日本四季分明，加上地形狹長、南北溫差較大，北從夢幻雪國北海道，南至熱情南國沖繩景色，全國各地景色可謂變化萬千，令人百去不厭。當中，日本東北地區四被海山環繞，最令人印象深刻莫過於美不勝收嘅冬雪絕景，可以盡情享受既夢幻又浪漫嘅白雪紛飛動人景緻。今次編輯部精選出4個東北地區嘅冬季絕景，希望大家可以為下個冬季日本之旅做足準備！
與雪怪近距離接觸？！藏王樹冰（山形縣）
「藏王樹冰」係日本東北必去行程之一，「藏王樹冰」係指山形縣藏王溫泉一帶嘅藏王連峰上出現嘅「樹冰」奇景。從海拔1,500m至山頂附近有一大片遼闊「大白時冷杉」針葉樹原始森林，每到1月至2月嚴冬之際，冰與雪會交織附著於「大白時冷杉」針葉樹上，形成彷如「雪怪」嘅冬季奇景「藏王樹冰」。
「藏王樹冰」從何而來？「藏王樹冰」其實與西伯利亞吹來嘅寒冷季風有莫大關連。事關從西伯利亞吹來嘅寒冷季風，為藏王連峰帶來富含冷水滴嘅雲層，當富含冰冷水滴嘅雲層觸碰到「大白時冷杉」針葉樹時瞬間凍結凝固，就會形成被冰雪覆蓋嘅「樹冰」美景。「樹冰」由迎風口處開始漸漸凍結成「蝦尾」狀，於不斷反復凍結嘅過程下，「樹冰」亦變得逐漸龐大，造就成一個又一個「雪怪」遍佈雪地嘅大自然奇觀。
遍佈著純白色「雪怪」嘅藏王係嚴寒冬季限定景色，壯觀程度絕對會令人嘆為觀止。「藏王樹冰」唔單止白天景色迷人，夜間舉辦嘅點燈活動亦相當誘人，於五光十色嘅燈光映照之下，一個又一個「雪怪」變得更奇幻更有氣勢，壯觀程度非筆墨所能形容，唯有親身去實際體驗至知道「藏王樹冰」到底有幾夢幻壯觀。（「樹冰點燈活動」會於下午5點至晚上9點登場）
「藏王溫泉滑雪場」係東北最大規模嘅滑雪場，佔地相當廣闊，亦係欣賞「藏王樹冰」壯觀景色嘅好地方。「藏王溫泉滑雪場」除咗擁有細緻粉雪與舒適溫泉，仲有可以居高俯瞰「樹冰」嘅空中纜車等等，絕對係大家喺冬季度假時極佳選擇。
滑雪場嘅滑雪路線亦會經過「樹冰」一帶，可以一邊滑雪一邊欣賞「樹冰」；唔滑雪嘅話則可以搭滑雪纜車，從高空俯瞰一大片「樹冰」，縱情飽覽眼下不思議奇景。另外，觀景台裡面亦附設餐廳，等大家可以睇靚景之餘仲可以嘆埋美食，相當貼心。推薦大家有機會嘅話，可以去欣賞呢一大片由大自然雕刻出嘅「樹冰」嘅不思議神祕景觀！
前往藏王樹冰嘅交通方式
- 從JR山形站搭巴士，車程約40分鐘；從JR仙台站搭高速巴士，車程約1小時30分鐘
- 從藏王溫泉巴士總站步行約15分鐘
景點資訊
- 景點名稱：藏王纜車
- 營業時間：08:30～17:00（山麓線）、08:45～16:45（山頂線）
- 費用：
成人：樹冰高原站 800日圓、地藏山頂站 1,500日圓、地藏山頂站來回 3,000日圓
小童：樹冰高原站 400日圓、地藏山頂站 800日圓、地藏山頂站來回 1,500日圓
超浪漫迷你雪屋 橫手雪祭（秋田縣）
秋田縣橫手蛇之崎川原雪地上，竟然燃點著好幾千個冰燈，燭光遍雪地？其實，一個個冰燈係用雪堆成嘅迷你雪屋（かまくら），迷你雪屋內點起燭光，就形成一盞又一盞柔和溫暖嘅燭光照遍整片雪地，情景相當夢幻！
想要感受宛如童話嘅雪國世界？咁就千祈唔好錯過已經有成450年歷史嘅傳統活動「橫手雪祭」！「橫手雪祭」係為咗祭祀水神而喺小正月所舉辦嘅傳統活動，現時固定喺每年2月15日、16日登場。
橫手市過去曾經因為水源短缺而煩惱，為咗感謝水神帶嚟豐沛水源，現時每年都會舉辦「橫手雪祭」祭祀活動。雪屋內供奉著水神，大家都會親身行入雪屋，將香油錢投入錢箱，祈求水神保佑家宅平安、生意興榮、五穀豐收等等。
喺橫手市所建造約80個雪屋裡面，當地小朋友仲會招呼雪屋內嘅遊客飲甘酒、食燒年糕，希望可以幫大家暖吓身，趕走天寒地凍嘅寒意。喺當地小朋友熱情款待之下，遊客旅程馬上增添多一份溫暖回憶！唔好以為置身於由白雪所打造嘅雪屋裡面會好凍，實際上係無想像中咁寒冷，反而會感到格外溫暖喔。
景點資訊
- 景點名稱：橫手雪祭
- 日期：每年2月15日、16日
- 會場：橫手市公所本廳舍前、橫手公園
- 交通方式：從JR奧羽本線橫手站步行約10分鐘。設有穿梭於各橫手雪祭雪屋會場嘅免費接駁巴士（行駛期間從17:40～21:00左右）
- 活動時間：18:00～21:00
※ 因新冠肺炎疫情，有可能變更、縮小活動內容或停止舉辦。
漫步於9米高八甲田雪之迴廊！（青森縣）
座落於青森縣青森市嘅「八甲田山」，冬天嘅精彩地方亦係係有「雪怪」之稱嘅樹冰群。八甲田一帶茂密成長嘅「大白時冷杉」針葉樹，遇上冰與雪再一層又一層地凍結，越變越巨大，化身為一個個聳立於雪地之上嘅巨型「雪怪」。推薦大家搭纜車至山頂，出發一趟約10分鐘嘅空中漫步，身處纜車內俯瞰一大片由大自然鬼斧神工下所創造出嘅「雪怪」奇景，絕對會成為八甲田山之旅嘅難忘回憶。
鍾意滑雪嘅話，非常推薦喺八甲田山一帶滑雪喔！您唔單止可以欣賞到壯麗嘅「樹冰」，仲可以一邊滑雪，一邊眺望「樹冰」嘅動人景色，簡直係心曠神怡。除咗可以遠望津輕、下北兩半島，最遠甚至可以望見北海道。
滑雪之餘，您亦可以著上雪鞋參加雪地健行行程，近距離欣賞「樹冰」嘅震撼美。視乎天候狀況，話唔定會有機會體驗得到雪國先至有嘅「地吹雪」喔。冰雪漸融嘅初春期間，則可以尋覓從冬眠醒來嘅松鼠、或兔子嘅足跡，不同時節都可以享受到好時光。
最後，就係期間限定絕景、巨大嘅「雪之迴廊」！「雪之迴廊」只會出現喺冬季積雪封路嘅八甲田・十和田黃金路線開放通車之前，除雪作業完畢後嘅一段期間。喺開放通車嘅前2日，當地會舉辦期間限定步行活動「八甲山健行」，遊客有機會喺呢條長達8km長嘅雪地漫步，兩旁嘅白雪層所堆積出嘅雪牆更高達9m，大自然魄力與八甲田嘅自然雄偉一覽無遺。提提大家，如果想要體驗限定嘅健行活動嘅話，記得要事先預約喔。當您行完雪地之後，仲可以嘆個靚溫泉，盡情放鬆一番。
前往八甲田纜車滑雪場嘅交通方式
從青森站乘搭JR巴士，車程約80分鐘景點資訊
- 景點名稱：八甲田纜車
- 營業時間：
3月～11月上旬：09:00～16:20
11月中旬～2月：09:00～15:40 - 費用：
成人：單程 1,250日圓、來回 2,000日圓
小童：單程 450日圓、來回 700日圓
大正浪漫冬季雪景 銀山溫泉（山形縣）
銀山溫泉係東北地區數一數二熱門溫泉勝地，從山形縣尾花澤市搭車，車程約30分鐘即可抵達佇立於山谷之間嘅溫泉鄉，感受濃厚日本傳統風情。1月～2月時山形縣內白雪紛飛，銀山溫泉化身成夢幻銀白世界，加上懷舊復古建築，營造出格外迷人嘅氣氛。溫泉鄉內至今仍保留百年前風貌嘅街景，冬季時漫天白雪、燈火互相映襯下，瞬間就好似穿越時空，昔日日本景色完美呈現於眼前。正正因為擁有如此迷人嘅景色，唔少人都會專程揀冬天前往銀山溫泉到此一遊喔。
「銀山溫泉」過去曾經係銀礦礦山，始於1600年左右，喺江戶時代（西元1603年～1868年）初期係日本著名嘅銀礦所在地之一，亦因而得名「銀山」。隨著銀礦枯竭，1689年廢山後就轉型為溫泉地而聞名繁盛，演變成現今嘅「銀山溫泉」。
銀山溫泉亦係紅遍全世界嘅著名日劇《阿信》嘅故事舞台，阿信嘅媽媽為咗幫補家計而離鄉別井去到溫泉街工作，成為旅館「仲居」招呼客人，銀山溫泉裡面樓高3層嘅木造復古旅館就成為《阿信》拍攝場景。不得不提位於銀山溫泉中心位置，有一間充滿韻味嘅木造和風建築「古勢起屋別館」，早餐有提供用白蘿蔔和白米去炊煮而成嘅白蘿蔔飯「阿信飯」，有機會不妨去體驗箇中滋味喔。
前往銀山溫泉嘅交通方式
- 從山形機場乘搭巴士，車程約1小時20分鐘
- 從東京站搭山形新幹線至JR大石田站，車程約3小時20分鐘，再轉搭巴士至銀山溫泉，車程約40分鐘
Comments