講到日本旅行行程，除咗睇靚景行街Shopping之外，又點會少得一嚐日本當地美食呢個環節呢？日本四季分明、水源優質，先天環境加上後天用心孕育農作物嘅「農業職人」，因此當地出產嘅農作物令人食得開心又放心，難怪成功虜獲一眾港人芳心。日本全國共有47個都道府縣，各地氣候與地形都有所不同，從而發展出各種形式兼不同特色嘅農業，即使係種植同一款水果，日本各地都有屬於自己風格美味，例如東京所屬嘅關東地區內就有一個可以感受「即摘即食」樂趣嘅好地方－千葉縣！
無論係士多啤梨「即摘任食」，抑或係「自己花生自己揀」等等嘅農園體驗活動都可以體驗得到！從東京出發前往千葉縣嘅交通非常方便，「摘嘢食」之外仲可以順便加插其他行程，無論係海灘同陽光玩遊戲、浸溫泉，甚至去著名嘅養老峽谷散散步，呼吸大自然嘅新鮮空氣等等，都保證統統可以規劃出一場充實又療癒嘅一日遊。今次FUN! JAPAN編輯部就為大家精選出千葉縣四季當造農作物與農園清單，記得要Mark低佢，等下次去日本想體驗「即摘即食」嘅時候就唔洗「左搵右搵」相關資訊喇！
去日本品嚐新鮮當造農作物前先做足功課
日本極為重視四季時令嘅新鮮食材，對於「旬のもの」（當季時令產物）非常講究，務求四季都可以品嚐得到最新鮮嘅食材。日本農作物享負盛名，吸引唔少遊客會喺盛產期飛去當地食最愛嘅日本水果或時令蔬菜，更加會去當地農園體驗「即摘即食」，享受第一手嘅最佳好味道。正所謂「知己知彼百戰百勝」，想要享受最新鮮農作物嘅話，就要先了解當地季節性農作物有邊幾款，即刻跟著小編睇睇千葉縣四季農作物啦！
春季採收竹筍與枇杷
春天嘅千葉縣盛產鮮嫩竹筍同埋香甜枇杷。可能您會懷疑究竟竹筍點食至好？其實竹筍無論係炸成天婦羅，抑或用嚟小炒甚至燘煮都非常適合。另一方面，枇杷則喺日本屬於比較高價格嘅水果，去到千葉縣「即摘即食」鮮甜枇杷，簡直係至高享受！
夏季採收藍莓與枝豆
夏天7月至8月期間嘅千葉縣係盛產藍莓嘅季節。藍莓有益健康，富含有益眼睛健康嘅成分。喺香港無乜機會可以任食藍莓，但千葉縣就係任食藍莓嘅天堂！千葉縣嘅氣候最適合種植藍莓，當地栽培嘅藍莓品種亦常多，當中每個不同品種所適應嘅氣候都有所不同，例如有部分品種係適合較為涼爽嘅氣候，有部分品種適合較為溫暖嘅氣候，所以喺唔同嘅時期會遇到唔同品種嘅藍莓喔！千葉市以及千葉縣南部嘅木更津等地都係體驗藍莓「即摘即食」嘅好去處。
日本夏天盛產嘅枝豆，相信只要有去過日式居酒屋嘅讀者都唔會陌生，但您又知唔知原來枝豆都有得採摘體驗呢？枝豆作為日本人國民下酒菜之一，富含豐富蛋白質與膳食纖維，營養價值非常高。想體驗水果以外嘅採摘樂趣嘅話，不妨試試摘枝豆再帶返屋企用鹽水煮，感受一個不一樣嘅採摘樂趣。
秋季採收水梨、花生與蕃薯
香港人對日本蕃薯嘅愛，可見於Donki排長龍買焗蕃薯以及日本蕃薯甜品等場面。去到秋冬時分，更加會諗起日劇中「老是常出現」、主角拎著「煨蕃薯」坐喺公園度邊嘆邊傾偈嘅情節。但其實只要秋天出發去千葉，就可以體驗得到親手挖掘美味嘅日本蕃薯，有機會記得去挖多幾個拎返去慢慢嘆喔！
千葉縣盛產蕃薯、花生與水梨，更加係日本最大嘅水梨產地之一。8月下旬至10月中旬期間係盛產水梨嘅季節，當地水梨品種唔單止果香誘人，食落鮮甜又多汁，令人一試難忘。千葉縣市川市大町地區內，就有多間水梨農園與販售水梨嘅店舖，更有「大町梨街道」之稱，係唔少水梨愛好者專程去入手靚水梨嘅好地方。
除此之外，如果問到日本人對千葉縣名產嘅印象，好多人都一定會諗起花生，皆因日本80%花生嘅生產量都係嚟自千葉縣，當中以千葉半立、大勝、以及Q-nuts等品種最受歡迎。花生食就食得多，您又有無諗過可以一試親手挖花生嘅樂趣呢？千葉縣從9月份開始就會有唔少地方提供挖花生體驗，當您將花生整株拔起嘅瞬間，一定會感受到前所未有嘅成就感！
冬季採收士多啤梨與柑橘
冬天去日本就係要食士多啤梨！日本各地所栽培出嘅士多啤梨，果香撲鼻又大又甜，更加係聖誕蛋糕等各種甜品最亮眼嘅點綴。千葉縣內有一條被稱為「士多啤梨之路」嘅國道126號，皆因沿途有一間又一間士多啤梨溫室農園，為遊客提供夜間摘士多啤梨嘅體驗。
順帶一提，千葉縣另一種冬天熱門水果係柑橘，有機會去到千葉縣又鍾意柑橘系水果嘅話，記得唔好錯過「到此一摘」！
千葉縣摘水果推薦景點
千葉縣三面臨海，大部分地區屬於房總半島。受土壤環境及溫暖氣候條件等因素下，非常適合種植藍莓、士多啤梨、水梨、蕃薯，甚至奇異果等等多種農作物。除咗國道126號有「士多啤梨之路」之稱，國道464號亦被稱為「大町梨道」，兩者沿路都林立多間農園與溫室，選擇相當多元豐富。以下小編就為大家精選出當中幾間心水果園，下次出發前可以參考參考！
龍田觀光農園（Dragon Farm）：士多啤梨與藍莓
龍田觀光農園（ドラゴンファーム）以摘士多啤梨與藍莓而聞名，從千葉市乘搭都市單軌電車，落車後再步行一段路便可抵達。1月至5月中旬係士多啤梨季，推薦大家參加「即摘即食士多啤梨體驗」（分為上午、下午時段，各限時半小時），任食由農園提供嘅16種士多啤梨。收費方面為大人每位3,000日圓，小童1,500日圓，相當抵食！
6月中旬至8月底係藍莓季，各位可以趁呢段期間去體驗摘藍莓（每位限時1小時，收費1,500日圓）。現場亦有販賣新鮮採摘嘅士多啤梨，一盒500日圓，不妨摘完再買盒返酒店慢慢嘆。
景點資訊
- 景點名：千葉龍田觀光農園（ドラゴンファーム）
- 地址：千葉縣若葉區小倉町1354
- 交通方式：乘搭千葉都市單軌電車至千葉台北站，車程約20分鐘，車票費用為480日圓，再從車站徒步約20分鐘
母親牧場（マザー牧場）：蕃薯與奇異果
母親牧場（マザー牧場）係好啱一家大細出遊嘅地方，事關您唔單止可以摘水果，仲可以摘埋蔬菜，再同牧場小動物嚟個近距離接觸，或者喺度體驗一個豪華級嘅露營。而且一年四季不愁無好節目，秋天去到母親牧場可以體驗挖掘蕃薯或者係摘奇異果，冬天則可以摘草莓或藍莓。
母親牧場盛產「紅東」（べにあずま）蕃薯，9月中旬至10月下旬提供採挖掘蕃薯體驗，收費為1個300日圓，4個1,000日圓。園內會提供挖蕃薯用手套，並會有農場職員話您知點樣先會挖掘到大隻又甜嘅蕃薯。同場摘奇異果體驗費用為每位200日圓，價錢按重量計算，每100g為100日圓。
景點資訊
- 景點名：母親牧場（マザー牧場）
- 地址：千葉縣富津市940-3
- 交通方式：
- 從JR君津站乘搭直通巴士至「母親牧場牧場門前」落車，徒步即可抵達
- 乘搭JR內房線至JR佐貫町站，車程約70分鐘，再轉搭鹿野山線路線巴士至「母親牧場牧場門前」落車，徒步即可抵達，車程約20分鐘
成田農田觀光農園（成田ファームランド）: 蕃薯與士多啤梨
成田農田觀光農園致力追求當地農作物品質，除咗係採摘水果、花生嘅真心推介，更加係賞花好去處。
1月至4月係士多啤梨季期間，您可以喺到食到粒粒專門栽培高甜度品種；其後6月至8月藍莓季與10月至11月蕃薯季亦係唔少日本人秋天行程活動之一。費用方面，「摘士多啤梨體驗」費用為大人2,200日圓、中學生、高中生1,980日圓、小學生1,650日圓；「摘藍莓體驗」費用為大人1,800日圓、中學生、高中生1,620日圓、小學生1,350日圓；「挖掘蕃薯」為大人（中學生以上）1,500日圓、小學生1,200日圓。價錢已包含士多啤梨係限時任食30分鐘、藍莓限時任食1小時、或蕃薯體驗約1小時（約可挖得5個蕃薯）。另外，農園仲會推出採摘活動連BBQ燒烤嘅行程組合，不妨可以喺度又摘又BBQ，盡情享受不一樣嘅大自然風光。
景點資訊
- 景點名：成田農田觀光農園（成田ファームランド）
- 地址：千葉縣成田市所1199-1
- 交通方式：
- 從成田機場駕駛出發約20分鐘
- 沿國道51號從大榮IC往香取方向約5分鐘
- 從千葉交通巴士京成成田站乘搭往佐原方向巴士，至赤阪台停靠站下落車，徒步約5分鐘
有野實苑汽車農場露營場：花生、枝豆與其他
如果你想喺千葉感受一個不一樣嘅住宿，「有野實苑汽車農場露營場」絕對係您嘅最佳選擇。「有野實苑汽車農場露營場」會提供多款農作物採摘體驗，7月至8月係毛豆、薯仔；6月至8月有藍莓、粟米與矮瓜；9月至10月有花生與蕃薯；10月則有栗子等等多款蔬菜水果等您嚟發掘。收費因農作物而異，價錢已包括體驗所需嘅道具，大可放心摘得輕鬆、掘得放鬆。
景點資訊
- 景點名：有野實苑汽車農場露營場
- 地址：千葉縣山武市板中新田2
- 從JR八街
- 從成田機場駕駛出發約25分鐘，建議租車
Comments