位於日本本州最大半島「紀伊半島」嘅和歌山縣除咗因為坐擁古老森林、環抱綠意盎然嘅紀伊山地，同一眾充滿神秘感嘅宗教聖地而聞名，亦因爲得天獨厚地理位置而擁有紀伊山脈古老森林至海灘美麗白砂等豐富自然景觀，背山面海、風景相當怡人。當中，位於和歌山縣南部嘅白濱，更加係日本最受歡迎嘅海灘渡假勝地之一，以近在咫尺嘅蔚藍太平洋同溫泉見稱，加上夜晚時不時會有煙花表演，簡直可以媲美夏威夷威基基海灘！至於去到和歌山白濱究竟有咩係必玩同必睇？今次就等FUN! JAPAN編輯部同大家逐一介紹～
和歌山白良濱海灘
位於白濱嘅白良濱海灘，係多間酒店、旅館集中嘅地區，當您盡情玩完水返到酒店或旅館之後，仲可以浸返個溫泉好好放鬆一下㖭。
「白良」嘅意思即係「白色海灘」，白良濱海灘全長600幾米，90%由石英沙組成，堪稱白濱町內最吸引嘅沙灘。1980年代由於颱風侵襲等因素下白良濱海灘嘅砂越嚟越少，於是當地就使用海外嘅砂去進行海灘修復嘅養灘工程。而家大家見到嘅白良濱白砂，其實係來自澳洲沙漠。
去到棕櫚樹映襯嘅白良濱海灘，眼前只見碧綠大海，要享受悠閒寫意渡假時光就係咁簡單！如詩似畫嘅美麗景致，完全不比南國海灘輸蝕。白良濱更與夏威夷威基基海灘結為姊妹海灘。如果覺得搭飛機去夏威夷太遠，不妨可以考慮去一趟和歌山白良濱海灘！
白良濱海灘喺邊度？
白良濱海灘位於紀伊半島和歌山南岸，距離大阪大約100公里，係逃離都市煩囂嘅最佳地點。留意返，日本靜岡亦有一個全長800米嘅白濱海灘，距離東京比較近，記得千祈唔好去錯地方，將白良濱海灘同日本其他地方嘅海灘撈亂啊！
如何前往白良濱海灘
如果搭電車去，您可以選搭JR紀勢本線或JR特急黑潮號至白濱站，再轉當地巴士至白濱巴士站，大約10分鐘，票價300日圓。巴士站位於白良濱海灘同多間白濱人氣住宿設施附近。另外，白良濱海灘距離南紀白濱機場非常近，從機場可以搭接駁巴士去白濱市區或海灘，車程約15分鐘。
- 從大阪出發：
乘搭從新大阪至白濱嘅特急黑潮號列車，車程約2小時20分鐘。 - 從京都出發：
建議先從京都折返大阪，再從新大阪搭特急黑潮號去白濱。 - 從和歌山出發：
乘搭從新大阪開出嘅特急黑潮號列車，車程約1小時。
喺白濱盡情享受海灘水上活動
去到白濱，您可以瞓喺海灘上盡情享受日光浴、或者喺蔚藍大海裡面浮潛、游水、衝浪等等，簡直係人生一大享受！除咗水上活動，日本夏天嘅經典—花火大會亦絕對唔可以錯過。玩完成日開始覺得攰攰地，仲可以浸個溫泉，舒緩水上活動後造成嘅肌肉疲勞。
白濱溫泉
白濱唔單止擁有雪白沙灘，仲有「日本三大古溫泉」之一嘅白濱溫泉。白濱溫泉嘅泉水引流至酒店旅館嘅浴池與公共浴場以及多個免費足湯，歡迎遊客可以大浸特浸。當地亦至有一座白濱民俗溫泉博物館，專門介紹白濱溫泉歷史與相關資料。
白濱溫泉嘅泉質有3種，分別係碳酸氫鹽泉、氯化物泉、硫磺泉，能有效舒緩肌肉酸痛、關節痛、促進血液循環、改善肌膚問題等功效。
白濱居內對外開放嘅溫泉浴池有6間，當中有2間附設露天浴池。白砂溫泉露天浴池位於白良濱海灘旁邊，望落好似圓型泳池穿般嘅溫泉浴池係一處可以穿著泳衣男女混浴嘅露天溫泉。夏季入場費用為200日圓，10月至4月期間入場免費。營業時間由早上10點至下午3點，7、8月延長至晚上6點，逢星期一休息。
另外1間露天溫泉浴池，則係擁有1000多年歷史嘅崎之湯露天溫泉浴池。設施位於海岸旁邊，眼前就係一片浩瀚太平洋，遊客可以一邊浸溫泉一邊聽著海浪拍岸聲，感覺就好似與大海融為一體！營業時間由早上8點至下午5點，夏季營業時間會延遲，每人入場費用為500日圓。
白濱煙花大會
白濱於每年夏天（7月與8月）幾乎都會每晚發放小型璀璨煙花照亮漆黑嘅夜空，特定某幾晚更會舉辦盛大花火大會。例如7月30日會放大約3,000發煙花，而規模最大嘅煙花表演就多數會喺8月10日登場。
當晚璀璨炫目嘅煙花成為夜空唯一焦點，重頭戲「尼加拉大瀑布」更係不容錯過。長達1,000米嘅煙花瀑布超級夢幻，精彩程度令人讚嘆不已。睇煙花之餘，會場附近仲會有唔少攤販擺檔，除咗有地道日本夏日經典小遊戲之外，仲有當地日本小食。下個夏日旅程，想盡情感受日本夏日祭典氣氛嘅朋友去白濱就包保無出錯！
Fisherman's Wharf白濱
相信大家對東京築地市場都唔會陌生，但您又知唔知其實白濱都係日本最大嘅漁市場之一呢？由當地漁民合作社經營嘅「Fisherman's Wharf白濱」所販賣嘅海鮮，全部都係當地新鮮捕獲、非常生猛。種類包括來自日本各地嘅魚類、甲殼類等等。市場裡面亦設有餐廳，可以大啖嘆魚生、丼飯等各種美食，品嚐當地食材最新鮮嘅好味道。如果有需要嘅話，店家亦會為您推薦最佳海濱晚餐菜色或燒烤食材，相當貼心。
景點資訊
- 名稱：Fisherman's Wharf白濱
- 地址：和歌山縣西牟婁郡白濱町堅田2521
- 交通：位於白良濱海灘南方，位於漁港內。從白良濱海灘徒步約10～15分鐘，沿途有「牟婁溫泉」。
白濱海景酒店推薦
作為日本著名旅遊渡假勝地，白濱旅遊景點咁豐富，酒店、旅館嘅選擇自然非常多。以下就等小編介紹幾間最受歡迎嘅酒店畀大家參考一下。
南紀白濱萬豪酒店：奢華住宿享受
南紀白濱萬豪酒店絕對稱得上係於白濱留宿嘅最佳首選。南紀白濱萬豪酒店提供一流住宿服務，坐享溫泉、美食以及無敵海景。距離白良濱海灘南端只係短短50米，亦意味著同Fisherman's Wharf白濱距離相當近。
酒店資訊
- 名稱：南紀白濱萬豪酒店
- 地址：和歌山縣西牟婁郡白濱町2428
- 房價：24,000日圓起跳（雙人房／1人收費）
白良莊格蘭酒店：賓至如歸渡假時光
白良莊格蘭酒店係白濱町最大嘅溫泉渡假酒店，提供超值客房類型與各種豐富設施。酒店位於白良濱海灘北邊，日式、西式房型等多個房型都可以欣賞到蔚藍海景。有預算嘅朋友，亦可以選擇附有露天溫泉、室外游泳池，或提供私人包場溫泉服務。
酒店資訊
- 名稱：白良莊格蘭酒店
- 地址：和歌山縣西牟婁郡白濱町868
- 房價：28,000日圓起跳（雙人房／1人收費）
白濱溫泉旅館武藏：感受日式傳統風情
白濱溫泉旅館武藏係一間傳統日式旅館，迷人海灘景觀客房分為純日式客房及日式雙床客房等房型。旅館嘅溫泉浴場非常寬闊，並分成室內同室外露天溫泉，係白濱唯一能夠同時享受兩種泉源嘅溫泉旅館。餐廳食物內容根據住宿方案分為兩種，除咗有提供豐富自助餐，亦有可以品嚐得到紀州新鮮海鮮嘅宴席料理旅擇，為賓客提供優質奢華服務。
酒店資訊
- 名稱：白濱溫泉旅館武藏
- 地址：和歌山縣西牟婁郡白濱町868
- 房價：8,300日圓起跳
和歌山仲有好多值得推介嘅海灘！
雖然白良濱海灘係大多數去和歌山嘅遊客首選，但其實和歌山仲有唔少高質海灘、海水浴場等緊大家。部分位於和歌山市附近、交通非常方便，唔駛行太遠就可以享受到夏日海灘風光。
磯浦海水浴場
磯浦海水浴場位於和歌山市東北部，亦係相當熱門嘅渡假勝地。浴場上棕櫚樹、遼闊大海同萬里無雲藍天交織出令人心曠神怡嘅景致。遊客既可以暢泳，又可以衝浪滑浪，非常受海上活動發燒友以及一家大細同遊嘅遊客喜愛。
景點資訊
- 名稱：磯之浦海水浴場
- 地址：和歌山縣和歌山市磯之浦386-2
- 交通：距離南海加太線「加太」站只有幾分鐘距離。
片男波海水浴場
地形狹長嘅片男波海水浴場位於和歌山市東南方，係當地另一熱門衝浪海灘。片男波海水浴場設施建設良好，非常適合一家大細暢遊。順帶一提，海水浴場旁邊有一個公園，可以順路去探索一下。
景點資訊
- 名稱：片男波海水浴場
- 地址：和歌山県和歌山市和歌浦南3丁目1740
- 交通：最近車站係JR紀伊國線「紀三井寺」站
濱之宮海灘
濱之宮海灘坐落於城市之中，您可以喺到欣賞太陽橋美景。海灘另一邊海面，就係距離非常近嘅片男波海水浴場。
景點資訊
- 名稱：濱之宮海灘
- 地址：和歌山縣和歌山市毛見 濱之宮海灘
- 交通：最近車站為JR紀伊國線「黑江」站
Comments