日文嘅文字分為平假名、片假名以及漢字三種。當中，片假名組成嘅日文元素相當複雜，相信有唔少人遇過就咁睇字面會令人「搲爆頭」，知道意思之後驚訝到會「吓」出聲嘅片假名詞彙。明明係源自於英文、法文等等外來語嘅片假名詞彙，當中含意又會同來源詞唔一樣令人相當費解。今次FUN!編精選出一個片假名詞彙清單，當中令人感到費解嘅片假名詞彙，話唔定學過日文嘅您都有遇過，即刻去睇睇有咩「搲爆頭」詞彙喇。
アルバイト（兼職 Part-time）
相信學過日文嘅大家，「アルバイト（兼職 Part-time）」呢個詞彙一定有聽過。「アルバイト」其實係源自德文嘅「arbeit」，意思並唔係「兼職 Part-time」，而係指一般「工作」。「arbeit」呢個詞彙飄洋過海去到日本之後，就變成「兼職 Part-time」嘅意思，令人費解。另外，「アルバイト」，仲有區分成「バイト」和「パート」唔同叫法。「バイト」係指「學生、自由業」等人士嘅兼職工作，而「パート」係指「家庭主婦、家庭主夫」嘅兼職工作。
マンネリ（千篇一律，淪為例行公事毫無變化）
「マンネリ」語源嚟自英文「mannerism」，意思係「獨特嘅癖性、舉止」，亦以「マンネリズム」片假名詞彙作使用。「マンネリ」雖然由「mannerism」語源衍生而來，意思卻轉變成「千篇一律、淪為例行公事般毫無變化、無任何新鮮感」，經常用喺厭倦每日過著同樣生活，或者情侶間嘅相處模式淪為千篇一律，缺乏新鮮與刺激等等狀況。當狀態漸變成千篇一律時，就會用「マンネリ化」（可譯成公式化）去形容。日文嘅「マンネリ」意思演變到與最根本嘅語源「manner」完全唔同。
テンション（氣氛、情緒）
「テンション」源自於英文「tension」，原本嘅意思係與「stress」相同，表示緊張。但日文嘅「テンション」反而係指「excitement（興奮）」嘅氣氛、情緒，多數會喺「情緒高漲、興奮嘅心情」等場合使用。另外，「ハイテンション」源自於「high tension」，外國人聽到「high tension」會覺得係指精神上處於不安與緊張嘅狀態，但日本人將「ハイテンション」解讀成「興奮、情緒高昂」等嘅意思，與原本嘅英文字意思完全唔同。
サービス（服務）
「サービス」基本上與「service」一字意思相同，都係指「服務」，但有時會出現同大家對英文「service」嘅認知有所不同嘅用法。譬如好多時候會喺餐廳聽到「これはサービスです」，意思係指「呢個係店家招待」，有免費嘅含意。順帶一提，明明過咗「正常工作時間」都未放工，開完OT之後唔會收到任何額外嘅加班費就稱之為「サービス残業」。餐廳嘅著數「サービス」免費招待等策略就話可以理解啫，但公司嘅「サービス残業」免費加班呢類不思議條文就真係令人費解。
ソールフード（地道小食）
「ソールフード」係和製片假名詞彙，與英文嘅「soul food」意思唔一樣。英文嘅「soul food」係指非裔美國人嘅傳統食物，「soul」指嘅係非洲，源自非裔美國人之間非常流行嘅「soul music（靈魂樂）」，而日本就直接使用當中「靈魂」嘅意思，「ソールフード」意思係足以代表當地地區，充滿靈魂象徵嘅食物。
コスパ（CP值）
「コスパ」源自英文「cost performance（成本效益比）」，將付出嘅成本費用和所獲得效益相比較，但其實英文裡面「cost performance（成本效益比）」一詞只會喺汽車、電腦、醫藥等等相關研發時使用，而日文「コスパ」係無論任何場合都可以使用。
タレント（藝人）
「タレント」語源於英文「talent」，意思係「天才、天資」，而日文中「タレント」係指電視上出現嘅「藝人、知名人士」，與英文嘅意思唔一樣。例如成日都會聽到嘅「搞笑藝人」（お笑いタレント），「多棲藝人」（マルチタレント）等日本電視藝人。至於點解「talent」喺日本會成為演藝界獨有詞彙？或者係因為演藝界中嘅藝人，需要施展自身持有嘅某種天賦，發擇渾身解數去完成演出吧。
カンニング（作弊）
「カンニング」語源於英文「cunning」，意思係「狡猾的、奸詐的」，但係日文中「カンニング」嘅意思係「作弊，從事不正當行為」，與「cunning」嘅意思並唔一樣。點解日文「カンニング」會解讀成「作弊，從事不正當行為」？可能係因為作弊，或從事不正當行為嘅人的確係狡猾奸詐，而引申沿用落去。
クレーム（客訴、抱怨）
英文「claim」意思係依據權益所作出「要求、請求、主張」等申訴，一般有claim（請求）意外保險等用法。而日文「クレーム」變成客戶服務投訴、抱怨等意思，認為係從要求售後服務嘅權益所出現，但如果根據日文「クレーム」當中意思嘅話，英文就應該係用「complaint」先至正確。
コンセント（插座）
日文中嘅「コンセント」意思係「電源插座」，詞彙來源模糊不明確，英文「consent」意思係「同意、贊成」，同電源插座完全無關。另外，亦有另一種講法，其實係指「將電源集中喺一個地方」，所以詞彙係來自於「concentration（集中）」。不過無論如何，喺日本以外嘅國家，如果講「コンセントはどこ？（插座喺邊度？）」，出現嘅應該唔會係插座，會變成另一種「consent」。
今次介紹咗好幾個與詞彙來源字意思不一嘅片假名詞彙，實際上日文當中仲有唔少和製英文、或從外語變化而嚟嘅詞彙，如果您都有發現任何奇奇怪怪嘅詞彙，歡迎留言詞畀FUN!編知！齊齊關心Share！
Comments