無論係熱愛運動嘅您、抑或係最近硬係覺得運動量唔夠嘅您，統統準備好您嘅金腈火眼望過嚟！唔知大家有無聽聞過日本相當流行嘅「暗黑拳擊有氧」呢？
最近日本健身風潮興起，就算係成日忙到無時停嘅日本人都紛紛抽時間去健身室運動，而且入埋會Keep住去嘅人都唔少！透過運動紓解日常累積嘅壓力，唔單止有益於身體健康，據聞亦有助於心理健康。但一講到做運動，實際上有唔少人對健身室卻步，成日都係得個諗字…「要帶健身用品好麻煩」、「喺一大堆人面前運動，怕羞到令人尷尬癌發作」等心聲，係咪老是常出現先？
目前喺東京相當流行嘅暗黑拳擊有氧「TOY VOX」，就將以上藉口與煩惱統統解決，令您可以輕輕鬆鬆行入健身室盡情揮灑汗水，好好享受一下做運動所帶嚟嘅樂趣。今次FUN! JAPAN編輯部親身去到位於東京澀谷嘅「TOY VOX」參加課程體驗，幫大家感受一下「TOY VOX」嘅魅力所在！
日本人氣熱話！暗黑拳擊有氧健身室「TOY VOX」
「TOY VOX」主題為「持續挑戰健身極限」，係一間由日本暗黑拳擊健身品牌領導者「b-monster」所策劃而打造出全新型態、與眾不同嘅最新最潮暗黑拳擊有氧健身室。廢話少講，即刻跟著小編去睇睇有何玄機！
兩手空空就可以輕輕鬆鬆參加體驗課程！
日本暗黑拳擊有氧健身室「TOY VOX」究竟係一個點樣嘅地方？或者有人唔鍾意未清楚了解課程內容就加入會員，咁就非常建議可以先參加體驗課程。參加體驗課程所需要嘅T-shirt和手套，健身室都會準備好，等您放工之後兩手空空就可以輕鬆參加。
參加體驗課程前請先去櫃檯領取運動衫、毛巾、同埋一枝水。去更衣室換完運動衫之後，就可以出發去體驗課程嘅教室。
一去到教室所在樓層，如夜店、CLUB般嘅重低音立刻響遍成個空間，令人身體不禁隨著音樂節奏擺動、心情莫名激動。「TOY VOX」從2021年5月開幕至今，主要客戶年齡層係20幾歲～30幾歲，會員多數係住喺澀谷或者喺澀谷附近返工嘅人，當然亦有從遠方專程嚟享受呢間健身室所營造出嘅非日常空間，感受一下與日常不一樣嘅氣氛。（細細聱：小編第一次見到一個又一個散發著淡霓虹光芒嘅沙包！）
令人驚嘆嘅逼真演出！？「虛擬PERFORMER」蒞臨指導
「TOY VOX」稱健身教練為「PERFORMER」，各有各個性與獨特上堂風格。喺多位PERFORMER當中，仲有一位超越次元存在嘅特別「虛擬PERFORMER」，以最先進3D立體全息投影打造而成！
「虛擬PERFORMER」特色係利用3D立體全息投影，將獨創角色以真人大細投影於學員面前，逼真程度根本同真人出現喺您面前無分別，帶住大家郁動手腳，現場感魄力十足！可以留意一下虛擬健身教練嘅裝扮，完全係時下澀谷街頭流行風格。正因為係虛擬角色，更可以呈現出別具風格嘅表演，帶畀大家一個非日常嘅特別體驗。
另外，配搭VJ（Video Jocker／影像騎師）播放嘅影像效果，令PERFORMER一舉手一投足更加精彩，打造出一場「前所未有嘅特別體驗」，難怪「TOY VOX」健身課程成為時下日本討論熱話。
實際體驗無需在意他人眼光 可以全神貫注專注於暗黑拳擊有氧！
體驗課程進行開始之前，PERFORMER會仔細說明課程編排、健身效果以及相關動作。重點係成間教室黑鼆鼆，完全無需在意周圍嘅目光，盡情自在地揮舞手腳，真係令人未打先興奮。就算一個人去運動都可以全神貫注、專注地健身。
PERFORMER充滿活力嘅聲音與加油聲，再配搭音樂節奏，令人不禁跟著「動起來」，不加思索地全力去打、去踢擊眼前嘅沙包，甚至會嚟個瘋狂連打！感覺就好似參加一場DJ活動，情緒隨著現場氣氛不斷高漲，喺瘋狂拳打腳踢眼前沙包嘅同時，不知不覺體驗課程就去到尾聲。
體驗課程全程35分鐘，期間比想像中激烈爆汗，簡直係汗流浹背，徹底運用到全身。出拳、踢腳等動作，幾乎全身上下每個肌肉都有郁動到，盡情地拳打腳踢一番，順便發洩情緒舒緩減壓。
對於自從學校畢業之後，幾乎零運動嘅小編嚟講，突然去體驗一場「暗黑拳擊有氧」，簡直係高難度挑戰！但實際體驗過之後，發現唔單止可以舒緩減壓，仲可以鍛鍊體態，打得非常開心！
上完課程之後，當然可以直接返屋企，但如果想要擺脫一身汗臭，清清爽爽返歸嘅話，不妨使用健身室裡面嘅淋浴設備。沖完涼洗乾淨之後，仲可以順便喺澀谷行街買嘢，Shopping一番！
另外，健身室裡面盡量避免使用用完即丟嘅塑膠製品，選用天然材料製成，可以長久使用嘅梳、回收材料製成嘅筆等等，喺經營概念上亦因應可持續性及環境友善等解決社會問題，積極推動相關措施。
「TOY VOX」精心講究課程編排
今次小!編所體驗嘅課程全程為35分鐘，健身室喺課程編排方面亦相當講究，一共分為：暖身環節10分鐘（提高心率間歇式訓練達到暖身效果）、Shadow環節5分鐘（確認並練習出拳、踢擊正確動作）、沙包環節20分鐘（縱情地踢打沙包，出盡全力），共3個環節以達到全身運動效果。自然地達到高強度嘅有氧運動，效果係慢跑嘅1.5倍，不禁令人期待上完一堂課之後會消耗幾多熱量。
詢問完工作人員之後得知，「TOY VOX」一堂35分鐘課程，可以消耗500～800卡路里，所達成嘅效果係一般健身難以匹比，令人朝著短時間達成塑造理想體態嘅目標邁進，擁有人人羨慕嘅健美肌肉。睇到每位PERFORMER教練嘅完美體態，簡直就係「TOY VOX」最佳代言！
今次為大家介紹東京現正流行嘅暗黑拳擊有氧健身室「TOY VOX」，連唔擅長運動嘅小編都打得非常開心！鍾意健身嘅人，下次有機會去東京嘅話，推薦您可以參加體驗課程，親身體驗一番！
設施情報
- 名稱：TOY VOX
- 地址：東京都澀谷區宇田川町20-11 澀谷三葉大樓B1F
- 營業時間：06：30～22：45
- 交通：
- 從JR各線「澀谷」站徒步約6分鐘
- 從半藏門線／副都心線／東急東橫線／東急田園都市線「澀谷」站6號出口，徒步約3分鐘；8號出口徒步約5分鐘
- 京王井之頭線「澀谷」站中央口驗票閘門，徒步約8分鐘
Comments