【日本和歌山】去和歌山拜訪「貓站長」！貓奴必去景點「和歌山電鐵貴志川線」完整介紹

「和歌山電鐵貴志川線」自從貓站長「小玉」上任後，吸引大批遊客到訪，相繼推出「小玉電車」、「士多啤梨電車」等經過精心設計嘅主題電車，而且「和歌山電鐵貴志川線」沿途都可以欣賞到山明水秀嘅田園風光，因此大受歡迎。想搭「和歌山電鐵貴志川線」嘅電車，又想見貓站長一面但又唔知從何入手？等小編逐一話您知！

關於和歌山電鐵貴志川線

和歌山電鐵係以關西地區和歌山縣為據點嘅鐵路公司，從和歌山站一路延伸至和歌山東邊地區，沿途可以欣賞到風光明媚嘅田園景色，屬於和歌山當地嘅在來線鐵路。要出發去和歌山站，可以喺大阪出發，單程車程約1個半小時；從關西國際機場出發嘅話，單程最短只需40分鐘左右，交通非常方便。

大阪～和歌山站交通方式

從JR大阪站出發去JR和歌山站，搭電車即可以直達、無需轉車。從大阪站搭大阪環狀線西九條方向嘅紀州路快速電車，有一點要特別注意，就係記得要搭5～8號嘅車卡，事關列車會喺途中嘅日根野站分成兩節，1～4號車卡會開去關西國際機場，千萬要留意！

關西國際機場～和歌山站交通方式

從關西國際機場出發去和歌山站，最方便嘅交通工具就係機場利木津巴士（車程約40分鐘）。搭電車嘅話，可以喺JR關西機場站搭關西機場線至日根野站，再轉搭阪和線至和歌山站。

和歌山電鐵貴志川線乘搭方式＆路線介紹

抵達和歌山站之後，就可以直接喺和歌山站內9號月台轉搭貴志川線電車，貴志川線嘅車票售票處亦位於9號月台。小編溫馨提示，貴志川線係無得用交通IC卡，記得出發前要袋定足夠現金喔！

乘搭貴志川線電車嘅話，推薦大家選購可以全日任搭嘅「1日乘車券」（大人800日圓、小童400日圓）。

「1日乘車券」有幾抵玩？打個譬如，如果由和歌山站出發去到貴志站，單程費用就要410日圓，對比只售800日圓嘅「1日乘車券」，只要您搭2次以上就可以回本，非常抵玩！「1日乘車券」喺和歌山站9號月台就可以買得到，下次有機會去志川線電車遊嘅話，記得買「1日乘車券」想點搭就點搭！

和歌山電鐵貴志川線生招牌「貓站長小玉」

和歌山電鐵貴志川線因為貓站長小玉而揚名國際。貓站長小玉原本住喺貴志站旁嘅商店裡面，喺2007年1月擔任全球首隻（!?）貓站長後，貓力全開，瞬間成為貓界超級明星。小玉站長喺2015年離世後被追封為永久名譽站長，而繼承小玉精神嘅小玉二世站長（二代玉）和四代玉站長，則現時繼續喺貴志川站為大家服務，等候乘客大駕光臨。

和貓站長相約於和歌山電鐵貴志川線

目前喺貴志川線工作嘅貓站長有2隻，想親眼目睹貓站長嘅話，記得要事前查好2位站長嘅當值時間同埋地點喔！（截至2022年1月當時資料）

小玉電車、士多啤梨電車⋯⋯和歌山電鐵貴志川線獨特主題電車

和歌山電鐵貴志川線嘅最大特色，莫過於擁有多架精心設計下所誕生嘅主題電車。貴志川線招牌電車「小玉電車」車身上，有成101隻擺出各種表情、唔同動作嘅貓站長小玉嘅彩繪圖案，可愛又療癒。車廂內嘅把手設計，亦用上小玉站長身上嘅3種顏色，車內外設計繽紛又夢幻，令人瞬間會忘記正身處電車裡面。有機會搭小玉電車嘅話，絕對要有心理準備，可能會令您忍唔住由上車影到落車，一下子就到達目的地！

除此之外，喺2021年12月隆重登場嘅「小玉電車博物館號」亦不容錯過。電車內從地板、天花板，到插圖、電車擺飾等，都充滿貓站長小玉嘅蹤影，據聞有成777隻咁多。周圍都充滿貓咪，絕對係貓奴必搭，就算唔係貓奴都好想搭嘅夢幻電車！

另外，以貴志站周邊特產士多啤梨為主題設計嘅「士多啤梨電車」，以和歌山名產嘅世界頂級「南高梅」為主題設計「梅星電車」等，和歌山電鐵陸續推出以當地周邊地區特產為主題嘅宣傳特色電車，希望搭電車嘅旅客更能投入享受當地旅途嘅好時光。

想要知道以上主題電車嘅詳細班次，可以上和歌山電鐵官網查詢相關時間表。（日文之外亦有提供英文頁面）

→ https://www.wakayama-dentetsu.co.jp/timetable/mobileE/

DESIGNED BY EIJI MITOOKA + DON DESIGN ASSOCIATES

貴志站「小玉車站」商店＆ Café

貴志站小玉Café

小玉Café提供各種以貓站長小玉為主題設計嘅創意菜式，從輕食到飲品應有盡有，如「意式雪糕夾心冰餅套餐」（580日圓～）、唔係熱狗嘅「熱貓」（單點360日圓）等，造型可愛又好味道。

• 營業日：全年無休
  ※有可能因內部維修暫停營業（定休日：不定期）
• 營業時間：10：00～16：00

貴志站小玉商店

小玉商店內販售小玉站長、二代玉、四代玉嘅可愛周邊商品，同時亦販售1日乘車券、各種回數票券等。

• 營業日：六日及公眾假期（連假等期間營業資訊請上官網查詢）
• 營業時間：11：00～16：00

「和歌山電鐵 貴志川線」沿線旅遊名勝

其實貴志川線嘅知名景點除咗貴志站，仲有其他好去處。例如沿線嘅甘露寺站，有一個擁有眾多水鳥棲息嘅「平池綠地公園」，被當地居民稱為「野鳥的樂園」；又例如大池遊園站「大池遊園」，可以飽覽日本四季自然美景，如櫻花、杜鵑花、紅葉等動人景致。另外，貴志站附近盛產士多啤梨，冬天去嘅話推薦大家順便去摘士多啤梨喔。

和歌山電鐵貴志川線貴志站資訊

• 地址：和歌山縣紀之州市貴志川町神戶
• 注意事項：車站附近並無停車場。