由東京站出發約1小時、新宿出發約40分鐘，即可抵達「Sanrio Puroland」（三麗鷗彩虹樂園，香港又稱「Hello Kitty Land 」），係一個可以親眼見到Hello Kitty、My Melody等相當受歡迎Sanrio明星嘅主題樂園，非常適合一家大細或三五知己同遊！今次FUN! JAPAN編輯部親身去「Sanrio Puroland」報到，一探呢座日本人氣主題樂園，而家就帶大家出發去感受園內設施嘅超級可愛精彩特色！
「Sanrio Puroland」精彩特色逐個捉
嚟到「Sanrio Puroland」，無論係大人定小朋友都可以享受Sanrio夢幻世界！您可以同場內眾多可愛Sanrio卡通明星見面，例如日本國民級角色Hello Kitty、My Melody、布甸狗與肉桂狗等，通通都恭迎您光臨！除咗機動遊戲、表演之外，園內仲有速配指數占卜、遊戲等區域，可以用各式各樣方式去體驗Sanrio世界嘅魅力。
另外，喺呢座樂園裡面，每個角落都超級好影，度度都係打卡影靚相嘅最佳景點！無論係大朋友小朋友，任何年齡層都會不知不覺地沈醉於Sanrio可愛氛圍之中，簡直就係夢想嘅世界！
※園內裝飾及活動因季節而異。
同Sanrio卡通明星齊齊玩機動遊戲，展開一場令人雀躍嘅冒險 ♪
通過入口行入「Sanrio Puroland」，再搭扶手電梯落樓之後，眼前會馬上見到「Puro村莊」。繽紛燈飾點綴嘅「智慧樹」坐落於正中央，打造神秘感十足嘅世界觀。望見眼前景色，忍唔住會對跟著落嚟嘅樂園冒險充滿期待！
事不宜遲，即刻出發去大玩機動遊戲啦！園內眾多機動遊戲當中，小編特別推薦「Sanrio Character Boat Ride」（三麗鷗明星家族飄飄船）與「~My Melody & Kuromi~ Mymeroad Drive」（～美樂蒂＆酷洛咪～美樂蒂之路兜風遊）！
Sanrio Character Boat Ride
「Sanrio Character Boat Ride」係一項即使唔太熟悉Sanrio明星角色嘅人都可以玩得盡興嘅機動遊戲。準備啟程之前，已經可以見到各式各樣Sanrio明星角色滿心雀躍地要去參加Party。
機動遊戲內出現嘅Sanrio明星角色們會隨著音樂起舞，營造出歡樂嘅Party氣氛。同好朋友、屋企人齊齊搭「Sanrio Character Boat Ride」，歡樂地參與Sanrio嘅Party，肯定會獲得大量嘅可愛元氣♪ 而且明星角色們嘅繽紛鮮豔裝扮，姿態超級無敵可愛，會忍唔住大嗌kawaii～！唔知下一個出現嘅明星角色會係邊個，令人既期待又興奮。
另外，旅程當中仲會幫您影相留念！當中所影嘅相片，可以喺設施出口處「飄飄船相片區」購買。服務亦有提供「Web Photo Service」，買咗嘅相可以喺網上重溫，非常方便。
「~My Melody & Kuromi~ Mymeroad Drive」
「~My Melody & Kuromi~ Mymeroad Drive」係My Melody粉絲絕對唔可以錯過嘅機動遊戲。兜風旅程之中，您可以暢遊My Melody等角色所居住嘅「MARILAND」，仲有6個地方會為大家影相留念，大家要先諗定擺咩POSE喇！
兜完風落車之後所影嘅紀念相，可以自己蓋印章、用畫筆自己加工裝飾，亦可以選擇原創相框（加工裝飾相片需要另外購買），令人從頭到尾都沈醉喺My Melody 嘅迷人世界之中！
日本傳統與Hello Kitty合而為一！？KAWAII KABUKI ～Hello Kitty劇團桃太郎～
鍾意日本嘅人，應該都有聽過日本著名童話故事《桃太郎》。「Sanrio Puroland」就將Sanrio明星角色嘅「Kawaii」結合「歌舞伎」，打造出一場前所未有嘅音樂劇，為大家上演精彩桃太郎故事！
故事從化身成桃太郎姿態嘅Hello Kitty擊退惡鬼嘅劇中劇開始。身穿和服嘅Sanrio明星角色華麗又可愛，非常療癒。充滿魄力嘅表演內容加上令人感動嘅主題曲，精彩故事內容與眾多場面，都令人睇到相當振奮，甚至振奮到令人起雞皮！唔單只係小朋友，就連大人都會被呢場充滿「日本之美」演出內容所震撼，睇得入迷呢。
為咗令在場觀眾可以更融入表演、齊齊享受歡樂時光，喺表演開始之前，場館會播放中英語等各國語言導覽。觀眾亦可以透過多語言字幕服務APP「OMOTENASHI GUIDE(款待導覽)」了解台詞內容，只要事先Download好呢個APP，就可以更加融入劇情，睇得更稱心。
→ https://omotenashiguide.jp/（提供英文、中文、韓文、泰文）
處處都係打卡影靚相位！360度無死角超級好影～令人瘋狂大叫「Kawaii～」
「Sanrio Puroland」園內，處處Kawaii度都爆晒燈，但如果想要影出更更更可愛嘅打卡靚相，推薦您一定要去「Lady Kitty House」！
「Lady Kitty House」陳列著Hello Kitty攝影景點、玫瑰庭園、禮服塔、被甜品包圍嘅睡房、茶室等等，簡直就係女生夢想世界，打卡靚相任您影！
一場嚟度，指定動作梗係同Hello Kitty影張紀念相！Hello Kitty著住華麗粉紅色連身裙登場，超級可愛！！！鍾意Hello Kitty嘅小編有幸可以喺現場親眼見到本尊，表示既開心又興奮，喺影相嘅時候情不自禁地小緊張(笑)
好彩幫手影相嘅工作人員非常親切，充滿熱情地為大家講解說明，就算語言不通亦唔洗擔心，交畀專業嘅工作人員就可以影出令您滿意嘅靚相！購買影好嘅紀念相時可以根據唔同季節，揀選唔同相片款式，閃亮繽紛嘅各種原創相框任君選擇☆
「卡通特色食品區」可愛又繽紛嘅Sanrio主題料理豐富
「卡通特色食品區」內提供多款以Sanrio明星做主題嘅主題料理，「Sanrio Puroland」原創菜單、以明星角色們為造型嘅菜式豐富，選擇多多，令人選擇困難症發作！
布甸狗25週年☆照燒蛋黃醬漢堡包套餐1,700日圓(含稅)
招牌美食之外，季節限定與期間限定嘅款式亦相當豐富。例如上圖套餐「照燒蛋黃醬漢堡包套餐」，就會因應明星角色週年慶更換款式，唔同角色嘅漢堡包，顏色亦會唔同。順帶一提，小編去採訪嘅時候啱啱好係布甸狗25週年，所以黃色漢堡包上面就印著可愛嘅布甸狗！粉絲可以用呢種方式為鍾意嘅明星角色嚟一場週年慶祝活動，官方真係非常貼心啊(笑)
另外，上圖右邊愛心蛋糕980日圓(含稅)則係為咗慶祝「Sanrio Puroland」30週年，喺2020年12月所推出嘅料理。附有30週年慶祝AR裝飾影像，對著蛋糕就會出現意外驚喜。
※料理內容有可能會於無事先預告嘅情況下有所調整。
「入口商店」爆買Sanrio明星周邊商品 為旅程劃下完美句號
「入口商店」係「Sanrio Puroland」最大最寬敞嘅購物區，由零食餅乾、文具用品到衣服配件等，滿載Sanrio明星特色相關周邊商品。期間限定嘅珍貴商品、人氣熱銷商品好快就會銷售一空，如果有見到鍾意嘅商品，就唔好猶豫，即刻放入購物籃喇！
除咗文章裡面介紹嘅內容之外，「Sanrio Puroland」仲有好多適合小朋友玩嘅機動遊戲、Sanrio明星嘅夾公仔機遊戲區、梳乎蛋魔法速配指數占卜、以及笑咪咪布甸狗房間等，超多精彩有趣嘅設施區域，千祈唔好錯過。下次去東京旅行時，不妨規劃喺「Sanrio Puroland」渡過一日，沈醉喺Sanrio明星角色嘅世界之中啊。
景點資訊
- 名稱：Sanrio Puroland
- 地址：東京都多摩市落合1－31
- 交通方式：從新宿站乘搭京王線至京王多摩中心站，車程約30分鐘。從京王、小田急、多摩單軌電車多摩中心站步行約5分鐘。
- 營業時間：平日 10:00~17:00、六日及假日 09:00~17:00
- 公休日：不定期公休 ※亦可能變更營業時間。詳情請上官網查詢。
- 門票：
- 平日：大人 3,600日圓 小童、長者 2,500日圓
- 假日：大人 3,900日圓 小童、長者 2,800日圓
- 午後入場：大人 2,400日圓 小童、長者 2,200日圓
※ 因應新冠肺炎之防疫措施，入場必須經由官網或官方APP事先預約。
Comments