「西武園遊樂園」位於埼玉縣所澤市，從東京都中心搭1個鐘電車就到。自1950年（昭和25年）開園以來，深受各年齡層愛戴嘅西武園遊樂園以「被溫暖心靈嘅幸福感所包圍嘅世界」為主題概念，將園區升級改造，全新面貌嘅西武園遊樂園於2021年5月華麗登場！不分國籍、年齡，男女老少，去到全新嘅西武園遊樂園都可以大玩特玩令人流連忘返！即刻跟著FUN!編腳步，去一探全新面貌嘅西武園遊樂園有幾咁刺激好玩！
首先！先兌換園內貨幣「西武園通貨」
一到「西武園遊樂園站」，就好似搭咗時光機一樣，即將展開一場穿越時空夢幻旅程！聽見車站月台播放著懷舊嘅音樂旋律，昭和時代感十足，令人未出發先興奮！車站正前方所擺設嘅路面電車，曾經係真真正正行駛過嘅車廂，仲可以行入裡面參觀，不妨趁機喺度影返張相留倩影。
售票處位於充滿懷舊感嘅電影招牌下方，除咗買入場券之外，記得兌換園內貨幣「西武園通貨」。
西武園遊樂園裡面所有餐廳、賣店等等都必須用園內貨幣「西武園通貨」消費，園內貨幣面額刻意符合當時嘅物價，務求令每一位去到西武園遊樂園嘅人士都可以全情投入，感受昔日懷舊風光！貨幣面額分為「百園」同「拾園」，600日圓可以兌換「50園」。值得一提嘅係，貨幣上所繪畫嘅圖案係手塚治虫嘅代表作「小白獅」。FUN!編建議首先喺呢度換定園內貨幣，唔夠嘅話，可以喺樂園裡面嘅「夕日丘郵局」再兌換就OK。如果心大心細唔知兌換幾多至好，不妨先兌換「300園」傍身。
復古璀璨嘅商店街 洋溢昭和熱情 精彩無比
精彩重點①：彷如穿越時空嘅商店街！到處都係打卡位
相信大家喺日本電影、日劇都有見過類似場景？「夕日之丘商店街」重現1960年嘅街景，商店街嘅一景一物，完全重現當年嘅日本！對於曾經經歷過昭和時代嘅大人嚟講，懷舊感十足；對於年輕世代嚟講，充滿無限新鮮感！無論係咩世代都可以體驗得到「夕日之丘商店街」充滿人情味嘅溫暖，昭和時代獨特嘅熱情與活力！
「夕日之丘商店街」嘅店舖，無論係裝修、設計都完全重現舊日風情，而且每間店舖都係舊時生活當中不可或缺嘅一切。漫步於「夕日之丘商店街」就好似行咗入去時光隧道一樣，親身體驗昭和時代，非常過癮！機會難得，記得要影返張充滿昭和復古氣息嘅打卡相啊～
精彩重點②：商店街內日常生活當中嘅街坊老友記！
夕日之丘商店街實際上係一個表演舞台！魚檔老闆嘅裝扮、一舉一動、說話方式，完美呈現昔日真正魚檔老闆嘅風範。另外，接咗勁多外賣單，揹著一個又一個嘅木箱，踩著單車嘅外賣哥哥仔嘅神級踩單車技巧，亦相當吸睛！
無論係將蔬菜、水果擺上檯面叫賣嘅蔬果店老闆、警察、做壞事嘅賊仔小偷等等，統統充滿活力與熱情，完全融入夕日之丘商店街日常嘅戲劇性表演，隨時隨地喺您眼前上演！漫步商店街嘅時候，一定要準備好您嘅金睛火眼留意身邊周圍事物，分分鐘會有意想不到嘅驚喜演出喺您身邊隨時開演。
精彩重點③：日本國內都成為熱話嘅昭和美食！
夕日之丘商店街有2間餐廳，分別係「喫茶VICTORIA」西式餐廳以及「食堂助六屋」日式餐廳。另外，仲有賣燒魷魚、糰子、日式薯餅（又名可樂餅）等等種類豐富嘅小食。FUN! 編今次點咗個昭和經典美食「拿破崙意粉」。彈牙煙韌嘅意粉同香腸齊齊放入口再咬開嗰刻，特製嘅蕃茄醬甜味瞬間喺嘴裡面擴散開，令人食完一啖又一啖，美味程度令人再三回味！
一講到昭和甜品，又點會少得呢款「法式布甸芭菲」。放上水果同呍呢嗱雪糕等配料，非常繽紛可愛，布甸搭配新鮮水果簡直係人生一大享受！色彩鮮豔嘅飲品亦係必點項目之一！望落好似寶石盒一樣璀璨閃耀嘅「賓治酒」同碧綠色「漂浮汽水」吸睛指數極高！不妨喺充滿復古風情嘅Café裡面，品嚐一下正宗嘅昭和時代美食！
「哥斯拉 The Ride 大怪獸頂上決戰」大家熟悉嘅巨大怪獸哥斯拉刺激新體驗！
園內戲院「夕陽館」裡面上映「哥斯拉 The Ride 大怪獸頂上決戰」，係全球首間※以昭和經典嘅巨大怪獸哥斯拉為主題嘅大型遊樂設施（※全球首間常設嘅哥斯拉遊樂設施）。1954年喺日本誕生嘅哥斯拉，以驚人魅力獲得世界各地嘅粉絲喜愛。呢一個世界聞名嘅經典怪獸哥斯拉，會喺西武園遊樂園夕陽館華麗登場。
「哥斯拉 The Ride 大怪獸頂上決戰」唔單止係一場電影，更加係一個帶畀觀眾全新感官體驗嘅大型遊樂設施。觀眾會搭上特殊裝甲車，完全融入電影所營造嘅世界，哥斯拉同其他怪獸嘅激烈戰爭就喺眼前開戰，絕對係臨場感十足嘅遊樂設施！有機會記得要去會一會哥斯拉，享受前所未有嘅刺激體驗！
「Let’s Go！LEO LAND」日本引以為傲嘅動漫主題專區
被譽為漫畫之神嘅手塚治虫，唔單止影響日本漫畫界，更為全球漫畫文化帶嚟大幅度嘅改變，影響深遠。手塚治虫嘅作品風靡一代又一代觀眾，至今仍然被受愛戴，人氣歷久不衰。
手塚治虫筆下嘅著名作品《小飛俠阿童木》、《小白獅》等等當中嘅經典角色，會化身成令人樂而忘返嘅「Let’s Go！LEO LAND」主題專區，懷舊感十足令人玩足一日都唔夠！臨走前記得要去周邊商店行個圈，揀返件獨家限定嘅周邊商品返屋企啊！
景點資訊
Comments