日本四季分明、水質優良，加上日本農業「職人」致力於品種改良等因素，因此所孕育出嘅水果唔止好味，仲夠晒「靚仔」，日本水果禮盒更加係逢年過節必備嘅送禮首選之一。唔少港人去日本旅行會去買當季水果返嚟慢慢嘆之外，仲會去當地農園親身感受CP值非常高嘅「即摘即食」採摘體驗，絕對係玩得開心食得興奮嘅一環！出發前「頭痕痕」究竟而家當造水果係邊款？同埋要去邊間果園至好？今次小編就搵咗有關日本岩手縣一年四季嘅當造水果、與精選果園資訊同大家分享，記得要bookmark定呢篇文，下次想去日本體驗水果「即摘即食」嘅時候，就唔怕「搲爆頭」喇！
岩手縣時令特產水果
岩手縣除咗擁有清新香氣與濃郁甜味嘅蘋果之外，其實仲有唔少鮮甜水果等大家去品嚐。岩手縣一年四季都有當造嘅新鮮水果，當地農場、觀光果園都會提供「即摘即食」，甚至會有任食方案嘅採摘體驗，相當抵食又抵玩，諗起都流口水！
- 士多啤梨：1月～6月
- 車厘子：6月中～7月中
- 藍莓：7月～8月中
- 葡萄：7月～12月（採摘時期因品種而異）
- 蘋果：9月～11月
感受甜入心嘅戀愛滋味！嬌嫩鮮甜士多啤梨盡在「彩花園」（八幡平）
位於岩手縣八幡平地區嘅「彩花園」，係當地摘士多啤梨體驗嘅熱門選擇之一。「彩花園」提供5種士多啤梨品種，其中1種係相當夢幻嘅「白色士多啤梨」，顏色有別於一般鮮紅欲滴嘅士多啤梨，偏白色嘅外表俘虜唔少「士多啤梨迷」嘅心。無論係紅色定白色，味道都係粒粒甜入心，令人欲罷不能摘完一粒又一粒。
「摘士多啤梨體驗」當造季落於1月至6月底，根據唔同品種，採摘時期亦有所差異。價錢方面成人（中學生以上）係1,980日圓、小學生1,750日圓、小童（3歲以上）係1,100日圓，限時任食1小時。
景點資訊
- 景點名：彩花園
- 地址：岩手縣八幡平市大更31-111-3
- 交通方式：乘搭JR花輪線至大更站，步行約30分鐘或揸車約5分鐘
- 營業時間：09:00～15:00
「太陽農場」品嚐鮮紅欲滴車厘子（盛岡）
太陽農場長年經營水果經銷生產，代代傳承至今，現時已經歷到第11代農業「職人」，歷史超過300年！太陽農場每代農業職人們都耗費一生精力，致力追求水果孕育栽培與採摘技術等不斷精進改良。農場提供10種車厘子品種供採摘，從早熟至晚熟品種都應有盡有，鍾意車厘子嘅您絕不可錯過喔。
「摘車厘子體驗」限時任食30分鐘，價錢為成人1,500日圓、小學生以下1,000日圓、3歲以下免費。另外，太陽農場內仲有賣車厘子，一盒500日圓咋！
景點資訊
- 景點名：太陽農場 盛岡櫻桃農園
- 地址：岩手縣盛岡市向中野新田7（日赤醫院後方）
- 交通方式：從盛岡南IC交匯處揸車約8分鐘
- 營業時間：10:00～17:30
清新酸甜藍莓就在「Daiwa藍莓園」（花卷）
「「DAIWA藍莓園」所種植嘅藍莓品種多達30幾種，步入藍莓園嘅一瞬間立即就會被滿滿藍莓包圍！DAIWA藍莓園一共有2處地方提供「摘藍莓體驗」，面積比較大嘅位於花卷市，另一間則於陸前高田市，惟前者價格比較低、品種選擇亦會比較少。DAIWA藍莓園所提供嘅採摘體驗並非任食，價錢為花卷1,200日圓、陸前高田1,500日圓，費用已包括200g嘅盒裝，等您可以摘完拎走再慢慢嘆，推薦大家可以各個品種都摘返幾粒，再比較一下唔同品種嘅藍莓味道嘅分別！藍莓採收旺季落喺7月初至8月中期間，有機會記得去朝聖一番喇。
景點資訊
- 景點名：DAIWA藍莓園
- 地址：岩手縣花卷市鍋倉地森7
- 交通方式：從花卷站揸車約5分鐘，靠近花卷南IC交匯處
「紫波水果園」品嚐飽滿又大粒嘅巨峰提子（紫波）
「紫波水果園」除咗提供「即摘任食提子」體驗之外，其實「紫波水果園」本身仲係一個釀酒廠，園內提子品種粒粒都係優質精選，無論係「藤稔」、「安藝皇后」、抑或係「羅薩里奧比安科」（Rosalio Bianco ）等多款品種統統都可以品嚐得到。「紫波水果園」除咗提子迷人，景色亦相當怡人，岩手山所映襯出嘅果園景致可謂吸睛又療癒。
「紫波水果園」嘅「摘提子體驗」從9月開始提供，價值為每位1,500日圓，一日分成早上9點至中午12點，以及下午1點至4點兩個時段。
景點資訊
- 景點名：紫波水果園
- 地址：岩手縣紫波郡紫波町遠山松原1-11
- 交通方式：乘搭JR東北本線至紫波中央站，揸車約10分鐘
去「朝島觀光蘋果園」摘爽脆香甜嘅蘋果（盛岡）
「朝島觀光蘋果園」位於盛岡大生地區，園內飽滿圓潤嘅蘋果歡迎大家去大摘特摘！岩手蘋果以顏色鮮豔飽滿嘅外型、清甜爽脆香氣濃郁兼甜度適中而著稱，果園內種有多個蘋果品種，等大家可以喺廣闊嘅果園裡，一邊漫步一邊享受摘蘋果嘅樂趣。「摘蘋果體驗」時間至下午4點為止，採取以量計價嘅方式進行，每公斤只需540日圓相當划算！
景點資訊
- 景點名：朝島觀光蘋果園
- 地址：岩手縣盛岡市大生27地割54-11
- 交通方式：從盛岡市揸車約25分鐘
- 採收旺季：9月中～11月初
Comments