簡直得意到您唔捨得食！「熊仔」竟然浸著溫泉，化身成為火鍋湯底陪您打邊爐？！呢間嚟自北海道札幌嘅一人涮涮鍋專門店「北海道MENKOI 熊仔溫泉涮涮鍋」主打「熊仔」造型湯底，萌爆「熊仔」化身成為火鍋湯底，坐喺鍋裡面嘅畫面非常療癒，令人忍唔住會大嗌「哇！好得意呀~」。「熊仔」火鍋唔單止賣相吸引，味道亦相當高分，今次FUN!編出發去位於澀谷嘅「北海道MENKOI 熊仔溫泉涮涮鍋」，親身去睇睇呢班溫泉「熊仔」有幾得意過癮！
TikTok爆紅！人氣熱話「熊仔溫泉涮涮鍋」進軍澀谷！
坐喺鍋裡面悠哉悠哉浸著溫泉嘅萌爆溫泉「熊仔」嚟自「北海道MENKOI 熊仔溫泉涮涮鍋」，亦係TikTok裡面嘅大「熊」人。「北海道MENKOI 熊仔溫泉涮涮鍋」融入前所未有嘅娛樂元素，打造出全新型態嘅一人涮涮鍋專門店，一次過滿足客人嘅視覺與味覺，帶畀大家雙重享受。源自北海道札幌嘅「北海道MENKOI 熊仔溫泉涮涮鍋」，多數選用嚟自北海道嘅食材，美味程度當然不在話下，為咗令客人食得更期待更興奮，特別將涮涮鍋高湯湯底設計成萌爆熊仔造型，吸睛又好味相當加分。
萌到爆嘅「熊仔」造型湯底一出現，齋望就已經連個心都跟著它齊齊被融化。「熊仔」湯底其實係用食物纖維和膠原蛋白製作凝固而成，店家希望大家品嚐美味火鍋嘅同時，仲可以食得健康又療癒身心。
「北海道MENKOI 熊仔溫泉涮涮鍋」店舖裡面嘅裝修亦經過精心設計，規分成餐檯座位區和吧檯座位區。由於「北海道MENKOI 熊仔溫泉涮涮鍋」主打「一人涮涮鍋」，更特別營造出一個人都可以輕鬆舒適，完全無需在意其他人眼光地「嘆火鍋」嘅環境，等客人食得輕鬆又自在。店舖裡面「熊仔」更加係無處不在，除咗火鍋裡面嘅「熊仔」湯底之外，牆上所繪製嘅熊仔插畫，檯上擺放嘅熊仔造型隔板，瞓喺吊床上懶洋洋嘅熊仔等，隨處都見到「熊」出沒蹤影，不禁令人期待「熊仔」溫泉火鍋送上檯嘅可愛瞬間♪
熊仔溫泉涮涮鍋要點落單？點餐步驟極速教學
①揀選一款熊仔湯底
「北海道MENKOI 熊仔溫泉涮涮鍋」一共有7種湯底，有白芝麻香搭配辣油香氣，可以刺激食慾嘅「長壽高湯湯底(擔擔麵湯底)」；濃縮雞隻美味精華，濃郁可口嘅「美肌高湯湯底(雞膠原蛋白湯底)」；湯底內含有酒粕嘅「純米吟釀味噌高湯湯底」等，「熊仔」湯底口味多多相當豐富，仲會不定時推出季節限定嘅「熊仔」湯底喔！
②揀選主餐
「北海道MENKOI 熊仔溫泉涮涮鍋」提供嘅主餐有「北海道產 特選MENKOI綜合肉盤(牛肉、豬肉、雞肉、雞肉丸)」、「精選牛舌盤」、「成吉思汗羊肉盤」等，共6款肉盤，每款都會有菜盤跟餐，等您嘆靚肉嘅同時仲可以吸收到豐富蔬菜，兼顧營養均衡。另外，肉盤等配料仲可以單點追加，唔夠食嘅話記得加點喇。
③揀選附餐
最後需要從「水餃」、「拉麵」或「韓式年糕」3種附餐當中揀1樣，推薦大家可以用火鍋所剩餘嘅湯汁去煮喔！試想像一下可以大啖嘆吸收晒食材美味精華嘅附餐，係幾咁令人大飽口福，情不自禁地大嗌好滿足。
④揀選火鍋醬料
點餐完畢之後，就可以去拎火鍋醬料與辛香配料。醬料口味相當豐富，例如有北海道知名美食「湯咖哩」、「蛋黃醬」、「蜂蜜檸檬」、「白芝麻」、「亞洲醬」等多款醬料口味。另外，仲有「橄欖油」、「蒜油」、「辣油」等，各式各樣嘅調味料統統任君選擇自選搭配，大家可以依照個人喜好調配出自己鍾意嘅醬料口味。
除此之外，非主餐嘅配餐選擇亦非常多元化，當中，飲品種類選擇繁多，從無酒精飲品到酒精飲品應有盡有，加上只有「北海道」先有嘅地道美酒更加係一應俱全，不妨趁機好好品嚐一番！
火鍋烹煮嘅同時...熊仔化作火鍋湯底！可愛程度爆燈但視覺相當衝擊！
火鍋烹煮嘅同時，「熊仔」嘅身影亦逐漸變細慢慢融化成湯底，最後完全消失不見，視覺效果相當衝擊。「熊仔」喺鍋裡面個樣就好似浸緊暖笠笠嘅溫泉咁，造型賣相可愛到不得了，受到唔少女生喜愛，絕對係打卡呃like嘅好地方。隨著溫度升高，膠原蛋白凝固嘅「熊仔」亦開始融化，一點一滴不成熊形，有種莫名嘅治癒感。逐漸融化嘅畫面雖然可愛，但係咁得意嘅「熊仔」就咁融化消失又會覺得有少少心痛～下次去日本旅行，不妨去「北海道MENKOI 熊仔溫泉涮涮鍋」嘆返個「熊仔」火鍋，親身感受熊仔漸漸消失化作美味湯底嘅過程，等您嘆美食之餘仲可以盡情打卡！
餐廳資訊
- 店名：北海道MENKOI 熊仔溫泉涮涮鍋 澀谷宮益坂店
- 地址：東京都澀谷區澀谷1-8-10 2F
- 營業時間：
- 11:00～15:00（最後點餐時間為14:00）
- 17:00～22:00（最後點餐時間為21:00）
- 定休日：不定期
- 交通方式：從澀谷站徒步約4分鐘
Comments