情人節顧名思義就係屬於情人嘅節日。喺日本，呢日係女生向心儀男性送朱古力表達心意嘅日子。喺新年過後，日本嘅舖頭同商場都會由擺設傳統嘅新年用品，變成各式各樣有平有貴嘅朱古力。由女仔送朱古力畀男仔呢個習慣，其實係由某朱古力製造商開始，時至今日呢個習慣已經係年度盛事，據說市場規模只係僅次於聖誕節！（亦有說萬聖節規模已經超越情人節，不過無論點樣，情人節都已經變成日本每年重要節日之一）
情人節喺日本已經流行近60年，而每年慶祝呢個節日嘅方式都係日新月異。喺情人節之前，總會有好多唔同種類嘅朱古力特賣，就咁望住一大堆甜到漏嘅朱古力，沉浸喺幸福嘅氣氛入面都不失為一種樂趣，尤其係鍾意朱古力嘅女生會醉心為自己心儀嘅男生挑選禮物～喺情人節期間，日本人唔單止會送朱古力畀情人，亦會送畀朋友，甚至可以送畀自己。呢啲朱古力，大概可以分為下面四個種類。
- 本命朱古力（本命チョコ / Honmei choco）：女生送畀真命天子。
- 義理朱古力（義理チョコ / Giri choco）：通常係送畀同事或者客戶，用嚟表達感謝對方嘅心意。亦可以送畀普通嘅男性朋友。
- 友情朱古力（友チョコ / Tomo Choco）：通常係女生之間互想送自己鍾意嘅朱古力畀閨蜜。
- 自用朱古力（ご褒美チョコ /Gohobi choco）：而家可能反而係市場店由率最高嘅種類。女生會奢侈少少買自己鍾意嘅朱古力或者甜品，嚟獎勵自己每日工作嘅辛勞。平日女生們可能會喺便利店買100円至300円左右嘅甜品，但唯獨呢個節日，會令女生們稍為闊綽對自己好啲，揀選自己鍾意嘅朱古力。根據新聞報導，甚至會有女生用超過2萬円嚟買朱古力獎勵自己呢！
當然手作朱古力同甜品亦係相當有人氣。喺超級市場，可以見到好多整自製朱古力嘅商品套裝。到咗而家，連小學生都會同媽媽一齊自製朱古力嚟送畀學校嘅同學。呢啲自製情人節朱古力商品每年都五花八門，甚至連100円店都會有情人節專區，專門賣可愛嘅包裝商品等。
您問小編鍾意邊種？唔使講，小編當然係要獎勵自己嘅「自用朱古力」啦～！
Comments