【日本和歌山】將歷史與景色一網打盡！和歌山市中心必去景點「和歌山城」

和歌山縣位於日本本島南方，隸屬於關西地區，坐擁充滿神秘感嘅熊野古道、渡假氛圍洋溢嘅南紀白濱等等眾多知名觀光景點，從大阪乘搭電車大約1小時就可以抵達。喺呢個有山有海、富饒自然嘅地方內，縣廳所在嘅「和歌山市」內坐落著一座被市區一片綠蔭蔥蔥公園環繞啂純白日本城堡—「和歌山城」。今次，FUN! JAPAN編輯部就要為大家介紹呢座和歌山市最主要觀光景點之一！

和歌山城歴史

和歌山城歷史可追溯至1585年，豐臣秀吉讓弟弟豐臣秀長建造城堡開始。1600年關原之戰後，和歌山城再建造連立式天守，並建造本丸、二之丸、西之丸建造屋頂等等，令和歌山城逐漸發展出周邊設施以及城下町等。天守喺1846年因雷擊引起嘅一場火災中燒毀，其後於1850年重建，卻又於1945年戰爭中再次被燒毀。目前大家見到嘅天守，則係喺1958年再次重建而成。

「和歌山城」屬於日本國內亦甚為罕見嘅構造

大而堂皇嘅和歌山城天守可謂擁有日本城堡中數一數二規模，即使從遠處遙望，您都可以清楚地分辨到和歌山城形狀！和歌山城嘅櫓與天守相連呈現嘅形狀，與姬路城、松山城合稱「日本三大連立式平山城」，絕對係鍾意日本城堡嘅人不可錯過嘅一大景點。

和歌山城必睇之處

登上「天守」一眼飽覽和歌山市區景色

白壁三層嘅大天守位於虎伏山山頂，遊客可從天守內向外一覽無餘地眺望和歌山市區街景，坐享眼前一片壯觀景色。作為主要參觀景點，天守內部現時化身資料館，展出眾多珍貴館藏與紀州德川家息息相關嘅物品，您可以從中了解當中歷史。黃昏時分到訪和歌山城嘅話，則有機會欣賞到夕陽沈入海中嘅美景。

斜斜架起嘅「御橋走廊」

和歌山城裡除咗城堡之外，仲有好多可以感受和歌山城歷史嘅地方，而其中一處就係「御橋走廊」！設有屋頂嘅走廊，從前係相連西之丸與二之丸嘅通道，只限藩主和隨從可以通行，從外頭係睇唔到走廊裡面嘅一舉一動。走廊連接嘅兩端有高低差，斜斜架起嘅架構使得其存在更為珍貴。為咗防滑，走廊地板被打造成鋸齒狀，現時並已開放一般遊客使用，免費入場。有機會到訪和歌山城嘅話，不妨去行個圈睇睇喇。

城堡範圍內竟然有動物園！？

和歌山城另一個特別之處就係，城堡範圍內竟然附設動物園，而且仲要係免費參觀！截至2021年3月，園內一共飼養49種、167隻動物。目前喺全世界都相當受歡迎嘅紀州犬，喺呢度都有2隻啊！

忍者神出鬼沒登場！

和歌山城仲會有忍者神出鬼沒現身去招呼客人！忍者們會喺和歌山城城內及四周以表演歡迎到訪遊客，亦有忍者運用隱身術、融入城堡城牆之中。觀光嘅時候，不妨用金睛火眼搵吓忍者藏身喺邊！想要知道忍者嘅修行以及出沒嘅行程，可以事先去官網確認喔。

知名賞楓景點：西之丸庭園

「西之丸庭園」係江戶時代初期修建嘅日本庭園，亦係有著「紅葉溪庭園」之稱嘅著名賞紅葉景點。每到秋天紅葉季時，都會有唔少遊客與當地居民前來欣賞秋天美景。

感受四季更迭之美「和歌山城」

富饒自然環繞嘅「和歌山城」隨著到訪季節不同，亦會呈現唔同風貌。當中又以櫻花和紅葉特別著名，當春暖花開之際，城內所種植嘅櫻花齊齊盛開，染上成片粉紅嘅和歌山城，唔單止深受遊客歡迎，亦係當地人氣嘅賞花景點呢。

另外，和歌山冬天落雪次數雖然稀少，但捉緊時機運氣好嘅話，話唔定可以欣賞到白雪覆蓋和歌山城嘅景色，相當夢幻！

番外篇：想要眺望整體和歌山城？推薦去「和歌山市公所 觀景區」

想要將成個和歌山城嘅姿態盡收眼簾，推薦可以前往「和歌山市公所觀景區」。從和歌山城徒步約20分鐘，一整個和歌山城嘅姿態完完整整一覽無遺！簡直係私房景點！

基本資訊

• 名稱：和歌山城（天守閣）
• 地址：和歌山縣和歌山市一番丁3
• 營業時間：09:00〜17:30（最後入場時間 17:00）
• 公休：年底（12月29日～12月31日）
• 門票：成人410日圓、孩童（中小學生）200日圓
• 交通方式：從JR「和歌山站」搭巴士約5分鐘／從南海電鐵「和歌山市站」徒步約10分鐘