迪士尼粉絲要注意！下次去東京想買迪士尼商品，又多一個新選擇喇！全日本最新、規模最大嘅Disney Store「東京迪士尼旗艦店（Disney FLAGSHIP TOKYO）」，已經正式2021年12月5日於東京新宿盛大開幕。「東京迪士尼旗艦店（Disney FLAGSHIP TOKYO）」與東京Metro新宿三丁目站B6出口直通，從JR新宿站亦只需徒步3分鐘，地理位置優越，交通非常方便。究竟「東京迪士尼旗艦店（Disney FLAGSHIP TOKYO）」有幾吸引？即刻跟著小編入去一探究竟，同大家分享「東京迪士尼旗艦店（Disney FLAGSHIP TOKYO）」精彩魅力所在！
關於東京迪士尼旗艦店（Disney FLAGSHIP TOKYO）
「東京迪士尼旗艦店」以超越想像為概念，希望去到旗艦店嘅粉絲，莫論年齡、性別等因素，都可以全情投入迪士尼所營造出嘅夢幻世界之中。為咗令迪士尼粉絲盡情享受迪士尼商品嘅購物樂趣，因此精心呢一間日本最新、最大規模嘅Disney Store就誕生！「東京迪士尼旗艦店」從地下1樓至地上2樓，共有3層樓高，店內總面積約1,710平方米，販賣商品種類非常豐富，從迪士尼系列、PIXAR系列、MARVEL系列、星球大戰Star Wars等系列周邊商品都應有盡有。另外，仲可以買到東京迪士尼度假區®同海外迪士尼樂園&度假區內所販售嘅周邊商品，保證迪士尼粉絲們唔止行到腳軟，仲會買到手軟。
「東京迪士尼旗艦店」入口：迎賓大螢幕熱烈歡迎粉絲
東京迪士尼旗艦店入口嘅大型LED螢幕「迎賓大螢幕」尺寸超過440吋，預定會隨機播放迪士尼系列、PIXAR系列、MARVEL系列、星球大戰Star Wars影像，盛大隆重歡迎迪士尼粉絲們大駕光臨。
「東京迪士尼旗艦店」1F、2F：魔法數位入口
一行入「東京迪士尼旗艦店」，就會見到於店內設置嘅隧道數碼電子顯示屏「魔法數位入口」，螢幕上會輪流播放《冰雪奇緣》等眾多迪士尼明星影像，震撼力十足！
「東京迪士尼旗艦店」2F：魔法師學徒米奇＆展示間
去到2樓，則會見到「東京迪士尼旗艦店」嘅經典象徵－巨大米奇雕像！米奇雕像原型來自迪士尼電影《幻想曲》短篇故事《魔法師的學徒》中登場嘅米奇。大家記得同米奇影返張靚相留倩影喔！
另外，2樓仲有一個展區，展出迪士尼明星搭配最新迪士尼商品嘅空間！內容會根據季節活動、期間限定等內容變動，希望營造出粉絲們無論幾時嚟到，都可以感受得到充滿新奇與期待嘅環境，帶畀大家一個新鮮感受體驗。
「東京迪士尼旗艦店」B1F：「D-Made」Lab客製專屬服務
「東京迪士尼旗艦店」另一個備受關注嘅精彩亮點，就係位於地下1樓嘅「D-Made」Lab客製專屬服務。原本只可以喺迪士尼官方Online Store「shopDisney」訂購嘅客製化商品服務，今次終於搬到實體東京迪士尼旗艦店喇！只要去到東京迪士尼旗艦店就可以製作出「專屬於你」獨一無二嘅迪士尼商品！
而且製作方法相當簡單，只需要操作平板裝置，揀選心儀嘅商品項目與設計等簡單步驟，就可以製作出「您理」原創商品。
迪士尼商品豐富齊全！必買旗艦店獨家限定商品
「東京迪士尼旗艦店」商品非常豐富，除咗為紀念東京迪士尼旗艦店隆重開幕而推出嘅商品之外，仲有華特迪士尼世界度假區50週年嘅紀念商品等。藥妝、日用品、公仔等商品種類五花八門，玲瑯滿目，連日本知名藝人渡邊直美監修設計嘅聯名商品「UniBEARsity」都可以買得到。商品精彩程度，淨係邊行邊睇都已經令人相當興奮，直頭想統統都買返屋企！
《星球大戰Star Wars》、《Marvel》嘅粉絲們要注意！《星球大戰Star Wars》、《Marvel》系列等相關商品陳列喺地下1樓，記得要落地下1樓行個圈，尋找您嘅心頭好喇。
東京迪士尼旗艦店嘅限定商品亦不容錯過。下次去日本旅遊嘅時候，一定要將「東京迪士尼旗艦店」列入必去景點之一，等您嘅旅程可以滿載而歸！
店舖資訊
- 店名：東京迪士尼旗艦店（Disney FLAGSHIP TOKYO）
- 地址：東京都新宿區新宿3-17-5 T&TIII大樓
- 營業時間：10:00～21:00
- 交通方式：從JR「新宿」站徒步約3分鐘/東京Metro丸之內線・副都心線・都營新宿線「新宿三丁目」站B6出口直通
© Disney
© Disney／Pixar
© & TM Lucasfilm Ltd.
© 2021 MARVEL
※文章內照片皆為全新開幕時（2021年12月5日）之情況
Comments