究竟而家有咩男士髮型係受日本女性歡迎嘅呢？如果各位男士對髮型感到迷茫，或者可以參考吓以下由日本男性專門美容院的株式會社PERCUT公司進行，針對有關女性喜歡的男性髮型所得的問卷調查。結果顯示當中約八成受訪者鍾意男士將頭髮前蔭（瀏海）向上撥、露出額頭。唔通而家清爽嘅髮型比較受落？即刻睇吓以下邊個髮型比較受歡迎，去剪頭時做個參考都好吖～
※問題調查於2021年8月訪問約600名日本女性所得。
頭髮長度唔好太短亦唔好太長
以上圖中3款髮型當中，你認為邊個最受日本女性歡迎？
問卷調查結果得知，最多受訪者（約45%）選C，大多數嘅原因都係頭髮唔太短又唔會太長，帶出整潔嘅感覺。
男性專門美容院PERCUT的代表川口達也先生認為，如果唔知剪咩髮型，基本上對女性嚟講短髮帶俾人較好嘅印象，所以選擇頭髮唔太短，唔使用到剷青，頭髮自然豎立嘅髮型會比較好。
頭髮前蔭放落嚟定撥上去好？
就以上兩張相揀出鍾意嘅髮型嘅調查當中，大多數受訪者都揀A，原因係「無前蔭會比較整潔」、「露出額頭更清爽、醒神」等等。
美容院代表的川口先生就認為將前蔭向上撥能表現出男性清爽嘅一面。著起西裝，或者而家出街時常戴口罩都好襯到呢個髮型，試過覺得唔錯嘅男士不妨再露多少少額頭。而唔想露額頭嘅朋友，或者可以試吓只將額頭中間部份前蔭頭髮向上撥，眼尾留返啲啲前蔭，都會比較易襯。
清爽髮型就要選二分區式（Two-block）
唔少受訪者都提過「整潔」、「清爽」等字眼，整體嚟講即係剪咩髮型比較好呢？
以上兩張相當中，約65%受訪者鍾意B，原因係「臉頰兩邊顯得比較清爽」、「有種輕盈嘅感覺，唔錯」，似乎圖B二分區式（Two-block，剷起兩側頭髮，用頭頂較長頭髮覆蓋被剪短的部分）嘅髮型帶俾人清爽利落嘅印象，所以女性們都覺得唔錯。
川口先生表示剪成二分區式能令頭髮較長嘅髮型都可以展現利落嘅一面，推薦想一改形象嘅人可以嘗試。近年都多咗人著西裝梳二分區式頭嘅人添。
木村拓哉的髮型仍然係不二之選？
以上3張相當中，最多受訪者揀A作為最鍾意嘅髮型。原因係「唔太累贅，夠自然，唔錯」、「輕微曲髮好時尚」等認為唔刻意塑造嘅髮型就好，就好似2019年於日本播出嘅日劇「摘星廚神」當中木村拓哉嘅髮型就好受歡迎。
川口先生就講到木村拓哉嘅髮型係無論邊個世代都好受歡迎。喺男性當中好有人氣，特別係主演日劇播出後就會多咗客人要求要剪佢嘅髮型。參考木村拓哉短髮時期嘅髮型就「實食無黐牙」啦！
男士曲髮都係其中一種選擇！
最後就係以上2張相當中揀出鍾意嘅髮型，揀A嘅受訪者佔約58%、B佔約42%。雖然傳聞女性唔鍾意男性電曲髮，但其實意外地有日本女性認為輕微電曲都幾時尚，或者覺得曲髮睇落髮量唔會太厚，感覺唔錯。調查結果女性顯示對於男性電曲髮似乎有唔少正面嘅評價。
而川口先生就認為男性電曲髮本身並唔係受女性歡迎嘅重點，只係曲髮彎度太強嘅話女性可能會難以接受，如果真係想電曲嘅話就推薦輕微電曲。根據各種電曲髮技巧，可以塑造出髮量不同嘅效果，話唔定可以電出一個時尚嘅髮型呢！
睇完以上調查結果，你有無頭緒想剪咩髮型？其實女生都各有唔好喜好的男生髮型，如果想諗住模仿明星髮型都唔好太過度，要襯返自己，最緊要整潔企理。
Comments