一講起池袋，好多人都會聯想到池袋超好行、有超多美食。但實際上，池袋都有唔少動畫、漫畫相關角色嘅周邊商品專賣店和主題café。2020年，FUN! JAPAN編輯部就曾經搶先為大家介紹過，位於東京池袋太陽城alpa專門店街地下1樓盛大開幕嘅「SANRIO CAFE 池袋店」主題café，餐廳忠實呈現由Sanrio明星營造出嘅可愛世界，喺一眾Sanrio明星環繞之下，品嚐各式各樣原創造型美食，置身於歡樂氣氛之下真係大飽口福！
今次，FUN! JAPAN編輯部就親自去到「SANRIO CAFE 池袋店」朝聖，為大家徹底探索呢間主題café嘅必睇特色！
「SANRIO CAFE 池袋店」堂食外賣帶走一樣OK！
「SANRIO CAFE 池袋店」分成兩個區域，分別係堂食「café區域」和專門外賣帶走嘅「咖啡餐車區域」，各自都有唔同嘅原創主題美食。唔止食物吸引人，店內裝修到處都係可愛度爆燈嘅Sanrio風格，淨係望見呢度可愛嘅裝飾已經覺得相當療癒！難怪主題café喺開幕之後就迅速成為人氣熱話♪
「Café區域」Sanrio明星陪您享受歡樂用餐時光
堂食區「Café區域」會有一班Sanrio明星圍繞著您陪您齊齊用餐，享受歡樂用餐時光。「Hello Kitty」、「布甸狗」等Sanrio明星化身成色彩繽紛嘅咖啡杯吊燈，外型十分可愛。場內每組座位都會放置Sanrio明星公仔，即使係一個人去用餐，都會有得意公仔陪住您，咁就唔怕會覺得寂寞喇！
輕食、甜品應有盡有！每一款都可愛到令人唔捨得食！
Café主要提供主題食物包括漢堡包、班戟、Latte拉花、水果奶昔與其他飲品等。今次小編喺「Hello Kitty」、「梳乎蛋」、「Little twin stars」與「Kuromi」4種漢堡包餐裡面揀咗「梳乎蛋漢堡包」餐，漢堡包上面印有Sanrio明星梳乎蛋（蛋黃哥）嘅表情圖案，跟餐再有沙律、薯條。每款Sanrio明星造型漢堡包會依照唔同主題，漢堡包口味亦會有所調整。就好似「梳乎蛋漢堡包」醬料係含有大量雞蛋嘅他他醬，份量相當澎湃，再搭配濃郁醬汁，美味程度令人一啖接著一啖，食完之後仲會忍唔住再三回味呀！
另外，pancake亦有4種款式可供選擇，分別係「Hello Kitty」、「My Melody」、「肉桂狗」與「布甸狗」，當然形狀就係Sanrio明星嘅熟悉面孔！配合各位明星角色嘅特徵，所選用食材與配料都會唔一樣，例如今次小編所揀嘅「Hello Kitty」與「布甸狗」，前者配料係蘋果，後者則就放咗成個完整布甸做配料！無論係邊一款都可愛到極點，叫人點會捨得食落肚！
最後結尾，推薦您可以去嘆返杯飲品！綿密奶泡上頭印著Sanrio角色圖案嘅「拉花Latte」，有「Hello Kitty」等9款Sanrio明星圖案可供選擇。您又或者可以嘆返杯放上新鮮水果切片，即點即打嘅水果奶昔，有「Hello Kitty」、「布甸狗」、「Kero Kero Keroppi」3款可以選擇，水果奶昔下方仲會有滿滿嘅奇亞籽，可以稱得上係相當健康嘅飲品，味道唔會過酸，飲落非常順口！順帶一提，喺店內點飲品，即可獲得一個獨一無二嘅原創杯墊♪
專門提供外賣嘅「咖啡餐車」原創甜品周邊都唔可以錯過！
除咗堂食區之外，喺「SANRIO CAFE 池袋店」入口處亦有設置專門提供外賣嘅「咖啡餐車」，所提供食物以甜品為主，有燒冬甩、雪糕、手卷班戟等等。另外，仲有陳列著相當多嘅原創周邊商品，全部都係得「SANRIO CAFE 池袋店」先可以買得到嘅限定款！非常適合買嚟做自己嘅朝聖紀念品或者買嚟做手信送畀人！
外賣美食亦充滿Sanrio可愛風格 令您甜蜜上心頭
「Hello Kitty燒冬甩」每款造型都有綁著可愛蝴蝶結嘅「Hello Kitty」。放入雪櫃冷卻嘅燒冬甩，外頭裹著朱古力皮冰涼酥脆，食落相當美味！口味有原味、甜朱古力、士多啤梨等6種。
「天呀！呢款係咩名堂呀！超～級～可～愛！」一上餐檯就令小編忍唔住嗌個不停。原來佢係圓碌碌嘅大福！以Sanrio明星得意樣為設計概念嘅大福一份有4粒，分別有2粒「Hello Kitty」，以及「My Melody」、「梳乎蛋」各1粒，咁可愛嘅日式和菓子點會捨得一啖吞落肚！
另外，外賣飲品亦非常繽紛可愛，紙製飲管上頭仲有跟一個「Hello Kitty」蝴蝶結造型嘅影相小道具！拎嚟影相，人人都可以影出充滿少女心嘅可愛打卡靚相。
最後，小編想要介紹嘅係「SANRIO CAFE 池袋店」全新主題食物！以Sanrio角色為主題概念嘅5款蛋糕、6款泡芙、4款卷蛋、以及5款杯裝蛋糕，係咪種類多到令您唔知點揀好呢，保證粉絲睇完一定會選擇困難症發作呀！
繼續猶豫落去都唔係辦法，於是迅速點咗XO仔蛋糕、玉桂狗泡芙以及My Melody卷蛋。以純黑XO仔為主題設計嘅朱古力蛋糕味道相當濃郁，卻甜而不膩！粉紅色My Melody卷蛋係士多啤梨口味，仲有用餅乾去重現My Melody嘅耳仔，喺完整重現Sanrio明星嘅特色上真係相當用心！另外，以玉桂狗為主題製作嘅泡芙，係薄荷與吉士醬口味。無論係邊一款都超級可愛，又係令人想食又咬唔落口...
「SANRIO CAFE 池袋店」由內部裝修到食物都處處充滿精心設計巧思，就係希望客人可以享受並沈醉喺Sanrio明星角色嘅可愛世界之中，一定會成為池袋熱門景點。喺Sanrio明星嘅包圍下，享受一段歡樂用餐時光，對於Sanrio粉絲嚟講簡直係夢想中嘅天堂！下次去日本玩嘅時候，一定要去「SANRIO CAFE 池袋店」，同可愛嘅Sanrio明星們嚟一場甜蜜約會♪
※文章內所介紹嘅外賣餐點一般只會提供外賣服務。今次特別獲得店家許可喺「Café區域」內拍攝。
店舖資訊
- 店名：SANRIO CAFE 池袋店
- 地址：東京都豐島區東池袋1-28-1 太陽城 alpa專門店街B1
- 營業時間：週一～週五11：00～19：00(最後點餐時間 18：30)／六日及假日 11：00～20：00(最後點餐時間 19：30)
- 公休日：以太陽城公休日為準
- 座位數：44席(採梅花座入座的狀況之下，最多為22席)※依現場情況，店內座位有可能適當調整
- 交通方式：東京Metro有樂町線「東池袋」站直通／池袋站東口徒步約8分鐘
🄫’21 SANRIO S/D・G 著作(株)サンリオ
Comments