喺日本聖誕節一過，街頭上嘅氣氛就會瞬間轉變，齊齊準備迎接新年。家家戶戶、企業公司等開始年尾大掃除，忙著要準備日本「大晦日（除夕）」跨年，仲有迎接新年正月嘅來臨。日本新年有唔少習俗，例如要食跨年蕎麥麵、年糕湯（雜煮）、御節料理、另外仲有新年參拜、壓歲錢等等，大家對呢方面又了解幾多呢？今日就同大家介紹日本特有過新年嘅風俗習慣，同新年必食美食。
大晦日同正月三日係？
12月嘅最後一日喺日本稱為「大晦日（おおみそか）」，準備迎接年神到來嘅日子。喺新年1月1日至1月3日呢三日稱為「正月三が日（しょうがつさんがにち）」，而喺正月呢三日，屋企人同親戚齊聚一堂，齊齊慶賀新年。
另外，12月29日至1月3日左右呢段跨年過新年時期，有好多旅遊景點、餐廳、店舖都會暫停營業，如果有計劃喺呢段期間去日本嘅話，最好事先查一下各個景點、設施官網，睇睇想去嘅地方係咪正常營業。
日本跨年準備：如何度過大晦日同新年正月
去到12月底，日本無論家庭抑或職場，就會開始著手準備「大～掃～除～」，徹底將一整年所堆積嘅灰塵打掃得乾乾淨淨，去舊迎新。
另外，通常都會擺放新年正月裝飾擺設，喺玄關大門前擺上「注連繩」同「門松」，好讓神明嚟屋企探訪嘅時候唔會盪失路。另外，仲會喺屋企裡面擺設「鏡餅」，一大一細圓碌碌嘅年糕疊高，再喺最上頭擺放橙嘅裝飾，獻畀神明。
多數日本人會喺12月31日「大晦日」呢一日食「跨年蕎麥麵」。
點解要係「大晦日」呢一日去食「跨年蕎麥麵」呢？當中理由眾說紛紜，據聞蕎麥麵嘅麵條又細又長，有「長壽」嘅含義；蕎麥麵同其他麵相比，麵條比較容易咬斷，象徵「切斷今年一年嘅災厄」等等。而喺呢碗「跨年蕎麥麵」上頭，大部分會擺上炸蝦天婦羅，日本一般普遍認為蝦彎彎嘅身體，就好似老人嘅姿態，象徵長壽。而蝦熟咗會變紅，亦認為係可喜可賀嘅吉祥象徵。
除此之外，蝦亦係正月菜式裡面嘅經典食材。除咗跨年蕎麥麵之外，喺御節料理亦會經常使用蝦作為食材之一。
另外，一講到大晦日跨年最主要活動，就係「除夜鐘（除夜の鐘）」！「除夜鐘」就係12月31日除夕晚（大晦日的夜晚）凌晨12點時間帶，敲響寺院嘅梵鐘。多數日本人會食著跨年蕎麥麵，聽著寺院傳來嘅鐘聲。
「除夜鐘」呢個除夕敲鐘係佛教儀式之一，僧侶會敲響108次鐘，而呢108次鐘聲，象徵煩惱，世界上人類「眾多煩惱與苦難等等心中污穢之物」嘅個數，每敲一下鐘，祈求除去一個煩惱。
初夢、初日出、初次新年參拜．．．．
日本人非常重視嘅新年「初次」各種活動
日本非常重視新年初次所做嘅各項活動，都稱為「初〇〇」。
例如，新年元旦第一日1月1日嘅早晨，欣賞旭日初升，稱為「初日出（初日の出）」。日本人會為咗欣賞新年第一個日出，專程登上富士山等高山，或登上高台，欣賞日出。
欣賞完新年日出之後，喺新年期間第一次去寺院、神社參拜，稱為「初次新年參拜（初詣）」。
除咗第一個日出、第一次新年參拜之外，喺新年發嘅第一個夢叫「初夢」，第一次展露嘅笑容稱為「初笑」等等各式各樣嘅「初〇〇」。
新年正月先可以品嚐到嘅經典美食
1月1日至1月3日新年正月呢段期間，日本人除咗會享用傳統新年正月美食，有御節料理、年糕湯（雑煮），仲會玩笑福面（福笑い）、歌牌（かるた）等新年正月遊戲，一家人團圓過年，和樂融融。
就好似前幾段文章裡面提到，大晦日當日唔少家庭會食跨年蕎麥麵，但根據唔同地區，擺放嘅配料亦有所差異，有蝦或鯡魚等等。
喺新年正月享用嘅過年美食、年菜，日本稱「御節料理（おせち料理）」。
主要由黑豆、數子（鯡魚嘅魚卵）、燒蝦、醋醃紅白蘿蔔絲、伊達卷（魚漿和蛋混合去煎）等等有著祈求長壽、無病消災等含義嘅食材，或將象徵吉祥好兆頭嘅食材組成，放入套盒（日本稱為「重箱」），瞬間變成宛如宴席美食嘅豐富菜色。
另外，喺新年正月仲有一樣經典必食美食，就係「年糕湯（お雑煮）」，放入白蘿蔔、紅蘿蔔、根據唔同地區仲會放海鮮等等，用味增或醬油去熬煮。湯頭同食材根據地區而異，日本全國各地一般普遍都會放年糕，但年糕種類亦有所唔同，有方形、圓形，有部分地區會放紅豆年糕等等。
新年正月亦有獨特嘅飲品。
新年期間普遍會飲祝賀新年戰酒，稱為「屠蘇酒」，祈求消除一整年壞運勢、邪氣，驅邪避凶，並希望能夠活得長長久久。喺寺廟見到用米同麴製作嘅「甘酒」亦係另一種必飲嘅新年飲品。喺新年期間品嚐美食佳餚、無數美酒享盡口福，亦因爲咁，往往過完一個新年之後，可能都唔少人體重會增加呢！
行入超市便利店，輕鬆品嚐新年正月美食！
有機會喺新年期間去日本嘅話，一定要去超市或便利店行個圈。
當日要買得到「重箱」包裝嘅御節料理，可以話係非常困難，因為必須事先預約訂購。但黑豆、伊達卷、紅白魚板等等喺超市等地方都有零售販賣。揀好想食嘅菜色，買完再喺酒店裡面享用，亦係另一種享受日本新年嘅特別方式。
另外，喺新年正月期間，小朋友會收到父母親、親戚等大人包嘅利是，裡面放著新年嘅零用錢，呢個文化習俗稱為「お年玉」。
呢段期間，文具店同便利店等等，會賣多種繪畫上人氣動漫角色等等嘅利是封，款式設計相當可愛，推薦可以買嚟做日本旅行嘅手信，喺農曆新年嘅時候就用日本利是封包利是畀小朋友啦～
Comments