成日都會聽到人話「去廣島就要食廣島燒，去大阪就要食大阪燒」，但其實日文裡面，無論係廣島燒定係大阪燒，兩種都稱之為「御好燒」（お好み焼き），只不過係因為唔同地區，先至出現關西風（大阪風）與廣島風兩種版本。今次FUN! JAPAN編輯部要為大家介紹廣島風御好燒，包括廣島縣最受歡迎嘅3大御好燒店，想一嚐廣島風御好燒好滋味嘅您千祈唔好錯過！
※文章內有關店舖資訊為截至2022年3月之內容。因新冠肺炎疫情影響，店舖營業時間等等可能會有所變動。
廣島人靈魂美食「廣島風御好燒」
關於廣島風御好燒（以下簡稱為廣島燒）嘅起源，據聞可追溯自大正時代嘅庶民料理「一錢洋食」。一錢洋食係將麵粉以水融化後，加上蔥、蝦米、紅薑絲等配料薄煎而成，價格為一錢（※約現今嘅10日圓），喺一般嘅駄菓子屋（零食店）就有販售，主要流行於關西地區。
第二次世界大戰之後，一錢洋食從庶民料理變成正餐，配料演變成蔥、椰菜、芽菜等，之後經濟逐漸復甦，追加配料種類越來越多，包括麵條、豬肉等，醬汁口味亦逐漸改良，成為現今為人熟知嘅廣島燒。
昭和30年代，唔少家庭會將自己屋企嘅一部分改裝成廣島燒店，經營嘅老闆娘多數係戰爭未亡人。當時店名多數叫「〇〇ちゃん」（即店主本身嘅乳名），據聞係為咗因戰爭而顛沛流離嘅親人可以順利搵得返自己而以乳名命名，至今廣島縣內仍然有多間店舖保留當時老闆娘嘅名字。
廣島燒麵糊及材料特色
廣島燒嘅特色係「層層疊」，一般做法為將麵糊煎成薄薄餅皮，放上一大把椰菜及豬肉，略煎一陣之後再將餅皮連菜快速翻面，之後堆疊至炒麵上方，最後再加返隻荷包蛋與大量蔥花，多層次嘅廣島燒就大功告成！
廣島地區將加有豬肉、炒麵、蛋嘅基本款廣島燒稱為「肉玉そば」或「そば肉玉」。廣島燒醬汁亦相當講究，除咗最著名嘅品牌「御多福御好燒醬」，其他仲有「カープソース（ka-puso-su）」、「ミツワ（mitsuwa）」等各式品牌。每間店舖都有自己鍾意嘅口味，品嚐唔同醬汁亦係廣島燒嘅樂趣之一喔！
人氣廣島燒店3選
跟住落嚟就要向大家推薦3間廣島燒店，唔單止好味，仲係深受當地人喜愛嘅人氣廣島燒店喔。
1. Micchan 總本店 八丁堀本店
創業自昭和25年（1950年）嘅老店，每逢週末假日總係大排長龍！店舖使用嘅特調醬汁口味清淡，就算日日食都唔會厭，反而會越食越上癮。
每份廣島燒都係由數位員工共同製作，從煎麵糊、放食材、煎，最後淋上醬料，每個步驟都由唔同人負責，目的係令到每個廣島燒嘅味道都保持一致。如果由1名員工從頭負責到尾嘅話，每個人所製作出來嘅味道點都會有所差異，將步驟分工嘅話，就可以確保客人食到相同美味嘅廣島燒。
八丁堀本店位於中國．四國地區鬧區之一嘅八丁堀地區，方便遊客購物之餘，仲可以品嚐到當地居民都「食到舐舐脷」嘅廣島燒經典美味！
店鋪資訊
- 店鋪名稱：Micchan 總本店 八丁堀本店（みっちゃん総本店 八丁堀本店）
- 地址：廣島縣廣島市中區八丁堀6-7 Churis 八丁堀1F
- 交通方式：從八丁堀路面電車站徒步約5分鐘
- 營業時間：11:30〜14:30、17:30〜21:00（最後點餐為結束營業30分鐘前）
- 定休日：星期四
- https://www.okonomi.co.jp/menu_china.html
2. 電光石火 站前廣場店
照片提供：廣島縣
榮獲人氣美食網站與餐廳評價排行榜好評嘅人氣廣島燒店。
其特徵係夠晒大份、講究火候嘅蔬菜及雞蛋，特別係使用兩隻雞蛋製成嘅蛋皮，輕輕咁包裹住蔬菜與肉片，望落同蛋包飯有幾分相似！推薦您用上廣島蠔所製作嘅「肉玉牡蠣」（にくたまかき）廣島燒，大大隻又肥美嘅廣島蠔，簡直係令人欲罷不能！
店鋪資訊
- 店鋪名稱：電光石火 站前廣場店（電光石火 駅前ひろば店）
- 地址：廣島縣廣島市南區松原町10-1 Full Focus大樓6F
- 交通方式：從廣島站徒步約3分鐘
- 營業時間：10:00～23:00（最後點餐為22:30）
- 定休日：全年無休
- https://okonomiyaki-denko-sekka.com/shop/shibuya_centergai/
3. REICHAN廣島燒 ekie廣島站店（麗ちゃん ekie広島）
「REICHAN廣島燒」創業於昭和32年（1957年），店內對使用嘅食材，例如水、雞蛋、蔬菜等等統統都精心講究。廣島燒必備食材之一嘅椰菜，更會因應唔同季節向唔同廠商入貨，以確保新鮮品質。而帶有彈性嘅餅皮，則係將麵糊靜置4小時先至有嘅口感。店家堅持一錢洋食時代嘅做法，將廣島燒摺一半，淋上醬汁後，再放上檯畀客人享用。
店內提供嘅御好燒種類豐富，推薦您選擇加入墨魚與鮮蝦嘅「スペシャル(エビ･イカ入り)」，如果因過敏或其他原因抗拒某種食材嘅話記得同店家講聲，可以為您客製化調整喔。
「REICHAN廣島燒 ekie廣島站店」位於JR廣島站直通嘅商業設施ekie裡面，地理位置優良，店裡面亦有吧檯座位，就算一個人都可以隨心進內。
店鋪資訊
- 店鋪名稱：REICHAN廣島燒 JR廣島站ekie內（麗ちゃん JR広島駅ekie内）
- 地址：廣島縣廣島市南區松原町1-2 廣島站ekie1F
- 交通方式：從廣島站徒步數分鐘內
- 營業時間：11:00～22:00
※目前調整營業時間 星期日～星期四11:00～21:30，星期五・星期六11:00～22:00 - 定休日：不定期定休 ※以ekie休館日為準
- https://www.ekie.jp/shop/index.html?shop_id=30
廣島燒專門店大集合！廣島市「御好村」
廣島市內擁有多間廣島燒專門店，如果想一次過試盡唔同店舖嘅廣島燒口味嘅話，推薦您去「御好村」！
御好村（お好み村）3層樓裡面聚集咗24間御好燒店，當中包括有唔少老店，係深受當地居民與遊客喜愛嘅用餐選擇。位於廣島市區繁華嘅新天地中心地區，係著名旅遊景點之一。順帶一提，御好村裡面使用嘅御用醬汁係由「ミツワ」特別製作而成嘅限定醬汁喔。
店鋪資訊
- 店鋪名稱：御好村（お好み村）
- 地址：廣島縣廣島市中區新天地5-1
- 交通方式：從JR廣島站，搭廣島電鐵（路面電車/往宇品、江波、西廣島、宮島方向）至「八丁堀」站落車，車程約10分鐘，出站之後徒步約3分鐘
- 營業時間、定休日：請參考各間店舖官網查詢
- http://www.okonomimura.jp/foreign/chinese.html
Comments