日本係一個擁有春夏秋冬，四季交替嘅國家。日文中有一個詞彙叫做「風物詩」，意思係「象徵該季節嘅代表性事物，或能夠感受其季節變化嘅相關事物」。當季節變換時，皆有代表著各季節裡特定享用嘅美食、可以觀賞到嘅風景、以及例行習俗與活動等，喺日本，可以享受到與季節相襯映嘅各式各樣事物呢。
就算去唔到日本，都可以透過呢篇文章所介紹與風物詩相關嘅事物並加以利用，就算身處香港都可以體驗到日本獨特風情呢！今次，小編將全面解說日本夏天，以及象徵著夏季嘅風物詩！
日本夏之風物詩：花卉
日本夏天花卉：牽牛花、絲瓜花朵、向日葵等等
春季以梅花和櫻花聞名，然而夏天亦有眾多綻放嘅花卉。當中，部分花卉品種只會於短暫時期內盛開，亦有能從9月至11月長時間綻放嘅花種。當你去日本時，不妨喺街頭巷尾、旅遊景點等地，仔細觀察一下盛放嘅花卉，感受當中嘅動人景致啦。
談及到夏天具代表性嘅花卉，必定會提到「朝顏」，即牽牛花。常見於7月至9月期間嘅住宅區庭園和街角，係一種能讓人感受到日本夏天氛圍嘅花卉。朝顏喺江戶時代曾經歷過兩次風靡時期，最初受到武士和少數富裕商人喜愛，其後逐漸普及至一般大眾。現時可以喺各處望見牽牛花嘅身影。
據聞自室町時代，便從中國傳入了絲瓜，一般作為食物使用。然而，絲瓜會於夏天時開出黃色嘅花朵，因此同樣被視為象徵著夏季嘅花卉之一。
提起夏天嘅絕景，就不能不提到如像太陽般又大又圓嘅向日葵！當向日葵嘅季節到來時，全國各地嘅向日葵花田裡嘅向日葵花卉，齊齊整整地朝著同一方向盛開，美景讓人陶醉其中。北海道嘅「北龍町向日葵之里」、穿過千葉嘅向日葵花海嘅電車路線「小湊鐵道」等，尤其受歡迎。
此外，喺梅雨季6月中盛開嘅繡球花、7月嘅薰衣草和蓮花等亦非常著名。想了解更詳細嘅相關資訊，請點此！
夏天昆蟲：蚊、獨角仙、螢火蟲、蟬等等
夏天係昆蟲出沒嘅季節。
提到日本夏天，應該有唔少人會諗起嘅「蚊」和「蟬」。夏天會使用將殺蟲成分打造成螺旋狀，並進行乾燥所製作而成嘅「蚊香」產品作防蚊之用。當燃點蚊香時，熱氣令殺蟲成分釋放到空氣中，從而殺死附近嘅蚊蟲。至於蟬，其實有著多個不同品種，例如「鳴鳴蟬」和「日本暮蟬」，每種蟬嘅鳴叫聲都唔一樣，因此了解得越多，越覺得有趣呢！
夏天時，喺日本會有捉蟲活動，「獨角仙」和「鍬形蟲」特別受小朋友們喜愛。另外，螢火蟲會於5月底至6月底出現喺清澈嘅河邊，因此亦被稱為「宣告夏天即將開始」嘅知名昆蟲喔。
自然現象：梅雨、蟬時雨、逃水、夕立
夏天嘅自然現象亦係風物詩之一。
日本大約於6月時，會有叫做「梅雨」嘅季節現象。根據氣象廳嘅講法，梅雨雖然係指「從春季轉向盛夏嘅時期，出現較多雨天和多雲嘅季節現象」，但係一般情況下，「梅雨」一字則用來表示該段時期。有唔少人都會抱有「梅雨與雨季有咩分別？」嘅疑問。由於日本並無乾季時期，而「梅雨」係指由季節風帶來嘅梅雨前線而降下嘅雨水，因此被稱為「梅雨」，與雨季有所區別。
夏天時，另一種常見嘅現象係「蟬時雨」，雖然呢個詞彙有「雨」一字在內，但蟬時雨並非雨嘅一種，而係指多隻蟬同時發出鳴叫聲，聽落就好似雨聲一樣嘅現象。
另外，喺高溫無風嘅「猛暑日」炎炎夏日之下、喺瀝青混凝土道路上望見遠處彷彿有水嘅海市蜃樓現象，日文稱之為「逃水」（逃げ水）。下午到傍晚時分，出現突如其來嘅驟雨，則被稱為「夕立」（夕立ち）等等。
日本夏天風物詩：夏天服飾
夏天服裝：浴衣
喺日本，如果講到去煙花大會或夏日祭典時所穿著嘅服裝，就一定係浴衣啦！浴衣係夏季時所穿著嘅其中一種和服，相較於傳統和服更容易穿著，輕便且涼爽。
- 點此了解更多有關浴衣與和服嘅分別。
日本夏天必備時尚單品就有草帽！其原因當然係可以保護整個面部範圍，免受陽光直接照射。喺田地等地方，可以見到用於農作業等嘅寬邊草帽，而喺都市和商業設施中，亦可以見到作為時尚配件嘅草帽，相信喺日本旅遊期間，好大機會可以遇到各種不同形狀嘅草帽喔。
- 點此了解更多有關夏時尚服飾推薦
日本夏天風景：夏季活動與娛樂
夏季活動與娛樂：泛舟、鵜飼、涼床、流水麵、啤酒花園、潑水活動
日本夏季猛暑不斷，因此日本人從古時起便舉辦各種夏季活動，讓人們可以既涼爽又愉快地度過炎炎夏日。
講到日本夏天特別推薦嘅活動，就有泛舟體驗。包括四萬十川等日本三大清流等，日本擁有眾多水質優良嘅河流，因此全國各地都可以享受泛舟、遊覽船等水上活動。另外，部分遊覽船更有提供參觀名為「鵜飼」嘅日本傳統神奇捕魚法體驗，當中最出名嘅係宇治川嘅鵜飼活動。
另外，要推薦畀愛酒人士嘅活動就係「啤酒花園」！夏天時，喺戶外設施或餐廳露台上享受啤酒、枝豆、薯條等小食嘅地方，稱之為啤酒花園。德國嘅慕尼黑啤酒節等活動雖然係於秋天舉辦，但日本呢類啤酒花園等與啤酒相關嘅活動通常會於夏天舉行喔。
如果想享受日本夏天獨有涼透心嘅特色餐點體驗，京都嘅川床對係值得推薦嘅選擇！你可以喺享用美食嘅同時，聆聽著水流聲，散發著一種能讓人感受一股清涼嘅氛圍呢！
另外，如果喺夏天去日本，流水麵亦係其中一項必試項目。流水麵係指將素麵隨著水流穿過竹管，然後將麵條夾起享用嘅體驗，好味又有趣！流水麵亦係一項象徵著日本夏天嘅活動呢。
夏天活動、節慶：七夕&短冊許願擺飾
7月7日「七夕」，日文發音為「Tanabata」（たなばた）。雖然「七」係表示數字7（Nana/Shichi）嘅日文漢字，而「夕」一般讀作「Yū」，但係點解「七夕」呢個字，要讀成「Tanabata」呢？
其實，喺七夕傳說中登場嘅「織姬」，於古書中被稱為「棚機津女（Tanabatatsume）」，據聞「Tanabata」呢個讀法，正正係來自於棚機津女傳說。七夕祭典，會於7月期間喺日本全國各地舉行，可以喺路上各處看望見七夕裝飾。另外，人們會將願望寫於願望短冊上，然後掛上竹樹，部分地方甚至會舉辦短冊製作活動，如果你有興趣參與其中，夏天去日本旅行時睇吓目的地有無有關七夕活動嘅安排啦。
夏天活動、傳統節日：盂蘭盆節、盆踊
「盂蘭盆節」係於夏季舉行嘅一系列祭祀祖先並供養嘅儀式活動。盂蘭盆節日期為7月或8月，不同地區嘅話日子亦會有所不同，但一般而言，大部分企業都會喺8月放盂蘭盆假期，學校亦會有暑假，因此唔少日本家庭都會趁著盂蘭盆節期間一同回鄉探親。13日會進行迎火（為了讓祖先能夠順利回到家中，迎接祖先嘅標誌性活動就係燃點迎火），喺盂蘭盆期間會去墓地祭祖；而在15日或16日會進行送火（用以送行於盂蘭盆節期間一同度過嘅祖先靈魂嘅儀式）。盂蘭盆節期間日本各地亦會舉辦「盆踊」等活動。
夏天活動、傳統節日：夏日祭典、煙花大會
夏天活動中，最著名嘅莫過於煙花大會和夏祭吧！雖然無法列舉所有地方舉辦嘅活動，但作為日本最古老煙花大會嘅「隅田川煙花大會」、「全國煙花競技大會（大曲之煙花）」等日本三大煙花大會，稱得上係眾所周知嘅著名煙花大會喔！
煙花大會和祭典嘅「屋台」攤檔亦係一大樂趣。有日式炒麵、章魚燒、刨冰等屋台美食，仲有賣面具、卡通人物氣球等商店，就連撈金魚和射擊等各種遊戲都可以玩得到。順帶一提，喺煙花大會等場合，你可能會聽見日本人嗌「Tamaya」（たまや）或「Kagiya」（かぎや），其實呢係源自古老習俗嘅叫喊聲喔。
想了解更多相關資訊請點此
夏天活動：鬼屋、試膽、怪談故事
日文中有「嚇到背脊發涼」、「以怪談避暑」等講法。喺無冷氣和電風扇嘅時代，日本人透過聽恐怖故事去出冷汗降溫。
呢個習俗被流傳至今，並作為日本嘅夏天風物詩之一。當中，去相傳有鬼魂出沒嘅「心靈景點」、遊樂場等嘅鬼屋進行試膽活動，又或者圍著蠟燭營造恐怖氛圍嘅講鬼故等活動，至今仍然係夏天嘅人氣活動！對於喜愛恐怖事物嘅人嚟講，日本嘅夏天絕對係一個超好玩嘅另類樂園呢！
日本夏之風物詩：夏天獨有物品
夏天獨有物品：風鈴、蚊香
如果想要品味日本夏天，以五感去享受亦係一種雅趣。
如果想透過聲音品味夏天，可以聆聽掛於日本傳統建築物嘅屋檐下、被風吹拂時發出清涼音響嘅風鈴之聲。現時，喺手信舖經常見到嘅玻璃風鈴，大約始於江戶時代便開始普及，據說係透過荷蘭傳入嘅製作方法，加上玻璃工藝嘅興盛，令到玻璃製風鈴得以成為主流。
夏天亦有唔少機會可以聞到蚊香氣味。蚊香呈獨特螺旋形狀，其容器亦非常特別，當中更有部分容器設計成豬形狀，稱為「驅蚊豬」（蚊遣り豚）添！
點解會係製作成豬嘅形狀呢？關於呢個疑問有多種說法，例如與豬相似嘅山豬原本就係被尊崇為「火伏神」，可以防止火災。亦有另一種講法係當時使用體積較大嘅酒壺，由於該酒壺形狀似豬，因此以此為靈感以容器製作成豬形狀。
夏天獨有物品：團扇、摺扇、瞬間冷卻噴霧劑等等
另外，講到夏天必備嘅降溫工具，又點可以唔提「團扇」！仲有另一款同樣能為你帶來涼風嘅小物，就係可摺疊、更具高級感嘅「摺扇」。另外，可以輕鬆喺超市或便利店購買得到嘅瞬間冷卻噴霧劑，稱得上係現代嘅「夏季風物詩」呢。
夏天獨有物品：蚊帳、簾、暖簾、電風扇
講到喺日本嘅動畫和電視劇中經常出現嘅夏季風物詩之一，就係蚊帳。蚊帳係從天花板懸掛下來覆蓋睡床等寢具，以防止蚊蟲嘅網狀物品。雖然現時經已非常少見，但昔日嘅和式住宅並無冷氣，人們經常打開窗戶睡覺，因此會將寢具鋪喺懸掛式嘅蚊帳中入睡。
另外，陽光猛烈時所使用掛於窗戶上嘅簾、電風扇等，亦係日本夏季嘅象徵性物品呢！
日本夏天風物詩：夏天美食
夏天美食：鰻魚料理、中華冷麵
日本自古以來就有著「夏季食用鰻魚料理以預防夏日疲勞症候群」嘅習慣，且歷史非常悠久，甚至可以追溯到日本最古老嘅歌集「萬葉集」中，亦有掲載著與鰻魚相關嘅歌曲。食用方法包括將沾滿醬汁嘅蒲燒鰻魚擺放於米飯上，形成嘅鰻魚盒飯「鰻重」，以及享受原汁原味不蘸醬汁嘅白燒鰻魚等。
日本料理中有著各式各樣嘅冷麵。當中，有以麵粉為原材料製作，直徑小於1.3毫米嘅「素麵」、直徑介於1.3毫米至1.7毫米之間嘅「冷麥麵」、直徑大於1.7毫米（即使係手工製作，直徑亦大於1.7毫米）嘅「烏冬」，仲有以蕎麥粉製作嘅「蕎麥麵」等，有著眾多其原材料、製作方法、粗幼度皆不同嘅麵條，可謂種類繁多。
另外，喺冰涼嘅中華麵條上放上大量嘅番茄、黃瓜、錦絲蛋絲、火腿等配料嘅「中華冷麵」等，多款夏季限定嘅麵食或當地獨特嘅麵食料理，可謂琳瑯滿目！下次去日本旅行時，不妨親身試試，感受一番吧！
夏季人氣美食：西瓜、粟米
講到夏天美食，西瓜就一定榜上有名。喺日本，西瓜唔單止係一款放入口品嚐嘅水果，仲會透過一種叫做「扑西瓜」（すいか割り）嘅獨有文化活動，享受更多夏天嘅樂趣呢！
夏天冰涼甜品：刨冰、葛餅、心太等等
刨冰係指喺刨碎嘅冰上面加入士多啤梨、蜜瓜、煉奶等醬汁配料一同享用嘅甜品。喺日本，刨冰一直係「緣日」等傳統節日上常見嘅甜品，但近年來專門店興起，推出各種創新口味嘅刨冰。例如，淋上小倉紅豆餡和抹茶糖漿嘅「宇治金時」等，非常推薦充滿日式風情嘅刨冰！另外，葛餅和心太（日本涼粉）等甜點，亦係象徵著日本夏季嘅冰涼甜品之一。
點此了解更多相關資訊
夏天飲品：麥茶、波子汽水
當談及日本人日常飲用嘅飲品時，最先應該會諗起茶吧！尤其係冰凍嘅麥茶，係象徵著日本夏季嘅飲品。唔好以為「只係一杯普通嘅茶」。據聞麥茶嘅成分對於預防中暑、改善血液循環、抗氧化等具有一定效果。另外，據傳昔日戰國時代嘅武將們亦係麥茶嘅愛好者。
對於喜愛祭典嘅人，強烈推薦要試一試經常於溫泉街、攤位中販售嘅「波子汽水」。唔少日本人都曾經喺飲完波子汽水之後，絞盡腦汁去諗點樣拎樽內粒波子出嚟呢！下次有機會嘅話，你都不妨試吓喺日本買枝波子汽水嚟挑戰一下啦！
Comments