2022年迎接20週年嘅Sanrio卡通明星「肉桂狗」，憑著一對大耳仔再加上好似肉桂捲嘅可愛尾巴，無論喺日本或海外都擁有超高人氣。大家知道萌萌可愛嘅「肉桂狗」其實都有自己嘅主題餐廳嗎？而且店舖地址就喺東京都內，仲係外國遊客經常會去嘅新宿三丁目！呢間「肉桂狗主題Café（Cinnamoroll Café）」肯定會成為Sanrio粉絲不容錯過嘅經典朝聖景點。今次為咗鍾意Sanrio明星，特別係鐘意肉桂狗嘅朋友們，FUN! JAPAN編輯部決定特別親身去採訪，為大家獻上肉桂狗主題餐廳最新情報！
「肉桂狗主題Café 新宿丸井ANNEX店」距離東京METRO新宿三丁目站只有3分鐘！
「肉桂狗主題Café（Cinnamoroll Cafe） 新宿丸井ANNEX店」距離東京METRO新宿三丁目站只需3分鐘，就算從JR新宿站行過去，都唔使10分鐘，交通相當方便！
「肉桂狗主題Café」顧名思義，就係店舖裡面嘅主角清一色都係肉桂狗！可愛嘅肉桂狗受好朋友們會喺到候大家光臨，店內隨處可見主角肉桂狗萌萌可愛嘅身影！
店舖裡面嘅座椅亦擺放著肉桂狗嘅公仔，仲可以見到掛著肉桂狗與眾多好朋友們嘅相片等，成個空間可愛又溫馨，相當療癒。鍾意肉桂狗嘅朋友，淨係置身喺呢個空間應該就己經覺得相當幸福吧～？
不經意抬頭一望，發現靠近天花板嘅地方居然又有一隻帶著可愛笑容嘅肉桂狗！
可愛度爆燈！獨家創意造型美食＆甜品應有盡有
「肉桂狗主題Café 新宿丸井ANNEX店」最吸引人嘅就係獨家設計創意造型美食&甜品&飲品，種類多元豐富。菜單上嘅造型美食設計全部參考自可愛明星角色，可愛度爆晒燈叫人根本唔捨得食！除此之外，超級適合影打卡靚相&「呃 Like」相嘅甜品與飲品選擇非常多，唔單止好味道外型更加係得意到令人心花怒放。
「肉桂狗主題Café 新宿丸井ANNEX店」除咗可以安排當成正餐之外，喺新宿附近行街行到攰嘅話，都可以入嚟抖一抖，享受一個悠閒嘅下午茶時光。滿足自己味蕾之餘，就連手機都可以齊齊食飽，事關會忍唔住係咁不停「相機食先」，佔去唔少手機容量！
另外，店內亦會不定期舉辦活動推出期間限定菜單。隨著四季轉變，會舉辦秋季活動、冬季活動等季節感滿載嘅活動，過去仲曾經與《許願兔》、《新世紀福音戰士》聯名合作！
「晚安奄列蛋包飯」可以見到肉桂狗瞓喺軟綿綿嘅奄列蛋棉被裡面，瞓得又香又甜嘅模樣，真係太得意喇！鬆軟綿密嘅奄列蛋淋上另外附上嘅番茄醬，令人食完仲想食多一碟！
「遙遠天空的藍色俄羅斯酸忌廉牛肉飯」係以肉桂狗出生嘅遙遠天空白雲為設計主題，藍藍天空實際上係使用大量牛奶與酸忌廉所熬煮嘅醬汁裡面再添加食用色素，先至呈現出咁夢幻嘅藍色。
然後就係「肉桂狗特製造型蛋糕」，超級可愛又療癒，一送到上餐檯，令人望見都不禁會心微笑，大叫「Kawaii！」
戚風莓莓新地內加入咗莓果、鮮忌廉仲有Yogurt，食落甜而不膩。鐘意朱古力味嘅朋友，可以點「莫卡朱古力朱古力新地」。
可可惡作劇卡布奇諾／858日圓（含稅）
店內提供嘅飲品，非常適合下午茶時光。部分項目提供外賣服務，不妨點杯飲品拎走繼續行街或者返酒店慢慢嘆都唔錯♪
新宿丸井ANNEX店肉桂狗獨家周邊商品！
喺等待美味菜式上菜嘅同時，不妨去周邊商品區行個圈。喺入口隔離有一個周邊商品區，架上所陳列嘅肉桂狗商品種類豐富齊全，無論係碟、杯等各式各樣為家中餐檯增添氣息嘅餐具，抑或係紙巾收納袋、Tote Bag等實用嘅生活雜貨、小物都一應俱全。
新宿丸井ANNEX店亦有獨家嘅肉桂狗商品，錯過就非常可惜，鍾意肉桂狗嘅朋友一定要買嚟收藏！
呢間位於新宿三丁目附近嘅「肉桂狗主題Café新宿丸井ANNEX店」營業時間到夜晚9點半，喺結束一日嘅Shopping購物或玩樂行程後，返酒店之前如果尚早嘅話，推薦大家嚟感受一下肉桂狗療癒迷人嘅魅力！特別係住喺新宿附近嘅讀者呀！！！！
※本文章所刊登嘅商品及售價，全部都係根據採訪當時嘅內容。
店舖資訊
- 店名：肉桂狗主題Café（Cinnamoroll Cafe） 新宿丸井ANNEX店
- 地址：東京都新宿區新宿3丁目1-26 新宿丸井百貨 ANNEX（別館）
- 交通方式：
- 從東京Metro「新宿三丁目」站徒步約3分鐘
- 從東京Metro「新宿」站徒步約6分鐘
- 營業時間：11：00～21：30（最後點餐時間為 21：00）
※目前營業時間縮短為 11：00～20：00（最後點餐時間為19：30）
※無法事先訂位
©️’22 SANRIO CO., LTD ARRR. NO. S621853
Comments