[特輯: 富士山] 登富士山

※本篇文章刊登於 2017年2月 ※

關於富士山

富士山喺2013年6月22日被列為聯合國教科文組織世界遺產，位於靜岡縣與山梨縣之間、高3776米嘅富士山係日本最高嘅山。夏天時，爬富士山係最遊客受歡迎嘅活動之一。由7月初開始到9月中，當地人與外國遊客都會組織登山活動。2012年7月，我喺新潟縣長岡市讀大學時，跟一群多數係外國人嘅大學朋友一齊去爬富士山。我嘅朋友向我保證所有人都能夠安全登上富士山，連冇爬過山嘅初學者都一樣。於是我決定一試，到依家一啲都唔覺得後悔。爬富士山係一次非常寶貴嘅體驗，令我永生難忘。

登富士山

開始爬山嘅時候，我見到有上百個由世界各地而來嘅旅人同我喺同一個出發地點—富士山五合目，海拔2300米高。我同朋友大約喺晚上8點開始爬山，通過叫做吉田登山道嘅登山路徑。登山路徑沿途有好多休息站，比登山者享用食物、飲料及放鬆。無食物或飲品嘅旅客可以喺休息站嘅販賣店購買。此外，休息站亦提供住宿設施。如果有旅客生病或想隔日繼續登山，就可以喺小屋度留宿。一晚嘅住宿費由每人5500日圓到8000日圓不等。雖然並唔平，不過對因生病不得不留宿或想體驗喺富士山住宿嘅旅客來講好實用。

對我同我朋友來講，登山其實就好似旅遊。我哋幾乎每個休息站都停低，影咗好多相，而且亦一邊休息一邊食買嚟嘅食物及飲料。爬山時，有幾件事情我覺得好有趣。首先係好多旅客都會喺每個休息站排隊拎登山貼紙貼喺輔助登山嘅拐杖上。雖然頗花時間，不過呢種貼紙係好好嘅紀念品。第二點係喺高度3772米嘅地方有一間郵局，供旅客由富士山寄特別嘅明信片給家人、親戚。

整體來講，如果爬得快，無花太多時間休息嘅登山者，大約可以喺6~7個小時之內抵達富士山山頂。不過我爬咗8個鐘，朝早4點先登上富士山山頂，當時最低氣溫為攝氏0度。登上山頂之前，有一個大門，兩側有好似石獅子嘅雕像。呢座大門代表住旅客到咗富士山最高嘅地區。富士山山頂有好多設施，如廁所、餐廳、紀念品店等等。大約5點鐘，我睇住太陽由雲層中升起，圍繞住山頂嘅雲層就好似一片巨大嘅棉花毯子。睇住日出嘅美景，我覺得滿足又幸福。我仲喺山頂幾個景色優美嘅地方影相留念添。希望返到印尼之後，偶爾睇返照片上自己喺山頂拎住印尼國旗嘅時候，可以回想起成功登上富士山頂時果種幸福、驕傲嘅感覺。