講到日本嘅春天，就會令人聯想到象徵日本春天嘅花卉－櫻花。櫻花綻放嘅季節落喺相當適合出門嘅3月至5月期間，日本本州各地隨處可見櫻花身影，一邊賞櫻、一邊品嚐美酒佳餚，絕對係春天令人期待嘅盛事之一。
如果要喺東京賞櫻嘅話，上野公園、目黑川等等固然係人氣之選，另外日本賞櫻三大知名景點之一嘅青森弘前公園、大阪城公園等等嘅全國著名賞櫻景點亦令人目不暇給。今次小編就會介紹有關日本賞櫻基本禮儀，以及賞櫻要點賞先會更好玩更加分。大家下次想出發去日本春天之旅嘅話，不妨搵個賞櫻好地方，然後坐喺櫻花樹下悠閒地賞櫻，感受日本櫻花嘅醉人美景～
日本櫻花開花時期＆櫻花種類介紹
事不宜遲，即刻為大家介紹賞櫻相關嘅小知識！
賞櫻與櫻花名稱由來
賞櫻，日文係「 花見（はなみ）」。就如字面所述，即係「欣賞花卉」。「 花見（はなみ）」一字由來眾說紛紜，但普遍認為源自奈良時代（710～794年）皇室貴族一邊賞花、一邊詠唱和歌。最初「花見」多指賞梅，惟演變至今一般「 花見（はなみ）」即係賞櫻。
櫻花日文係「サクラ（sakura）」，其由來有如此一說－「サ（sa）」係山神或田地之神，「クラ（kura）」則係指供奉神明神座，古人喺插秧耕種之時，會舉辦賞花活動以作為祈求稻作豐收。
時至今日，賞櫻已經成為日本嘅春天風物詩。每到櫻花盛開嘅時候，無論係一家大細，抑或係親朋好友、公司同事都會齊聚櫻花樹下樂也融融地欣賞櫻花粉爛。日頭嘅櫻花景致固然美麗，夜間舉行嘅點燈活動亦非常值得一賞，櫻花於燈光襯托下 ，呈現出與白天截然不同嘅風貌，營造出奇幻浪漫氣氛，美不勝收。
櫻花開花時期＆櫻花品種
櫻花帶畀人嘅印象，係屬於春天嘅花奔，但其實喺日本，去到五月都仲可以睇到櫻花。據聞日本櫻花品種超過600種，各種櫻花嘅開花時期根據地區、品種而有所差異，例如沖繩嘅緋寒櫻，屬於早開品種，朝下綻放，顏色偏鮮豔嘅粉紅色，多數會喺1月中旬開花。
櫻花品種中最具代表性之一嘅染井吉野櫻會喺3月～4月開花，，而河津櫻比染井吉野櫻更早開，一般會喺2月上旬～3月上旬開花，係靜岡縣賀茂郡河津町一帶嘅櫻花品種。另外仲有奈良縣嘅吉野山等地盛開嘅山櫻花，係自然交配之下嘅野生櫻花品種，從山腳去到山頂，由於海拔高低落差大，山櫻花會從山腳一路慢慢盛開至山頂，從4月上旬至4月下旬都可以可欣賞得到醉人畫面。
日本東北等地區櫻花花期會比較遲，最遲到5月初旬都仲可以睇到櫻花；而北海道嘅4月末至5月末，則除咗可以欣賞得到染井吉野櫻之外，仲有蝦夷山櫻等櫻花品種，花瓣顏色同樣鮮艷動人。
賞櫻必備物品與美食！準備齊全，賞櫻樂趣增倍
1. 準備齊全萬事OK！必備物品與服裝配搭重點
喺公園等地方賞櫻嘅話，同平時野餐一樣，最好準備定大Size嘅野餐墊。雖然賞櫻景點附近多數都會有餐廳或攤販，就算兩手空空去到現場再買飲品或食物都OK，但係一去到中午時段，無論係餐廳、抑或係攤販都肯定會大排長龍，可能要排好耐先買到，又或者會遇上太過暢銷而賣清光嘅情況，非常掃興。避免出現以上想買又買唔到嘅情況，因此小編建議最好自己提早準備會比較放心。
另外，百貨公司嘅地下美食街一般會有賣壽司，或者賞櫻便當等等美食，可以先去行個圈覓食一番。推薦大家一邊賞櫻，一邊品嚐充滿日本風情嘅日式便當，無論係視覺定味覺都可以全情投入日式氣氛，非常滿足！
3月嘅東京最低氣溫會落喺7℃左右，平均氣溫亦大概只有12℃左右，可能多多少少都會覺得凍。怕凍嘅話最好準備定毛毯或暖包等禦寒保暖物品以備不時之需；如果係去賞夜櫻，就更加要做足保暖措施，避免感冒冷親喔！
2. 賞櫻必守禮儀！事後收拾・霸位注意事項
日本嘅春天唔會太熱又唔會太凍，氣溫宜人，係出去玩嘅好季節。想要賞櫻賞得更盡興開心，小編再同大家分享以下幾個注意事項。
首先，賞櫻當中要注意嘅其中一點，就係建議大家搭電車、巴士等公共交通工具出發去距離賞櫻景點最近嘅車站，再徒步行去賞櫻景點。事關每逢賞櫻季節，景點附近嘅停車場，無論係收費抑或係免費，都肯定會出現爆滿嘅情況，就算想截架的士都非常困難。去到賞櫻景點後，可以先霸定位（基本上係先霸先贏），不過有一點要注意，就算參加人數超過事前霸好位嘅面積，記得都唔可以搶咗隔離附近嘅人所霸好嘅位置喔。
賞完櫻花美景之後，即場所製造出嘅垃圾，例如便當盒、啤酒罐等等，記得要自己收拾乾淨，並將垃圾帶走，唔好留低喺現場。如果喺櫻花祭期間賞櫻，記得要做好垃圾分類，再棄置喺活動會場所指定嘅地方。
最後一點要注意嘅，係嚴禁折斷、採摘公園內嘅櫻花或櫻花樹枝，包括櫻花以外嘅其他植物。好好遵守賞櫻禮儀，令您嘅賞櫻之旅更舒適寫意！
Comments