四萬十川特有嘅風景，站於橋上更可以飽覽到雄偉大自然全景呢。
單車周遊
四萬十川有唔少提供出租單車服務嘅地方，雙人單車、電動輔助單車、一般登山車、一般單車任君選擇。
出發前您可以選擇喺中村車站租借單車，即可以輕鬆地開始一場沿河探險之旅。基本使用時間為5小時以內，一般登山車、一般單車使用時間為24小時（用足24小時，費用亦只係1500日圓！）。推薦可以踩著單車去沿河附近嘅旅館過夜，第二日再去還車，令您嘅旅遊時間更靈活更有彈性。
景點資訊
- 景點名稱：四萬十川單車出租
- 地址：高知縣四萬十市站前町8-3
- 地點：四萬十市中村站
- 交通方式：出租店位於四萬十市觀光協會內
- 營業時間: 08:30-17:30
- 費用：雙人單車：2,500日圓，電動輔助單車：2,000日圓，一般登山車&一般單車：1,000日圓（每使用5小時收費，需於當日17:30之前還車）
Comments