「愛媛縣」位於日本四國地區，坐擁美麗嘅瀨戶內海，可謂秘景處處風景怡人。一講起愛媛縣，相信唔少人會第一時間諗起「蜜柑」，又或者譽為日本最古老溫泉「道後溫泉」。愛媛縣或者未必係您嘅旅遊目的地首選，但愛媛縣就好似一個藏寶地帶咁，擁有多個您意想不到嘅「日本第一」、「日本首個」景點，去愛媛縣旅遊就好似出發尋寶咁，令您處處有驚喜。今次FUN!編精選出幾項愛媛縣「日本第一」、「日本首個」嘅精彩驚喜位，下次有機會去愛媛嘅話，不妨去「尋寶」探索一番！
日本第一古老嘅溫泉就在愛媛！
講到位於愛媛縣嘅溫泉，大家第一時間應該會浮現出「道後溫泉」呢四個字。「道後溫泉」位於愛媛縣松山市，係日本最古老嘅溫泉，據聞於3000年前經已存在，傳聞飛鳥時代嘅日本偉人聖德太子(574～622年)亦曾到此入浴喔。另外，於720年左右編纂成冊嘅歷史書《日本書紀》當中亦有提及「道後溫泉」嘅存在。
「道後溫泉」最具象徵性嘅建築物「道後溫泉本館」喺1894年改建完工，於1994年被日本指定為國家重要文化財，係日本首個被指定為國家重要文化財嘅公共浴場。
「道後溫泉本館」主要有2個溫泉浴池，分別係「神之湯」和「靈之湯」，由於建築物正在進行保存整修工程，預定喺2024年12月全部完工，目前只有「靈之湯」開放入場。
道後溫泉本館
- 地址：愛媛縣松山市道後湯之町5-6
- 交通方式：從JR松山站搭伊予鐵道嘅路面電車至道後溫泉站落車，步行約5分鐘
- 入場費（靈之湯）：成人420日圓、小童160日圓
- 營業時間（靈之湯）：06:00～23:00
- 定休日：全年無休
日本第一座會流出〇〇嘅水龍頭就在愛媛！
當您覺得日本水龍頭所流出嘅自來水，可以直接生飲已經好神奇嘅時候，愛媛縣嘅水龍頭應該會令你更震撼，因為竟然有水龍頭擰開之後唔係出水，而係「蜜柑汁」？！真不愧為盛產柑橘類嘅愛媛縣，先可以打造出日本首個「蜜柑汁水龍頭」，唔單止夠晒創意獨特，飲落仲相當鮮甜美味。其實「蜜柑汁水龍頭」原本只係一個都市傳說，因為盛產柑橘類嘅愛媛縣民一直以此為傲，所以成日都會同其他縣市嘅人講笑話：「愛媛縣嘅家家戶戶，一擰開水龍頭就出蜜柑汁」，愛媛縣有一間飲品公司於2007年將呢個都市傳說成真，打造出日本首個「蜜柑汁水龍頭」。
想親身朝聖與品嚐「蜜柑汁水龍頭」嘅話，推薦您去「蜜柑狗樂園（MICAN PARK）」和松山機場。「蜜柑狗樂園（MICAN PARK）」除咗專賣愛媛縣產柑橘等產品，裡面仲有Café等您可以食完美食之後，順便買埋手信返香港喔。
設施情報
- 設施名稱：蜜柑狗樂園（MICAN PARK）
- 地址：愛媛縣松山市梅津寺町1374-1
- 交通方式：從JR松山站步行至伊予鐵道嘅大手町站。從大手町站搭伊予鐵道高濱線至梅津寺站，步行即可抵達
- 門票：免費
- 營業時間：10:00～16:00（六日及公眾假期至17:00為止）
- 定休日：週一
設施情報
- 設施名稱：(愛媛)松山機場
- 地址：愛媛縣松山市南吉田町2731
- 交通方式：
從JR松山站搭利木津巴士，車程約15分鐘
從松山市站搭利木津巴士，車程約20分鐘
從道後溫泉搭利木津巴士，車程約40分鐘
驚奇大發現！日本首次挖掘出天然鑽石就在愛媛！
到目前為止，多數認為日本列島地層屬於年代較新嘅地質，係無可能挖到鑽石，卻於2007年喺愛媛縣嘅火山岩挖到天然鑽石，呢一項驚奇大發現徹底顛覆以往嘅學術定論。另外，呢一粒天然鑽石雖然係驚奇大發現，卻相當細粒，只有1微米（1毫米嘅千分之一）非常迷你。
日本首次人工哺育成功嘅北極熊就在愛媛！
位於愛媛縣伊予郡砥部町嘅砥部動物園裡面，有一隻非常特別嘅北極熊「Peace」，係日本首次人工哺育成功嘅北極熊。「Peace」誕生於1999年12月，與此同時亦有另一隻北極熊誕生，但唔小心被熊媽媽整親之後，不幸死亡。因此，動物園園方為咗令「Peace」唔會受到相同厄運，決定代替熊媽媽以人工哺育嘅方式去照顧「Peace」。
由於喺「Peace」誕生之前，日本國內並未有成功人工哺育北極熊嘅案例。砥部動物園對於北極熊寶寶適合邊種奶粉，調配濃度等等嘅相關資訊都唔了解，喺反覆試驗與經歷失敗嘅過程中，從錯誤中學習，終於成功地養大「Peace」，成為日本首個人工哺育北極熊嘅案例。隨著年月過去，「Peace」如今經已超過20歲，仍然相當健康、充滿活力地喺園內歡迎大家大駕光臨。
設施情報：
- 設施名稱：愛媛縣立砥部動物園
- 地址：愛媛縣伊予郡砥部町上原町240
- 交通方式：
從松山市市區駕駛出發約20分鐘
從JR松山市站搭砥部線往愛媛兒童城堡嘅巴士，至「砥部動物園前」站落車，步行約7分鐘 - 門票：成人500日圓、長者・高中生200日圓、中小學生100日圓、幼兒免費
- 營業時間：09:00～17:00
- 定休日：週一（適逢假日順延至隔日）、新年假期
日本第一巨大鳥居就在愛媛！
深受中國、四國地區虔誠信奉嘅「和靈信仰」，係保佑漁業等產業興榮嘅「產業之神」，而總本山就係位於宇和島市嘅「和靈神社」。「和靈神社」裡面主要祭祀嘅神明係宇和島初代藩主伊達秀宗嘅家臣「山家清兵衛」。「山家清兵衛」喺促進產業發展和安定民政等方面擁有高人一等嘅手腕，係相當優秀嘅人才。講到「和靈神社」就不得不提「和靈神社」嘅石造鳥居，有成13米咁高，堪稱日本第一大鳥居相當吸睛。
景點情報
- 景點名稱：和靈神社
- 地址：愛媛縣宇和島市和靈町1451
- 交通方式：從JR宇和島站步行約15分鐘
- 門票：免費
- 營業時間：08:30～17:00（社務所）
- 定休日：全年無休
除咗日本第一更聞名全球嘅橋樑就在愛媛！
最後要介紹嘅呢項紀錄，唔單止係日本第一，更加係世界第一！就係架設於著名單車道「島波海道」路段嘅「來島海峽大橋」。
呢座連接著今治市與大島嘅「來島海峽大橋」，由3座吊橋連接而成，係世界首座「三連吊橋」，於1999年興建完工。
位於大島方面嘅「第一大橋」全長960米，中間嘅「第二大橋」係1,515米，再加上今治方面嘅「第三大橋」係1,570米，全程總共超過4公里。
無論係搭遊覽船，從橋下近距離觀賞橋樑本身嘅構造美學，抑或係從觀景台眺望「三連吊橋」嘅風采，以各種方式不同角度，都可以欣賞得到由蔚藍嘅瀨戶內海與橋樑所交織出嘅唯美動人畫面。
景點資訊
- 景點名稱：來島海峽大橋（今治市端）
- 交通方式：從JR今治站駕駛出發約20分鐘，或從JR今治站搭宮浦港方向嘅巴士，至馬島站落車，步行約5分鐘
Comments