日本吉祥物「船梨精」源自千葉縣船橋市，由於船橋市係日本國內日本水梨嘅主要產地，「船梨精」正正呼應「船橋誕生嘅梨精靈」角色設定。雖然「船梨精」並非屬於官方公認嘅當地吉祥物，但係「船梨精」呢股非一般嘅「船」風魅力勢不可擋，人氣非常高，可以話係紅遍日本！萌到爆又精力旺盛嘅「船梨精」為當地帶嚟龐大嘅經濟效益以及宣傳效果，究竟點解「船梨精」呢股「船」風會吹得咁厲害，佢又有咩特別過人嘅魅力？即刻跟著小編同您逐一探討！
現居千葉縣船橋市嘅水梨精靈！？
「船梨精」擁有一雙迷人大眼睛，加上黃色身軀「梨」味十足，外型萌爆卻擁有超級好動與古靈精怪嘅個性。「船梨精」誇張嘅演出、百無禁忌嘅大膽發言，與可愛外表嘅反差超大，非常搞笑，十足諧星一樣帶畀大家無限歡樂，亦因為「船梨精」獨特過人嘅個性而受到大家嘅愛戴，紅遍日本。
至於點解佢會叫做「船梨精」？咁係因為千葉縣日本水梨產量係日本全國第一，船橋市亦係千葉縣裡面數一數二嘅日本水梨產地之一。
唔好見「船梨精」外表得得意意，就以為佢係小朋友，其實「船梨精」已經有成千歲之齡，更於2021年7月4日迎接1883歲生日！官方網站裡面嘅介紹有提到，船梨精嘅父母只係普通嘅水梨樹，而「船梨精」係兩千年只會出現一次嘅「奇蹟水梨精靈」。
「船梨精」除咗係兩千年一遇嘅奇蹟，官方介紹裡面亦有提到其性格「雖然口無遮攔，有時會出現吹水唔抹嘴嘅傾向，卻意外地非常坦率」。事實上，「船梨精」曾經向船橋市詢問過好多次，可唔可以成為官方公認嘅吉祥物，但一直都不被認可嘅最大原因就係「船梨精」口無遮攔，有時會吹水唔抹嘴嘅性格⋯⋯(但實際上「船梨精」只不過係用盡全力，想帶畀大家無窮歡樂⋯)
順帶一提，船梨精雖然並非官方公認吉祥物，但係喺2013年舉辦嘅當地吉祥物總選舉中奪得第1名！
船梨精基本資料
- 姓名：船梨精
- 生日：7月4日
- 年齡：1883歲(截至2021年11月)
- 居住地：千葉縣船橋市
- 職業：水梨妖精
- 性格：口無遮攔，有時會出現吹水唔抹嘴嘅傾向，卻意外地非常坦率
- 口頭禪：よろしくなっしー（yoroshikunasshi）
思考超乎常理、超級High又瘋狂過動！可愛反差萌征服日本全國
「船梨精」打破一般吉祥物唔會出聲、最多揮揮手或擺擺可愛POSE嘅刻板印象，以High到爆嘅誇張演出以及充滿獨特風格百無禁忌嘅說話方式殺出重圍。「船梨精」梨一般嘅黃色身驅，加上好似隨手塗鴉亂畫嘅五官，望落雖然非常可愛，但「船梨精」經常喺媒體鏡頭前、出席會場活動時嘅表現卻非常獨特，既過度活躍又會瘋狂暴走，令人驚喜十足。「船梨精」多嘴健談嘅性格亦有異於當地吉祥物一般嘅形象，只要「船梨精」一出現，就會瞬間令到全場氣氛High到爆炸！
「船梨精」甚至大方公開分享自己嘅梨皮身軀總共有5套，曾經試過喺錄影電視外景節目同出席活動時，大方地向觀眾公開「船梨精」自己背後嘅拉鍊（稱之神秘入口），又會肆無彈咁食嘢飲嘢，一而再再而三去做出好多當地吉祥物唔會有嘅行為舉止，挑戰當地吉祥物嘅禁忌，反而成功突圍而出。
粉絲必去朝聖地！船橋、大阪、原宿、名古屋「船梨精LAND」
「船梨精LAND」顧名思義就係專賣船梨精周邊商品嘅官方專賣店。2015年3月喺千葉縣船橋市 LaLaport Tokyo-Bay開設首間店舖，吸引唔少「船梨精」粉絲朝聖；同年7月再喺大阪梅田及12月原宿「KIDDY LAND原宿店」店內設店。其後再於2016年添食開設名古屋店，每間官方周邊專賣店都成為粉絲必去聖地，「船」風一發不可收拾。
「船梨精LAND」內，從各式各樣嘅公仔、文具到生活雜貨等多款「船梨精」官方周邊商品都應有盡有♪ 仲有日式坐墊等多項充滿日本風格嘅商品，最啱買嚟做手信嘅零食餅等等通通都一應俱全！而且每間店都有店舖限定嘅獨家周邊商品，鍾意「船梨精」嘅朋友，千祈唔好錯過呢個「船梨精」聖地！
店舖情報
- 店名：船梨精LAND 船橋本店
- 地址：千葉縣船橋市濱町2-1-1 LaLaport Tokyo-Bay 北館1F
- 交通：從JR東京站搭京葉線至南船橋站落車，步行約5分鐘
- 營業時間：10：00～20：00
- 官網：https://funassyiland.jp/index.html
Comments