日本係一個經常落雨嘅國家。特別係換季嘅時候，總係陰雨綿綿。先有送春迎夏期間嘅梅雨季，夏去秋來嘅時候又會出現陣陣秋雨，再加上颱風來襲，一年四季總有唔少日子係落雨天。近年由於氣候異常，更係不斷出現破紀錄嘅豪雨。
為咗令大家今後去日本旅行嘅時候，即使遇到大雨警報都可以做足準備功夫，唔會因為落雨而掃旅遊興致，今次小編就為大家介紹一下有關日本落雨天時嘅旁身錦囊～
日本一年降雨量居然高達世界平均降雨量約2倍之多！
日本位於季風亞洲（Monsoon Asia）內多雨地帶嘅東邊區域，屬降雨量非常多嘅國家。一年平均降雨量有成1,718mm，高達世界平均降雨量（880mm）嘅兩倍！
隨著唔同季節，降雨量亦有相當大嘅落差，主要集中喺梅雨季及颱風季。日本國內51個觀測地點統計出過往120年期間所觀測出嘅資料顯示（1901年～2020年），一年單日降雨量超過100毫米或200毫米嘅大雨日數越嚟越多，而大雨發生次數亦有出現激烈嘅大變化，梅雨鋒面嘅滯留以及積雨雲嘅發展旺盛，引致所降下嘅豪雨量屢次打破紀錄，釀成唔少災害。
大雨、豪雨無情摧殘下天災頻生
近年因為大雨所造成嘅災害不斷，經常會見到相關災害嘅新聞報導，例如係2019年10月颱風19號（颱風海貝思）嘅猛烈豪雨為關東、東北地區帶嚟嚴重災情，出現多處河川氾濫崩堤；2020年7月熊本縣破紀錄嘅降雨量引致豪雨成災；2021年熱海市伊豆山因豪雨造成土石流，直至現今各地嘅災後重建仍然不斷持續進行。
氣候變遷影響之下，大雨與瞬間局部性大雨所發生嘅頻率有越嚟越多嘅傾向。與此同時，一直唔落雨嘅日數亦增加，降雨模式越嚟越呈極端化，更加難以預料天氣變化為生活所帶嚟嘅影響。
因大雨釀成嘅二次災害
雨勢過大而引致河川氾濫、山坡土石流等等第二次災害，因此即使大雨、集中豪雨期間停雨後亦唔可以鬆懈，要格外小心留意周遭狀況。小編跟著落嚟就會同大家簡單說明一下相關災害嘅種類。
土砂災害
大雨嘅第二次災害當中，一般比較為人熟悉就係土砂災害。關於應該如何避免遇上土砂災害，就要先確認自己所身處位置係咪「土砂災害潛在尾險地區」，每當落雨時，就必須小心留意土砂災害警戒訊息，如果身處地方被納入警戒訊息地區，請儘早疏散避難，以防萬一。
- 邊坡崩塌（がけ崩れ）
即滲透入土地當中嘅水分過多，土壤失去原有承載能力，再加上大雨、地震，令到傾斜坡嘅土砂、岩石等等突然塌陷崩落。當山崖有碎裂嘅石頭不斷跌落、斜坡有水噴出，或湧出嚟嘅水呈現混濁，抑或聽到斜坡地鳴等等現象就可能係邊坡崩塌嘅先兆。
- 地滑（地すべり）
傾斜嘅土地有一部分或大部分因為地下水等影響，緩慢地往下滑動。當出現地鳴等聲音，地面出現龜裂、高低落差，懸崖或山坡有水噴出等等都係先兆，要小心可能會發生地滑現象。
- 土石流（土石流）
土石流亦稱泥石流。山區或山谷等地嘅土石、石砂因長時間嘅降雨或集中豪雨，混合著大量嘅雨水，一口氣被沖到河流嘅下游等低處流動。出現山鳴聲、河川嘅水突然變得混濁、聞到腐敗泥土味，或者明明落緊雨，河川水位卻快速下降等等，發現以上提及嘅現象，最好要加倍留神，盡快疏散避難。
洪水災害
因大雨等因素導致河川水量增加，水位異常高漲淹過堤防、或因為沖刷而令到堤防崩堤、崩壞、河川氾濫等等災害發生。當日本氣象廳發出洪水警報、某某河川氾濫警戒訊息時，如果您咁啱喺附近嘅話，一定要小心留意。
水浸災害
因大雨、暴雨等等導致地面水增加，排水功能無法及時發揮作用，就會令到排水設施、下水道等等出現水浸、泛濫蔓延嘅情況，使大量雨水湧入民宅或淹沒田地。
見到大雨特別警報、警戒等級「Level4」嘅話請立即避難！
為咗令居民可以直接了當地理解各災害發生嘅危險程度以及各災害必須採取嘅避難措施，因此日本當地會按照氣象資訊，將警戒等級以5個階段去區分並設計成一系列避難訊息表。警戒已於2021年（令和3年）5月起改訂為新版本，詳細警戒等級與各項因應措施如下：
Level1（預警訊息）
表示未來5日內發出氣象警報嘅可能性，將早期預警訊息分為［高］、［中］兩個階段。
- 理應採取嘅行動：提高防災意識，做好可能發生災害嘅心理準備
Level2（大雨、洪水或暴潮注意報）
危險指數（黃），發出大雨、洪水或暴潮等等注意報。
- 理應採取嘅行動：確認自身嘅避難行動路線。從潛在災害地圖等等確認身處地方等地受災風險，並再次確認是否已經掌握好避難路線等等避難所需資訊。
Level3（老年人等疏散避難）
危險指數（紅），發出大雨（土砂災害）、洪水警報、氾濫警戒資訊等等。
- 理應採取嘅行動：老年人或行動不便者等人優先避難，遠離危險地方並疏散至安全地方。另外其他民眾依照必要狀況，停止日常行動，開始準備避難或自行避難。
Level4（避難指示）
危險指數（紫），發出土砂災害警戒資訊、氾濫危險資訊、暴潮警報、暴潮特別警報等等。
- 理應採取嘅行動：所有人應儘快離開危險地區，前往避難。
Level5（緊急安全措施）
危險指數（黑），發出大雨特別警報、氾濫發生訊息。
- 理應採取嘅行動：有生命危險！做好緊急安全措施！無法立即安全避難的話，生命就有可能處於相當危急嘅狀況。
當警戒等級升到去Level5嘅時候，表示災害經已發生，或情況非常緊迫。一旦發出危險指數（黑），可能一切經已太遲，會趕唔切逃離，所以當警戒去到等級4嘅時候，就應該儘早為咗自身安全去避難！
日本旅行嘅時候如果遇上大雨等天氣警報，應該點做至好？
喺日本旅遊嘅時候，如果遇上惡劣天氣，除咗隨時隨地要留意氣象預報之外，想要知道自己所在嘅地方安唔安全，或有無發出過任何警報等資訊，可以上日本氣象廳網站確認係咪曾經發出過氣象警報或注意報道等等相關資訊。另外仲可以Download「Safety tips」呢個App。
「Safety tips」係為咗令訪日外國旅客能夠安心暢遊日本，以推播訊息（Push Notification）通知地震、大雨等相關警報，並可以查詢因應災害等相關資訊，唔單止有疏散避難流程圖表，可以話畀大家知目前狀況下應該採取嘅行動、仲有災害應急對話，等旅客可以順利與當地居民溝通、獲得相關資訊，提供與災害相關嘅實用資訊網站連結等。「Safety tips」支援15種語言，喺出發日本旅遊之前Download定，就可以安心暢遊日本喇。另外，您亦可以向住宿單位嘅工作人員查詢相關嘅天氣狀況，或當地避難場所等等與避難相關資訊。
除咗確認自己住宿地方嘅安全之外，亦要留意想要去嘅旅遊目的地會唔會係受災區，或者係經已發佈警報嘅地區。出發前記得查好目的地交通、旅遊設施等相關資訊，確認交通係咪正常行駛，又或相關旅遊設施係咪正常營業等等，以上種種資訊都可以經由各大交通公司或旅遊設施做足準備。事先知道相關避難手段與措施，以及安全資訊係相當重要！
踏上旅程之前，可以上日本國土交通省的防災資訊網，瞭解各式各樣嘅防災資訊。正所謂「未雨綢繆方能防範於未然」 ，事先調查好，做足功課，自然可以令到您嘅日本之旅玩得開心又安心啦～
Comments