大家有聽名為「小玉」嘅日本貓站長嗎？「小玉」貓站長喺2007年上任，駐守於和歌山縣「和歌山電鐵貴志川線」貴志站，喺成為貓站長之前佢其實係住喺車站附近商店裡嘅一隻普通猫咪！今次小編就會為大家介紹貓站長「小玉」嘅誕生過程，了解一下呢位「站長」嘅傳奇故事～
擔任站長之前嘅小玉貓咪
「點解貓咪會被委任成為站長？」應該有唔少人會有以上嘅疑問，一於就等小編同大家講解一下！
小玉喺擔任站長之前，居住喺貴志站旁商店裡面嘅貓咪小屋，由於小玉個性沉穩溫柔，街坊街里都對小玉寵愛有加。小玉每日同商店裡嘅熟客、搭電車嘅乘客等溫馨日常，已經成為當地居民生活嘅一部分。突然有一日，小玉所住嘅貓咪小屋被命令搬走，由於貴志川線長期經營虧損，喺當地居民熱心奔走之下，促使相關單位行動，公開募得願意接管貴志川線營運嘅鐵路公司，令貴志川線得以保留。一連串過程後，貓咪小屋所在土地亦成為貴志川町（現為紀之川市）嘅公有地。
一直為煩惱失去貓咪小屋後小玉將流落街頭嘅商店老闆娘，突然靈機一閃，決定採取一個大膽舉動！
「不得了喇！小玉佢⋯」一句話改變小玉一生！
2006年4月1日係改變小玉一生嘅日子。話說喺2006年4月1日，當和歌山電鐵股份有限公司嘅開業紀念典禮活動結束後，正準備離開嘅小嶋光信社長，聽到商店老闆娘大聲嗌：「社長、社長、不得了喇！小玉佢⋯小玉佢⋯」，社長無辦法充耳不聞，於是就決定去探望小玉。
當小嶋社長見到小玉，目光相對嘅瞬間，突然有種小玉好似同緊小嶋社長講「我要做貴志站嘅站長」嘅感覺。但由於車站屬於公共場所、唔可以養貓，小嶋社長於是就諗到一個辦法，就係賦與小玉貓站長一職，令小玉變成一隻並非被人飼養嘅貓咪，而係「貓站長」！
商店老闆娘聽到提議之後滿心歡喜，小玉就係因為咁，喺2007年1月5日，正式成為全球第一隻貓站長，喺貴志站肩負重大責任。
小玉站長從「車站明星貓咪」一躍成為「日本第一超級貓咪」！
貓站長上任一事令小玉一炮而紅，唔單止媒體爭相報導，遊客亦聞風而至，成為人氣熱話。原本只有當地居民先會搭嘅貴志川線，更吸引嚟自日本各地嘅遊客，專程到此一搭貴志川線電車，就係為咗見貓站長一面。萌爆嘅小玉站長，擄獲唔少人嘅心，掀起一股空前絕後嘅貓咪風潮。自從小玉擔任站長之後，據聞第1年所帶嚟嘅經濟效益，居然高達11億日圓，簡直係驚為天人！
2021年改裝之熱門「小玉電車博物館號」
另外仲有以小玉站長為設計主題、車身以小玉站長插畫作為彩繪圖案粉飾嘅「小玉電車」、小玉站長周邊商品、「貴志站小玉博物館」等等相繼面世，爆紅風潮完全沒法擋（順帶一提，貴志站屋頂上有「貓眼」又有「貓耳朵」，成個「貓樣」咁嘅外觀非常過癮）！小玉站長上任後所創造嘅連漪效應，成功振興和歌山旅遊與當地大眾運輸，而小玉站長更加係以極快速度升職，喺2013年成為代理社長。原本只係住喺車站旁商店貓咪小屋嘅小玉，機緣巧合下令連年赤字虧損嘅貴志川線起死回生，成為拯救車站嘅超級貓咪。
小玉站長嘅傳奇故事更加係傳遍海外，嚟自亞洲嘅遊客人數急速增加，大家都想要親眼一睹小玉站長嘅萌爆姿態。另外，小玉站長更曾參與法國電影《找貓咪》嘅演出，成為日本知名嘅貓咪演員。
小玉站長嘅離去，令眾人悲痛不已
2015年6月22日，小玉站長因為急性心臟衰竭逝世。鐵路公司為小玉站長舉辦喪禮，當時有3,000名粉絲前來悼念小玉站長嘅離世。多間海外媒體亦有報導小玉站長過世嘅消息，全球各地粉絲紛紛表達哀悼之意。
小玉過世之後被追封為永久名譽站長，並喺貴志站興建一座「小玉神社」，祭祀小玉嘅靈魂。小玉站長直至現今，仍然喺貴志站靜靜地守護著乘客，希望大家出入平安。
二代玉、四代玉喺貴志站繼承小玉精神！和歌山電鐵貴志川線等候遊客大駕光臨
左：小玉二世站長（二代玉）右：四代玉
所幸嘅係，小玉站長後繼有人，其下屬小玉二世站長（二代玉）喺貴志站、四代玉則喺伊太祈曾站（星期三、星期四喺貴志站擔任代理站長）繼承小玉精神，開心地等候乘客大駕光臨。下次去到和歌山縣，除咗可以搭電車，欣賞沿途田園悠閒景緻之外，推薦大家可以順道去探訪萌爆嘅貓站長，療癒身心好好放鬆一番，出發前記得要事先查一下2位站長當日嘅行程喇！
和歌山電鐵貴志川線貴志站資訊
- 地址：和歌山縣紀之州市貴志川町神戶
- 注意事項：車站附近並無停車場。
Comments