古色古香嘅岡山美觀地區係岡山倉敷市主要旅遊觀光景點之一，以下為大家介紹去到美觀有咩值得一睇！
有關岡山倉敷市的美觀地區
呢度曾經係一個極為重要嘅貿易中心，用嚟運輸白米穀糧同紡織品，所以會有好多木造建築同舊屋作為存放貨品嘅倉庫。從江戶、明治時期保留至今嘅舊街景，營造出美觀地區嘅復古風情，吸引咗唔少日本及外國遊客前來欣賞。
部分舊建築更改為博物館、旅館、咖啡店、餐廳、或販賣當地手信嘅店，而其中於1917年建成嘅古老建築「倉敷館」亦都改頭換面，成為倉敷旅遊服務中心添！
岡山倉敷市的特色景點
美觀地區的街景
市政府為咗吸引遊客，喺美觀嘅街道下咗唔少工夫。將電線杆同纜線全面地下化，除咗可以令美觀地區嘅街景睇起嚟更典雅美麗，重現美觀地區昔日風采，同時亦令當地居民生活維持原有嘅便利。而且仲以「美觀」為名，顧名思義就係「美麗的景觀」。
傳統倉敷川遊船
舊時呢度係運送貨物同商品流通嘅貿易中心，修建好多水道嚟促進交通運輸。而家倉敷嘅水道亦成為主要觀光景點。遊客可以坐傳統小船遊運河、享受沿岸日本古老街景。小編推介坐船嘅話可以試吓戴埋傳統圓錐狀草帽，更能融入幾百年前古代日本嘅氣氛。
景點資訊
- 名稱: 倉敷川遊船（於倉敷觀光導覽所售票)
- 地址: 岡山縣倉敷市本町1-4-8
- 交通: 從倉敷站步行約15分鐘
- 開放時間: 9:30–17:00（每30分鐘一班船，天氣不佳則停開）
- 休息日:
- 3月至11月：第2個星期一（如遇日本公眾則開放）
- 12月至2月：僅週六及例假日出船、日本新年假期休息
- 費用: 大人500日圓（每班船限6名）
藝術性十足的建築磚瓦
喺美觀地區，你可以睇到牆壁上嘅磚瓦排列好特別，稱之為「なまこ」。呢種工法係喺磚瓦同磚瓦嘅接縫處擺上半圓柱石膏，其名「なまこ」就即係海參，因為半圓柱石膏睇起嚟就好似海參。除咗圖案排版睇落有藝術感之外，亦有保護建築免於風雨摧殘嘅作用，發生火災時，亦能夠避免火勢蔓延。
特色狹窄小巷
美觀地區嘅狹窄小巷亦係特色之一。狹窄小巷用當地方言稱之為「ひやさい（HIYASAI）」。行喺小巷之間，可以用另一個角度欣賞古老木造建築同「なまこ」建築並排嘅風景。而呢啲建築而家已成為手工藝品商店或其他商店。
大原美術館
有啲舊時嘅倉庫或古老商店演亦變成傳統或現代藝術美術館。當中有一間建於1930年嘅「大原美術館」係日本第一間有關西洋藝術嘅美術館。目前該館收藏咗眾多西方同日本嘅現代藝術品。
景點資訊
- 名稱: 大原美術館
- 地址: 岡山県倉敷市中央1-1-15
- 交通: 從倉敷站步行約15分鐘
- 開放時間: 9:00 - 17:00 (最後入場為16:30)
- 入場費用: 成人1,300日圓、大學生800日圓、中學及小學生500日圓
購買岡山縣及倉敷市的特產及手信
倉敷市、或者岡山縣，擁有多種特產或手信適合帶返香港。除咗知名嘅倉敷帆布相關產品，仲有岡山縣最出名嘅傳統美食——「吉備糰子」，甚至出現過喺日本童話「桃太郎」嘅故事中。吉備糰子食起嚟口感煙韌，微甜清爽，大家有機會可以試吓！
去倉敷美觀地區的交通資訊
要去美觀，首先要搭去倉敷站。由岡山站搭JR山陽本線約18分鐘，由新倉敷站搭JR山陽本線去倉敷站約10分鐘。到倉敷站後行15分鐘就到美觀地區。
Comments